Lajmet

Auditori i Përgjithshëm i Republikës së Kosovës, Besnik Osmani, të martën priti në takim bilateral presidentin e Institucionit Shtetëror të Auditimit të Emirateve të Bashkuara Arabe, Dr. Harib Saeed Al Amimi. Osmani dhe Dr. Harib Saeed Al Amimi diskutuan për intensifikimin e bashkëpunimit bilateral me qëllim të shkëmbimit të informatave dhe përvojave, në interes të avancimit të mëtejmë të auditimit të jashtëm dhe përmirësimit të menaxhimit të parasë publike. Me këtë rast, Osmani e njoftoi homologun arab për punën dhe rezultatet e Zyrës Kombëtare të Auditimit, si dhe për ndikimin e rekomandimeve për të rritur llogaridhënien dhe qeverisjen e mirë të institucioneve. Auditori i Përgjithshëm, Besnik Osmani, falënderoi presidentin e Institucionit Shtetëror të Auditimit i Emirateve të Bashkuara Arabe, Dr. Harib Saeed Al Amimi, i cili në vazhdimësi e ka përkrahur Zyrën Kombëtare të Auditimit dhe për kontributin e dhënë në procesin e anëtarësimit të ZKA-së në INTOSAI. Në anën tjetër, presidenti i Institucionit Shtetëror të Auditimit i Emirateve të Bashkuara Arabe, Dr. Harib Saeed Al Amimi tregoi se e përcjellë në vazhdimësi punën e Zyrës Kombëtare të Auditimit të Kosovës, me ç’rast përgëzoi Osmanin për arritjet e deritanishme.  Ai tha se me anëtarësimin në INTOSAI, ZKA-së do t’i mundësohet shkëmbimi i njohurive dhe përvojave me Institucionet Supreme të Auditimit simotra. Institucioni Suprem i Auditimit i Emirateve të Bashkuara Arabe ka një përvoje të madhe në organizimet dhe projektet ndërkombëtare në fushën e auditimit, duke qenë se për tri vjet (2016-2019) ka drejtuar INTOSAI-n. Ky takim u realizua në kuadër të vizitës së Dr. Harib Saeed Al Amimi në Kosovë për të marrë pjesë në Konferencën Ndërkombëtare “Domethënia dhe rëndësia e anëtarësimit në INTOSAI: ndikimi dhe përfitimet për Institucionet Supreme të Auditimit”. Kjo konferencë do të mbahet me rastin e anëtarësimit të Zyrës Kombëtare të Auditimit të Republikës së Kosovës me të drejta të plota në Organizatën Ndërkombëtare të Institucioneve Supreme të Auditimit (INTOSAI). Gjatë qëndrimit në Prishtinë, delegacioni nga Emiratet e Bashkuara Arabe do të takohet me përfaqësues të Kuvendit, Qeverisë dhe organizatave të shoqërisë civile.

