Lajmet

Zyra e Kombëtare e Auditimit  ka publikuar raportin e auditimit të pajtueshmërisë dhe performancës “Marrëveshjet për Shërbime të Veçanta  dhe Kontrata Pune për Detyra Specifike”. Përmes këtij auditimi, ne synojmë të promovojmë transparencën dhe rrisim llogaridhënien tek autoritetet përgjegjëse lidhur me menaxhimin e Marrëveshjeve për Shërbime të Veçanta/ Kontratave për Punë Specifike dhe t? ofrojmë rekomandime për përmirësim. Organet e administratës publike për kryer punët në mënyrë më efektive në drejtim të përmbushjes së objektivave institucionale dhe kërkesave të qytetarëve përveç numrit të lejuar të punonjësve, mund të angazhojnë edhe zyrtarë tjerë me Marrëveshje për Shërbime të Veçanta /Kontrata Pune për Detyra Specifike. Angazhimi i zyrtarëve duhet të bëhet në bazë të një planifikimi të mirëfilltë të nevojave si dhe monitorimit të rezultateve. Raporti përmban informata mjaft të rëndësishme për të cilat duhet diskutuar, dhe Zyra Kombëtare e Auditimit ka identifikuar mangësi dhe ka nxjerrë këto konkluzione të përgjithshme: Ministritë dhe Komunat e audituara kishin angazhuar punonjës me Marrëveshje për Shërbime të Veçanta /Kontrata Pune për Detyra Specifike pa ndonjë planifikim të mirëfilltë dhe monitorim lidhur me performancën e tyre. Raportimi për stafin e angazhuar me nuk ishte i plotë dhe i saktë. Angazhimi i punonjësve me marrëveshje/kontrata në 2016 ishte rritur krahasuar me vitin 2015, e me këtë janë rritur edhe kostot e financimit të këtyre marrëveshjeve. Për vitet 2015/2016 vetëm nga institucionet e audituara për këtë lloj marrëveshje janë shpenzuar 3,903,597€. Krahasuar me vitin 2015, shpenzimet për këtë lloj angazhimi në 2016 në nivelin qendror ishin rritur për 55%, ndërsa në nivelin lokal ishin rritur për 76%. Me gjithë zhvillimet në drejtim të një menaxhimi më të mirë të burimeve njerëzore ngecjet janë evidente në zbatimin e Marrëveshje/kontrata pune për detyra specifike. Mos vlerësimi i nevojave, mos planifikimi dhe mos zbatimi i kërkesave ligjore gjatë lidhjes së marrëveshjeve të tilla nuk e kanë siguruar administratën publike që angazhimet e tilla kanë përmirësuar performancën dhe cilësinë e shërbimeve për qytetarët. Ministria e Administratës Publike nuk kishte hartuar legjislacionin sekondar/procedurat për këtë lloj angazhimi. Në mungesë të këtyre procedurave, Organizatat buxhetore kanë lidhur marrëveshje për shërbime të veçanta pa ndonjë kriter apo procedurë unike e cila do të siguronte se menaxhimi i tyre është bërë në pajtim me parimin e transparencës, barazisë dhe konkurrencës. Angazhimi përmes marrëveshjeve në shumicën e rasteve nuk është bërë në pajtueshmëri me kërkesat ligjore. Shumica e të angazhuarve ishin për mbulimin e pozitave të rregullta dhe për shërbimet/punët të cilat duhej t’i kontraktoheshin përmes procedurave të prokurimit e jo për punë  apo detyra specifike. Raportin e plotë mund ta lexoni në ueb faqen tonë: www.zka-rks.org

Sot, në kuadër të vizitës së Presidentit të Zyrës Supreme të Auditimit të Polonisë, në ambientet e Zyrës Kombëtare të Auditimit është lansuar projekti i binajkëzimit “ Zhvillimi i kapaciteteve të Zyrës Kombëtare të Auditimit lidhur me auditimin e Ndërmarrjeve Publike” Ky projekt është mbështetur nga Bashkimi Evropian dhe arrin vlerën prej 200 000 eurove. Me këtë rast, Auditor i Përgjithshëm i Kosovës, z. Besnik Osmani, ka shprehur falënderimin e tij në radhë të parë për Bashkimin Evropian për mbështetjen e vazhdueshme që ka ofruar në zhvillimin e kapaciteteve të Zyrës Kombëtare të Auditimit të Kosovës përmes projekteve të binjakëzimit po ashtu është shprehur shumë i kënaqur që Zyra Supreme e Auditimit të Polonisë do të jetë partnerë në realizimin e këtij projekti, marrë parasysh përvojën dhe kredibilitetin e lartë që gëzon ky institucion. Nga ana e tij, z. Krzysztof Kwiatkowski, President i Zyrës Supreme të Polonisë, është shprehur se institucioni i tij do të angazhohet për të maksimizuar përfitimet që ZKA do të pranojë nga ky projekt. Z. Kwiatkowski,  ka theksuar se për të arritur këtë, ai ka angazhuar dy prej ekspertëve të tij më të mirë si udhëheqës të projektit. Shefi i Sektorit Politik, Ekonomik dhe për Integrime Evropiane, Riccardo Serri, me këtë rast tha: “Jam i lumtur që po e nisim këtë projekt binjakëzimi që i siguron mbështetje Zyrës Kombëtare të Auditimit në Kosovë. Një administratë publike llogaridhënëse, transparente dhe efikase është ajo çfarë kërkon BE-ja dhe për çfarë po përpiqet Kosova.

Auditori i Përgjithshëm i Republikës së Kosovës, z.Besnik Osmani, ka pritur sot në vizitë bilaterale, z. Krzysztof Kwiatkowski, President i Zyrës Supreme të Auditimit të Polonisë, me bashkëpunëtorë. Z. Osmani, i ka njoftuar mysafirët për mandatin kushtetues e ligjor dhe aktivitetet e Zyrës Kombëtare të Auditimit në funksion të rritjes së efikasitetit të administratës publike, menaxhimit të mirë dhe kontrollit në shpenzimin e parasë publike. Ai po ashtu i ka njoftuar mysafirët nga Polonia për pavarësinë institucionale dhe raportet formale me Parlamentin dhe Qeverinë, si partnerët kryesorë të Zyrës Kombëtare të Auditimit si dhe bashkëpunimin e ngushtë me autoritetet e zbatimit të ligjit, me shoqërinë civile dhe mediat me qëllim të rritjes së llogaridhënies në administratën publike të Kosovës. Z. Osmani ka shprehur interesimin e tij për forcimin e bashkëpunimit bilateral dhe shkëmbimin e përvojave me institucionin e auditimit të Polonisë dhe theksoi përkushtimin e Zyrës Kombëtare të Auditimit për zbatimin e suksesshëm të projektit të binjakëzimit që ka për fokus zhvillimin e kapaciteteve profesionale në ZKA për auditimin e Ndërmarrjeve publike, e që do të realizohet me Zyrën Supreme të Auditimit të Polonisë, me përkrahjen financiare të Bashkimit Evropian. Presidenti i Zyrës Supreme të Auditimit të Polonisë, z. Kwiatkowski, shprehu kënaqësinë e tij për vizitën e tij të parë në Kosovë dhe i uroi suksese z.Osmani si Auditori i Përgjithshëm i parë vendor i Republikës së Kosovës. Ai rikonfirmoi interesimin e tij për të vazhduar dhe thelluar edhe më tej bashkëpunimin me Zyrën Kombëtare të Auditimit të Kosovës dhe shprehu kënaqësinë që ky bashkëpunim po konkretizohet përmes një projekti të binjakëzimit, përmes të cilit të dy institucionet mund të mësojnë shumë nga përvojat reciproke me adutimin e Ndërmarrjeve publike. Z. Kwiatkowski  ofroi mbështetjen e plotë të Zyres Supreme të Auditimit të Polonisë për shkëmbime profesionale edhe në fusha të tjera të auditimit. Bashkëbiseduesit diskutuan edhe për tema të tjera me interes të përbashkët dhe theksuan rëndësinë e zbatimit të standardeve ndërkombëtare të auditimit dhe bashkëpunimin me organizatat ndërkombëtare profesionale të auditimit, në të cilat synohet integrimi edhe i Zyrës Kombëtare të Auditimit të Republikës së Kosovës.