Zyra Kombëtare e Auditimit (ZKA) sot bëri prezantimin publik të raportit të performancës  “Korniza Afatmesme e Shpenzimeve 2018–2020 në sektorin e arsimit dhe të infrastrukturës”, ku morën pjesë përfaqësuesit e Ministrisë së Financave, Ministrisë së Arsimit, Shkencës dhe Teknologjisë, Zyrës për Planifikim Strategjik në kuadër të Zyrës së Kryeministrit, Kuvendit të Kosovës, shoqërisë civile dhe mediave. Ndihmës-Auditori i Përgjithshëm, Vlora Spanca, tha se ky raport i auditimit do t’iu shërbejë institucioneve përkatëse që të rrisin llogaridhënien, transparencën, efikasitetin dhe efektivitetin në arritjen e objektivave strategjike përmes një planifikimi të mirëfilltë të aktiviteteve dhe buxhetit. Më tutje Spanca tha se rezultatet e auditimit kanë nxjerrë në pah se procesi i hartimit të Kornizës Afatmesme të Shpenzimeve (KASH) dhe shfrytëzimi i saj është karakterizuar me disa mangësi  të cilat mund të pengojnë arritjen e objektivave dhe prioriteteve strategjike të vendit. “Mangësitë janë që nga planifikimi i projekteve jashtë objektivave strategjike, planifikimi i aktiviteteve jashtë kompetencës dhe përgjegjësisë të ministrive, planifikimi i projekteve duke mos u bazuar në analiza të mirëfillta financiare dhe për pasojë të gjitha këto kanë ndikuar në mosefikasitetin e kryerjes së projekteve të cilat janë me rëndësi për qytetarët”, tha Spanca. Ndërkohë drejtor i Departamentit të Auditimit të Performancës dhe Teknologjisë Informative, Samir Zymberi, tregoi se raporti i auditimit ka mbuluar periudhën e Kornizës Afatmesme të Shpenzimeve për vitin 2018-2020 me fokus viti 2018. Ai tregoi se procesi i auditimit është zhvilluar në Zyrën e  Kryeministrit përkatësisht Zyrën për Planifikim Strategjik, në Ministrinë e Financave, në Ministrinë e Infrastrukturës dhe Transportit si dhe në Ministrinë e Arsimit, Shkencës dhe Teknologjisë. “Objektivë kryesore e këtij auditimi ishte që të vlerësojmë nëse Korniza Afatmesme e Shpenzimeve 2018-2020 reflekton objektivat strategjike dhe nëse ka shërbyer si dokument kryesore për hartimin e buxhetit vjetor. Ndërsa me qëllim të përmirësimit të hartimit të KASH-it vijues ZKA-ja ka dhënë 1 rekomandim për Kuvendin e Kosovës dhe 10 rekomandime për palët e audituara. Prej tyre, 2  rekomandime janë për Zyrën e Kryeministrit, 4 për Ministrinë e Financave dhe 4  rekomandime për Ministrinë e Infrastrukturës dhe për Ministrinë e Arsimit, Shkencës e Teknologjisë”, tha Zymberi. Kurse udhëheqës i ekipit, Labinot Sadiku, në detaje prezantoi gjetjet e këtij auditimi, me ç’rast theksoi se objektivat strategjike në sektorin e arsimit dhe infrastrukturës janë përcjellë më disa mangësi. Ai fillimisht tha se KASH 2018-2020 është aprovuar për sektor dhe jo në nivel ministror dhe sipas Sadikut, kjo e bënë të vështirë ndërlidhjen, vlerësimin dhe mbikëqyrjen e aktiviteteve për organizata. Tutje Sadiku theksoi se Zyra për Planifikim Strategjik në kuadër të Zyrës së Kryeministrit nuk ka bërë përpjekje të mjaftueshme për të monitoruar adresimin e objektivave strategjike.  Kurse Ministria e Infrastrukturës dhe Transportit kërkesat buxhetore nuk i ka hartuar plotësisht sipas udhëzimeve për përgatitjen e KASH. Për më tepër ai shpalosi dobësitë e gjetura në projektet individuale në MIT.  Ndërkaq tri projekte që i takojnë Ministrisë së Arsimit, Shkencës dhe Teknologjisë Sadiku tha se janë vendosur në programin e investimeve publike pa dokumente mbështetëse. Ndërsa anëtarja e ekipit, Arlinda Mustafa-Selmani, tha se planifikimi i buxhetit për objektiva strategjike në MAShT dhe aktivitete të tjera nuk është bërë mbi bazën e analizave të mirëfillta. Ajo tregoi se MAShT-i, ka pasur vonesa në tekstet shkollore, si dhe për hartimin e këtyre teksteve janë shpenzuar 1.9 milionë euro më shumë se sa vlera e planifikuar. Mustafa-Selmani theksoi se si përfundim kjo tregon për një planifikim të paqëndrueshëm për këtë projekt. Nga ana tjetër përfaqësuesit e institucioneve të audituara, kanë shprehur gatishmërinë për t’i zbatuar rekomandimet e dhëna nga Zyra Kombëtare e Auditimit.  

Ju ftojmë të ndiqni tryezën e organizuar nga Zyra Kombëtare e Auditimit (ZKA), ku do të prezantohet raporti i auditimit të performancës “Korniza Afatmesme e Shpenzimeve 2018 – 2020 në sektorin e arsimit dhe të infrastrukturës”.   Tryeza do të mbahet:

Të premten me datën  07 shkurt  2020 në ora 10:00,

në ambientet e Zyrës Kombëtare të Auditimit,

Lagjja Arbëria, Rr. Ahmet Krasniqi, 210

Prishtinë

  Në tryezë janë të ftuar përfaqësues nga Ministria e Financave, Ministria e Arsimit Shkencës dhe Teknologjisë, Ministria e Infrastrukturës dhe Transportit, Zyra për Planifikim Strategjik në kuadër të Zyrës së Kryeministrit, përfaqësues nga Kuvendi i Kosovës, institucionet e arsimit të lartë,  shoqëria civile, mediat e organizatat ndërkombëtare.   Jeni të mirëseardhur.  

Zyra Kombëtare e Auditimit (ZKA) bëri publik raportin e performancës për projektin “Sistemi i Përcaktimit të Tarifave të Energjisë Elektrike, Termike dhe atyre të Ujësjellësit”. Raporti konstaton se pavarësisht progresit të arritur nga rregullatorët në procesin e përcaktimit të tarifave, ka disa mangësi që ndikojnë në saktësinë e tarifave të aprovuara dhe të cilat rrezikojnë që tarifat të mos jenë drejtë të përcaktuara. Po ashtu gjatë procesit të përcaktimit të tarifave, Rregullatorët nuk kanë arritur të sigurojnë transparencë të mjaftueshme si dhe vendosje plotësisht të drejtë dhe të saktë të tarifave. Raporti thekson se Rregullatorët dhe ofruesit e shërbimeve publike nuk kanë zhvilluar një proces të identifikimit të sasisë së konsumuar të shërbimeve nga konsumatorët të cilët janë të liruar nga pagesa e shërbimeve publike për t’u kompensuar nga autoritetet përkatëse. Edhe përcaktimi i kostove operative, kostove kapitale dhe koeficienteve tjerë të rëndësishëm financiarë nuk aprovohet plotësisht bazuar në analiza përkatëse dhe të dokumentuara me sqarime të mjaftueshme dhe të qarta. Parakushtet procedurale dhe teknike gjatë procesit për përcaktimin e tarifave nuk sigurojnë një pjesëmarrje të kënaqshme të qytetarëve dhe shoqërisë civile në aktivitetet e konsultimeve publike, qasje e cila ka rezultuar në një situatë ku konsultimet publike - pjesëmarrja e publikut në përcaktimin e tarifave në përgjithësi, është shumë e kufizuar. Ky auditim kishte për qëllim vlerësimin se sa efektiv është sistemi i përcaktimit të tarifave të shërbimeve publike dhe njëkohësisht të identifikojë boshllëqet dhe vlerësojë nëse procesi i përcaktimit të tarifave për shërbimet publike është bërë sipas kritereve të matshme dhe në përputhje me shpenzimet reale dhe relevante. Zyra Kombëtare e Auditimit i rekomandon autoritetet përgjegjëse që të zhvillojnë tutje dhe të implementojnë drejtë dhe me saktësi metodologjinë për përcaktimin e tarifave duke siguruar se konsumatorët e shërbimeve publike paguajnë tarifa të shërbimeve publike të vendosura saktë dhe drejtë. Raportin e plotë mund ta lexoni në këtë vegëz.