Me datë 8 dhe 9 Nëntor 2017, në Luxemburg, Zyra Kombëtare e Auditimit të Kosovës e përfaqësuar nga auditorët e performancës Drilon Shala dhe Labinot Sadiku mori pjesë në takimin e auditimit të përbashkët evropian “Cilësia e Ajrit” i iniciuar nga EUROSAI dhe i udhëhequr nga Institucioni Suprem i Auditimit (SAI) i Holandës dhe Polonisë. Takimi është  mbajtur në premisat e Gjykatës Evropiane të Auditorëve dhe pjesëmarrës ishin SAI i Polonisë, Holandës, Shqipërisë, Kosovës, Bullgarisë, Estonisë, Hungarisë, Izraelit, Maqedonisë, Moldavisë, Rumanisë, Sllovakisë, Spanjës dhe Zvicrës. Shtet pjesëmarrës në rolin e vëzhguesit ishte edhe SAI i Çekisë. Qëllimi kryesor i këtij takimi ishte vlerësimi i masave të ndërmarra nga shtetet pjesëmarrëse për të adresuar problemin e ndotjes së ajrit. Me fokus janë diskutuar çështjet që kanë të bëjnë me kornizën legjislative, institucionale si dhe monitorimin, zbatimin dhe raportimin e gjendjes së cilësisë së ajrit. Po ashtu, janë diskutuar çështje, si: Analiza kosto – përfitim e politikave mjedisore dhe veçanërisht të cilësisë së ajrit, përzgjedhja e lokacioneve në të cilat janë vendosur stacionet e monitorimit të cilësisë së ajrit, si dhe afatet dhe struktura që çdo SAI do të ndjek për të përgatitur raportin e auditimit të cilat më pastaj do të integrohen në raportin e përbashkët të këtij auditimi. Raportet individuale të auditimit ashtu si edhe “Raporti i Përbashkët” do të theksojnë rëndësinë e problemit të ndotjes së ajrit dhe do i sigurojnë vendimmarrësve një burim të përdorshëm se si ta bëjnë më efektiv sistemin për përmirësimin e cilësisë së ajrit. Rekomandimet nga auditimi i përbashkët i “Cilësisë së ajrit” do t’i adresohen edhe disa institucioneve të rëndësishme si Komisionit Evropian, Agjencisë Evropiane të Mjedisit etj. Duke e ditur rëndësinë që cilësia e ajrit ka për shëndetin publik, Zyra Kombëtare e Auditimit mbetet e përkushtuar që të përkrah auditimet e kësaj fushe me qëllim që të rris llogaridhënien dhe transparencën lidhur me programet qeveritare në përmirësimin e cilësisë së ajrit dhe mjedisit në Kosovë.

Me datë 8 dhe 9 Nëntor 2017, në Luxemburg, Zyra Kombëtare e Auditimit të Kosovës e përfaqësuar nga auditorët e performancës Drilon Shala dhe Labinot Sadiku mori pjesë në takimin e auditimit të përbashkët evropian “Cilësia e Ajrit” i iniciuar nga EUROSAI dhe i udhëhequr nga Institucioni Suprem i Auditimit (SAI) i Holandës dhe Polonisë. Takimi është  mbajtur në premisat e Gjykatës Evropiane të Auditorëve dhe pjesëmarrës ishin SAI i Polonisë, Holandës, Shqipërisë, Kosovës, Bullgarisë, Estonisë, Hungarisë, Izraelit, Maqedonisë, Moldavisë, Rumanisë, Sllovakisë, Spanjës dhe Zvicrës. Shtet pjesëmarrës në rolin e vëzhguesit ishte edhe SAI i Çekisë. Qëllimi kryesor i këtij takimi ishte vlerësimi i masave të ndërmarra nga shtetet pjesëmarrëse për të adresuar problemin e ndotjes së ajrit. Me fokus janë diskutuar çështjet që kanë të bëjnë me kornizën legjislative, institucionale si dhe monitorimin, zbatimin dhe raportimin e gjendjes së cilësisë së ajrit. Po ashtu, janë diskutuar çështje, si: Analiza kosto – përfitim e politikave mjedisore dhe veçanërisht të cilësisë së ajrit, përzgjedhja e lokacioneve në të cilat janë vendosur stacionet e monitorimit të cilësisë së ajrit, si dhe afatet dhe struktura që çdo SAI do të ndjek për të përgatitur raportin e auditimit të cilat