Raporti i auditimit të performancës “Siguria në trafikun rrugor” u prezantua edhe në konferencën e shtatë ndërkombëtare “Sfidat e Mobilitetit në Transport dhe Siguria Publike”. Në konferencën e organizuar nga Kolegji Tempulli dhe Akademia e Kosovës për Siguri Publike u shpalosen arritjet e ngecjet në sigurinë e transportit dhe sigurinë publike në Kosovë si dhe u diskutuan praktikat më të mira nga vendet e tjera. Për gjetjet kryesore të raportit “Siguria në trafikun rrugor” para të pranishmëve prezantoi Labinot Sadiku, udhëheqës i ekipit që realizoi këtë raport të auditimit. Sadiku tha se ky raport ka adresuar çështjet kryesore te cilat ndërlidhen me sigurinë në trafikun rrugor e cila viteve të fundit është mjaftë shqetësuese për pjesëmarrësit në trafik. Bazuar në këtë, ai tregoi se ZKA-ja ka dhënë 24 rekomandime për institucionet e audituara me qëllim të rritjes së sigurisë në trafik. Ndërkohë dekani i Fakultetit të Sigurisë Publike, Bejtush Gashi, tha se siguria publike në përgjithësi dhe ajo rrugore në veçanti vazhdojnë të mbeten ndër problemet kryesore për institucionet shtetërore. Edhe drejtori i Kolegjit të Shkencave të Aplikuara Teknike “Tempulli”, Muhamed Krasniqi, theksoi se siguria e lëvizjes në rrugë është çështje që duhet t’i brengosë institucionet dhe qytetarët.

Komiteti Drejtues i projektit të binjakëzimit “Fuqizimi i mëtejmë i ndikimit të Zyrës Kombëtare të Auditimit të Kosovës” në mes të Zyrës Kombëtare të Auditimit (ZKA) dhe Zyrës Supreme të Auditimit të Polonisë mbajti takimin e dytë të drejtuar nga Zëvendës-Auditori i Përgjithshëm, njëherësh udhëheqës i këtij projekti, Ilir Salihu si dhe drejtuesi i projektit nga Polonia, këshilltari i presidentit të Zyrës Supreme të Auditimit të Polonisë, Wojciech Kutyla. Në këtë takim palët fillimisht diskutuan për raportin e parë tremujor të progresit si dhe për  planin e punës për gjashtëmujorin e ardhshëm, që u prezantuan nga këshilltarja rezidente e projektit të binjakëzimit, Aleksandra Kukula. Më tutje diskutimi u fokusua në ecurinë e zbatimit të projektit i cili ka për qëllim fuqizimin e ndikimit të Zyrës Kombëtare të Auditimit të Kosovës. Projekti shërben për avancimin e metodologjisë së auditimit, rritjen e  cilësisë në auditim dhe fuqizimin e ndikimit të Zyrës Kombëtare të Auditimit, përmes zbatimit të rekomandimeve të auditimit nga subjektet e audituara. Ky projekt financohet nga Bashkimi Evropian dhe zbatohet nga Zyra Supreme e Auditimit të Polonisë.

Zyra Kombëtare e Auditimit (ZKA) bëri publik raportin e performancës “Korniza Afatmesme e Shpenzimeve 2018–2020 në sektorin e arsimit dhe të infrastrukturës”. Raporti konstaton se Korniza Afatmesme e Shpenzimeve (KASH) nuk trajtohet mjaftueshëm për të siguruar planifikime buxhetore në përputhje me prioritetet strategjike. Auditimi vë në pah se planifikimi, zbatimi dhe monitorimi i realizimit të objektivave strategjike nuk është në nivelin e duhur. Kjo ka bërë që të zbehet rëndësia dhe qëllimi që ka Korniza Afatmesme e Shpenzimeve (KASH) në planifikim afatgjatë të objektivave dhe buxhetit. Për rrjedhojë, Korniza Afatmesme e Shpenzimeve nuk është plotësisht në funksion të një planifikimi të qëndrueshëm. Sipas të gjeturave të auditimit, Zyra për Planifikim Strategjik në kuadër të Zyrës së Kryeministrit nuk ka arritur të bëjë bashkërendim të aktiviteteve të saj, monitorim dhe raportim të vazhdueshëm të implementimit të objektivave strategjike në mënyrë që të hartojë një deklaratë të duhur të prioriteteve. Kurse, Ministria e Financave (MF) ka bërë hartimin e Kornizës Afatmesme të Shpenzimeve në mënyrë të përgjithësuar nëpër sektorë por jo edhe sipas organizatave buxhetore, kjo e bënë të vështirë ndërlidhjen, vlerësimin dhe mbikëqyrjen e aktiviteteve për organizata. Ndërsa, Ministria e Infrastrukturës dhe Transportit (MIT) si dhe Ministria e Arsimit Shkencës dhe Teknologjisë (MAShT), nuk kanë arritur të bëjnë planifikim të duhur financiar të projekteve/aktiviteteve dhe realizim të buxhetit për projekte të caktuara duke rrezikuar realizimin e objektivave strategjike qeveritare. Për më shumë, këto dy ministri kishin planifikuar dhe realizuar projekte jashtë objektivave strategjike. Zyra Kombëtare e Auditimit i rekomandon autoritetet përgjegjëse që të sigurojnë hartim dhe miratim të duhur të Kornizës Afatmesme të Shpenzimeve, e cila duhet të shërbej si dokument kyç për planifikimin e aktiviteteve strategjike dhe atyre vjetore. Objektivë e këtij auditimi është vlerësimi nëse procesi i përgatitjes dhe zbatimit të Kornizës Afatmesme të Shpenzimeve (KASH) ka adresuar objektivat strategjike të përcaktuara, për planifikim të mirëfilltë dhe financim të politikave prioritare në vend. Auditimi përfshin periudhën për Kornizën Afatmesme të Shpenzimeve 2018 – 2020 me fokus vitin 2018 ndërsa, për nevoja krahasimore mbulon edhe periudhën e Kornizës Afatmesme të Shpenzimeve 2017–2019. Raportin e plotë mund ta lexoni në këtë vegëz