më pastaj do të integrohen në raportin e përbashkët të këtij auditimi. Raportet individuale të auditimit ashtu si edhe “Raporti i Përbashkët” do të theksojnë rëndësinë e problemit të ndotjes së ajrit dhe do i sigurojnë vendimmarrësve një burim të përdorshëm se si ta bëjnë më efektiv sistemin për përmirësimin e cilësisë së ajrit. Rekomandimet nga auditimi i përbashkët i “Cilësisë së ajrit” do t’i adresohen edhe disa institucioneve të rëndësishme si Komisionit Evropian, Agjencisë Evropiane të Mjedisit etj. Duke e ditur rëndësinë që cilësia e ajrit ka për shëndetin publik, Zyra Kombëtare e Auditimit mbetet e përkushtuar që të përkrah auditimet e kësaj fushe me qëllim që të rris llogaridhënien dhe transparencën lidhur me programet qeveritare në përmirësimin e cilësisë së ajrit dhe mjedisit në Kosovë.

Me kërkesën e Auditorit të Përgjithshëm, z. Besnik Osmani sot në ambientet e Qeverisë është realizuar takimi me Kryeministrin e Republikës së Kosovës z. Ramush Haradinaj. Në këtë takim, z. Osmani ka informuar Kryeministrin Haradinaj për punën e Auditorit të Përgjithshëm, si institucion suprem i kontrollit ekonomik dhe financiar në Republikën e Kosovës. Auditori i Përgjithshëm ka theksuar përkushtimin e tij dhe të auditorëve të Zyrës Kombëtare të Auditimit për të përmbushur mandatin kushtetues e ligjor, në funksion të përmirësimit të vazhdueshëm të qeverisjes e të llogaridhënies në institucionet publike të Kosovës në menaxhimin e fondeve publike si dhe të përmirësimit të shërbimit ndaj qytetarëve. Auditori i Përgjithshëm ka prezantuar çështjet kryesore lidhur me pasqyrat vjetore financiare dhe dobësitë e evidentuara në lidhje me pajtushmërinë e vendimeve dhe veprimeve të zyrtarëve publik në raport me legjislacionin përkatës. Rekomandimet e dala nga raportet e auditimit të Zyrës Kombëtare të Auditimit vënë  theksin në çështje të rëndësishme që kanë të bëjmë me menaxhimin e pasurisë jofinanciare, menaxhimin e prokurimit publik, menaxhimin e llogarive të arkëtushme dhe të obligimeve, theksoi Auditori i Përgjithshëm. Z. Osmani e ka njoftuar Kryeministrin edhe me auditimet e performancës si vlerësim i arritjes së vlerës për para nga përdorimi i fondeve publike dhe theksoi rëndësinë që të përmirësohet edhe më tej efikasiteti dhe efektiviteti në shpenzimin e parasë publike. Gjatë bashkëbisedimit, vëmendje e veçantë i është kushtuar nivelit të ulët të zbatimit të rekomandimeve dhe mungesës së një plani sistematik për adresimin e tyre, nga ana e organizatave buxhetore. Auditori i Përgjithshëm, i ka rekomanduar Kryeministrit Haradinaj që Qeveria të aplikoj një proces sistematik të monitorimit të zbatimit të rekomandimeve të dhëna në raportet e auditimit dhe të kërkojë nga organet e Qeverisë që të zbatojnë dhe raportojnë mbi progresin e arritur. Kryeministri Haradinaj ka vlerësuar punën e Auditorit të Përgjithshëm dhe të Zyrës Kombëtare të Auditimit dhe ka shprehur interesimin e tij për një komunikim më proaktiv ndërinstitucional për të reaguar në kohën e duhur për mbarëvajtjen e proceseve dhe përmirësimin e qeverisjes. Ai ka shprehur gatishmërinë dhe përkushtimin e Qeverisë për të ruajtur pavarësinë institucionale të Zyres Kombëtare të Auditimit dhe ka theksuar zotimin e tij për zbatimin e rekomandimeve të Auditorit në mënyrë që të forcohet kontrolli i brendshëm dhe të përmirësohet qeverisja në institucionet publike.  