Auditori i Përgjithshëm i Republikës së Kosovës, Besnik Osmani, sot priti në takim përshendetës drejtorin e projektit të USAID TEAM, Komunat Transparente, Efektive dhe Llogaridhënëse, Stephen Carpenter. Me këtë rast, Auditori i Përgjithshëm, Besnik Osmani, falenderoi z. Carpenter për bashkëpunimin me Zyrën Kombëtare të Auditimit (ZKA) si dhe për kontributin e dhënë gjatë misionit të tij në shtetin e Kosovës. Të dyja palët konsideruan se ky bashkëpunim është i rëndësishëm, ndërsa u theksua se ZKA-ja do të vazhdojë të përfitojë edhe mëtutje nga ky projekt. Takim është realizuar me kërkesë të Stephen Carpenter me rastin e përfundimit të misionit të tij në Kosovë në kuadër të projektit USAID TEAM dhe me qëllim që të njoftohet Auditori i Përgjithshëm me personat përgjegjës që do të pasojnë punën e z. Carpenter dhe do të vazhdojnë zbatimin e projektit.

Auditori i Përgjithshëm i Republikës së Kosovës, Besnik Osmani, sot priti në takim përshendetës drejtorin e projektit të USAID TEAM, Komunat Transparente, Efektive dhe Llogaridhënëse, Stephen Carpenter. Me këtë rast, Auditori i Përgjithshëm, Besnik Osmani, falenderoi z. Carpenter për bashkëpunimin me Zyrën Kombëtare të Auditimit (ZKA) si dhe për kontributin e dhënë gjatë misionit të tij në shtetin e Kosovës. Të dyja palët konsideruan se ky bashkëpunim është i rëndësishëm, ndërsa u theksua se ZKA-ja do të vazhdojë të përfitojë edhe mëtutje nga ky projekt. Takim është realizuar me kërkesë të Stephen Carpenter me rastin e përfundimit të misionit të tij në Kosovë në kuadër të projektit USAID TEAM dhe me qëllim që të njoftohet Auditori i Përgjithshëm me personat përgjegjës që do të pasojnë punën e z. Carpenter dhe do të vazhdojnë zbatimin e projektit.

Zyra Kombëtare e Auditimit (ZKA) sot bëri prezantimin publik të raportit të performancës “Siguria e Ushqimit, rast studimi: produktet e mishit dhe të grurit”, ku morën pjesë përfaqësues nga Agjencia e Ushqimit dhe Veterinarisë, Komuna e Gjilanit, shoqëria civile dhe mediat. Me këtë rast Zëvendës-Auditori i Përgjithshëm, Ilir Salihu, tha se qëllimi i këtij auditimi ka qenë  identifikimi i sfidave në sistemin e sigurisë në tërë zinxhirin ushqimor, si dhe dhënia e rekomandimeve për të përmirësuar sigurinë në ushqim. Salihu tha se mungesa e koordinimit adekuat në mes të institucioneve qendrore dhe lokale po krijon vështirësi në kryerjen e punëve si duhet. Sipas Salihut, një problem tjetër vazhdon të mbetet edhe mostransferimi i inspektorëve nga komunat te Agjencia e Ushqimit dhe Veterinarisë. Ndihmës-Auditori i Përgjithshëm, Vlora Spanca, prezantoi konkluzionet kryesore të këtij raporti, me ç’rast tha se auditimi ka nxjerrë në pah se Agjencia e Ushqimit dhe Veterinarisë (AUV) ende nuk e ka plotësisht funksional sistemin e sigurisë në tërë zinxhirin ushqimor.  Ajo theksoi se po ashtu AUV-i ende nuk ka një regjistër të plotë të kompanive që merren me tregun e produkteve me prejardhje bimore e shtazore dhe kjo e rritë rrezikun që Agjencia të mos ketë shtrirje të kontrollit të saj në tërë tregun për produkte bimore dhe shtazore. “Agjencia e Ushqimit dhe Veterinarisë si organ përgjegjës për të ofruar siguri në ushqim ka hartuar rregullore dhe procedura standarde të operimit dhe listat kontrolluese, të cilat i shfrytëzon për sigurinë e ushqimit. Megjithatë, auditimi ka nxjerrë në pah se këto procedura nuk mbulojnë tërë procesin e sigurisë së ushqimit në treg dhe ato nuk janë duke u zbatuar mjaftueshëm për të siguruar se ushqimi është i kontrolluar si duhet dhe ka siguri për konsumatorin. Listat kontrolluese, të cilat i përdor AUV-i nuk adresojnë të gjitha kërkesat për ushqim si dhe parimet Analizës se Rrezikut dhe Pikave të Kontrollit Kritik i njohur si HACCP”, u shpreh Spanca. Më tutje, Spanca deklaroi se inspektorët komunalë nuk janë transferuar në AUV, si dhe nuk ka koordinim të mirë të kontrolleve në mes nivelit qendror dhe atij lokal. Ndërkohë, Udhëheqësi i Departamentit të Auditimit të Performancës dhe Teknologjisë Informative, Samir Zymberi, tregoi se auditimi ka mbuluar periudhën e vitit 2018 dhe gjashtëmujorin e parë të viti 2019. Zymberi tha se objektivë e këtij auditimi ka qenë që të vlerësohet nëse në institucionet përgjegjëse është vendosur një sistem adekuat për të ofruar siguri në ushqim. “Rezultatet e auditimit tregojnë se përkundër përpjekjeve të Agjencisë së Ushqimit dhe Veterinarisë siguria në ushqim mbetet ende një sfidë e cila kërkon veprime të mëtutjeshme përmirësuese në këtë proces”, theksoi Zymberi.  Ai tregoi se me qëllim të përmirësimit dhe rritjes së sigurisë së ushqimit Zyra Kombëtare e Auditimit ka dhënë 15 rekomandime për Agjencinë e Ushqimit dhe Veterinarisë. Kurse, Udhëheqësja e ekipit, Fexhrie Thaqi, prezantoi para të pranishmëve në detaje të gjeturat e raportit “Siguria e Ushqimit, rast studimi: produktet e mishit dhe të grurit”. Përfaqësuesit e Agjencisë së Ushqimit dhe Veterinarisë, si dhe të Komunës së Gjilanit janë pajtuar me të gjeturat e raportit të auditimit të performancës “Siguria e Ushqimit, rast studimi: produktet e mishit dhe të grurit” si dhe kanë shprehur gatishmërinë për t’i zbatuar rekomandimet e dhëna nga Zyra Kombëtare e Auditimit.

Zyra Kombëtare e Auditimit (ZKA) sot bëri prezantimin publik të raportit të performancës “Siguria e Ushqimit, rast studimi: produktet e mishit dhe të grurit”, ku morën pjesë përfaqësues nga Agjencia e Ushqimit dhe Veterinarisë, Komuna e Gjilanit, shoqëria civile dhe mediat. Me këtë rast Zëvendës-Auditori i Përgjithshëm, Ilir Salihu, tha se qëllimi i këtij auditimi ka qenë  identifikimi i sfidave në sistemin e sigurisë në tërë zinxhirin ushqimor, si dhe dhënia e rekomandimeve për të përmirësuar sigurinë në ushqim. Salihu tha se mungesa e koordinimit adekuat në mes të institucioneve qendrore dhe lokale po krijon vështirësi në kryerjen e punëve si duhet. Sipas Salihut, një problem tjetër vazhdon të mbetet edhe mostransferimi i inspektorëve nga komunat te Agjencia e Ushqimit dhe Veterinarisë. Ndihmës-Auditori i Përgjithshëm, Vlora Spanca, prezantoi konkluzionet kryesore të këtij raporti, me ç’rast tha se auditimi ka nxjerrë në pah se Agjencia e Ushqimit dhe Veterinarisë (AUV) ende nuk e ka plotësisht funksional sistemin e sigurisë në tërë zinxhirin ushqimor.  Ajo theksoi se po ashtu AUV-i ende nuk ka një regjistër të plotë të kompanive që merren me tregun e produkteve me prejardhje bimore e shtazore dhe kjo e rritë rrezikun që Agjencia të mos ketë shtrirje të kontrollit të saj në tërë tregun për produkte bimore dhe shtazore. “Agjencia e Ushqimit dhe Veterinarisë si organ përgjegjës për të ofruar siguri në ushqim ka hartuar rregullore dhe procedura standarde të operimit dhe listat kontrolluese, të cilat i shfrytëzon për sigurinë e ushqimit. Megjithatë, auditimi ka nxjerrë në pah se këto procedura nuk mbulojnë tërë procesin e sigurisë së ushqimit në treg dhe ato nuk janë duke u zbatuar mjaftueshëm për të siguruar se ushqimi është i kontrolluar si duhet dhe ka siguri për konsumatorin. Listat kontrolluese, të cilat i përdor AUV-i nuk adresojnë të gjitha kërkesat për ushqim si dhe parimet Analizës se Rrezikut dhe Pikave të Kontrollit Kritik i njohur si HACCP”, u shpreh Spanca. Më tutje, Spanca deklaroi se inspektorët komunalë nuk janë transferuar në AUV, si dhe nuk ka koordinim të mirë të kontrolleve në mes nivelit qendror dhe atij lokal. Ndërkohë, Udhëheqësi i Departamentit të Auditimit të Performancës dhe Teknologjisë Informative, Samir Zymberi, tregoi se auditimi ka mbuluar periudhën e vitit 2018 dhe gjashtëmujorin e parë të viti 2019. Zymberi tha se objektivë e këtij auditimi ka qenë që të vlerësohet nëse në institucionet përgjegjëse është vendosur një sistem adekuat për të ofruar siguri në ushqim. “Rezultatet e auditimit tregojnë se përkundër përpjekjeve të Agjencisë së Ushqimit dhe Veterinarisë siguria në ushqim mbetet ende një sfidë e cila kërkon veprime të mëtutjeshme përmirësuese në këtë proces”, theksoi Zymberi.  Ai tregoi se me qëllim të përmirësimit dhe rritjes së sigurisë së ushqimit Zyra Kombëtare e Auditimit ka dhënë 15 rekomandime për Agjencinë e Ushqimit dhe Veterinarisë. Kurse, Udhëheqësja e ekipit, Fexhrie Thaqi, prezantoi para të pranishmëve në detaje të gjeturat e raportit “Siguria e Ushqimit, rast studimi: produktet e mishit dhe të grurit”. Përfaqësuesit e Agjencisë së Ushqimit dhe Veterinarisë, si dhe të Komunës së Gjilanit janë pajtuar me të gjeturat e raportit të auditimit të performancës “Siguria e Ushqimit, rast studimi: produktet e mishit dhe të grurit” si dhe kanë shprehur gatishmërinë për t’i zbatuar rekomandimet e dhëna nga Zyra Kombëtare e Auditimit.

Zyra Kombëtare e Auditimit (ZKA) sot bëri prezantimin publik të raportit të performancës “Siguria në trafikun rrugor” ku morën pjesë përfaqësues nga Ministria e Infrastrukturës dhe Transportit, Policia e Kosovës, Komuna e Prishtinës, nga shoqëria civile si dhe profesorë e ekspertë të fushës. Me këtë rast Auditori i Përgjithshëm, Besnik Osmani, tha se realizimi i këtij raporti nga Zyra Kombëtare e Auditimit është në dobi të qytetarëve sepse trajton një prej problemeve kryesore të shoqërisë sonë. Osmani theksoi se raporti “Siguria në trafikun rrugor” synon t’i ndihmojë institucionet që janë përgjegjëse për të përmirësuar situatën në trafik. “Ajo që ka qenë shqetësuese nga të gjeturat e raportit është se kemi koordinimi të pamjaftueshëm të akterëve të cilët do të mundësonin një qasje të mirë organizuar dhe të orientuar në rezultate. Raporti përmban rekomandimet se çka është e rëndësishme të përmirësohet në mënyrë që të minimizohet numri i jetëve të humbura që shkaktohen nga situata kaotike në trafik”, tha Osmani. Ndërkohë, Ndihmës-Auditori i Përgjithshëm, Vlora Spanca, duke prezantuar konkluzionet kryesore të këtij raporti tha se auditimi ka nxjerrë në pah se institucionet përgjegjëse nuk janë efektive dhe nuk po bëjnë sa duhet për të rritur sigurinë në trafik. “Gjetjet e raportit tregojnë se kontrollet policore në trafikun rrugor në rajonin e Prishtinës kanë qenë të mangëta. Nuk ka orientim të kontrolleve policore sipas nevojave dhe rreziqeve, si dhe Sistemi Informativ i Policisë së Kosovës karakterizohet me të dhëna jo të plota dhe jo të sakta. Këto kanë bërë që policia të mos jetë efektive sa i përket rritjes së sigurisë në trafik”, u shpreh Spanca. Po ashtu, Spanca tha se edhe Ministria e Infrastrukturës dhe Transportit nuk ka arritur të implementojë kriteret e rëndësishme të sigurisë rrugore dhe të funksionalizojë Këshillin për Sigurinë në Trafikun Rrugor deri në fund të vitit 2018. Spanca shtoi se edhe Komuna e Prishtinës nuk ka arritur që të sigurojë mirëmbajtje të duhur dhe permanente për të gjitha rrugët, për të cilat është përgjegjëse përfshirë edhe sinjalizimin. Udhëheqësi i Departamentit të Auditimit të Performancës dhe Teknologjisë Informative, Samir Zymberi, tregoi se periudha e auditimit ka përfshirë vitin 2016, 2017 dhe 2018. Zymberi tha se objektivë e këtij auditimit ka qenë që institucionet përgjegjëse, Ministria e Infrastrukturës, Policia e Kosovës dhe Komuna e Prishtinës të bëjnë përpjekjet e duhura për të ofruar siguri në trafikun rrugor. “Rezultatet e auditimit tregojnë se siguria në trafikun rrugor mbetet ende një sfidë për institucionet relevante dhe kërkon veprime të menjëhershme. Bazuar në këtë, ZKA-ja ka dhënë 24 rekomandime për institucionet e audituara me qëllim të rritjes së sigurisë në trafik. Tetë prej këtyre rekomandimeve janë për Policinë e Kosovës, 10 janë për Ministrinë e Infrastrukturës dhe Transportit dhe gjashtë rekomandime janë për Komunën e Prishtinës”, u shpreh Zymberi. Ndërkaq, Udhëheqësi i ekipit, Labinot Sadiku, prezantoi para të pranishmëve në detaje të gjeturat e raportit të performancës “Siguria në trafikun rrugo”. Përfaqësuesit e institucioneve të audituara u pajtuan me të gjeturat e raportit të auditimit të performancës “Siguria në trafikun rrugor”, si dhe kanë shprehur gatishmërinë për t’i zbatuar rekomandimet e dhëna nga Zyra Kombëtare e Auditimit.