Me ftesë të homologut të tij, Auditorit të Përgjithshëm të Uellsit, Auditori i Përgjithshëm i Republikës së Kosovës z.Besnik Osmani, ka qëndruar për një vizitë zyrtare në Zyrën e Auditimit të Uellsit të Mbretërisë së Bashkuar. Kjo vizitë u zhvillua në kuadër të bashkëpunimit bilateral që Zyra Kombëtare e Auditimit të Kosovës ka me Zyrën e Auditimit të Uellsit të Mbretërisë së Bashkuar. Gjatë qëndrimit në Uells, më 7 e 8 nëntor 2017, z. Osmani ka takuar Auditorin e Përgjithshëm të Uellsit, z. Huw Vaughan Thomas dhe zyrtarë të tjerë dhe auditorë të Zyrës së Auditimit të Uellsit me të cilët ka biseduar për aktivitetet konkrete në kuadër të realizimit të marrëveshjes së bashkëpunimit që ishte nënshkruar në mes të dyja institucioneve supreme të auditimit, në maj të këtij viti në Prishtinë. Bashkëbiseduesit u pajtuan që bashkëpunimi në fusha të ndryshme të auditimit të vazhdoj me qëllim të shkëmbimit të informatave, përvojave dhe praktikave të mira në interes të ngritjes së nivelit të cilësisë së auditimit të jashtëm në të dyja vendet. Gjatë vizitës së tij në Uells, Auditori i Përgjithshëm u takua edhe me zyrtarë të lartë të Qeverisë së Uellsit dhe të qytetit të Kardifit, z.David Richards, drejtor për qeverisje si dhe z.Paul Orders, shef ekzekutiv i Këshillit të qytetit të Kardifit, me të cilët bisedoi për marrëdhëniet ndërinstitucionale me Zyren e Auditimit të Uellsit si dhe zbatimin e rekomandimeve të auditimit. Në kuadër të kësaj vizite, z. Osmani ka zhvilluar takime pune edhe me drejtuesit e Zyres Kombëtare të Auditimit të Mbretërisë së Bashkuar, në Londër, si dhe ka takuar deputeten e Parlamentit Britanez, znj. Rt Hon Margaret Hodge dhe përfaqësues të Universitetit të Kembrixhit.

Auditori i Përgjithshëm i Republikës së Kosovës z. Besnik Osmani dhe Rektori i Universitetit të Prishtinës z. Marjan Dema janë takuar sot dhe kanë biseduar lidhur me aktivitetet konkrete të bashkëpunimit. Me këtë rast, është nënshkruar Marrëveshja e Bashkëpunimit në mes të dy institucioneve përmes së cilës janë përcaktuar fushat konkrete që kanë të bëjnë me shkëmbimet e ndihmës profesionale dhe akademike si dhe të angazhimit në punë praktike të studentëve të nivelit master të Universitetit të Prishtinës në Zyrën Kombëtare të Auditimit. Auditori i Përgjithshëm, Besnik Osmani tha se e vlerëson lartë bashkëpunimin me Universitetin e Prishtinës dhe se ky bashkëpunim profesional është shumë i rëndësishëm për faktin që na mundësohet të praktikojmë edukimin e vazhdueshëm për personelin tonë përmes aktiviteteve arsimore, programeve të trajnimit dhe shkëmbimit të njohurive, në disa fusha që kanë të bëjnë me politikat publike, administratën publike e veçmas në fushën e kontabilitetit dhe auditimit. Nga ana e tij, rektori Dema tha se nënshkrimi i kësaj marrëveshje të bashkëpunimit me Zyrën Kombëtare të Auditimit është një akt shumë i rëndësishëm për UP-në, meqë me këtë do përfitojnë më së shumti studentët tanë. Dema në këtë takim foli edhe për punën që ky menaxhment është duke bërë duke krijuar standarde transparente në UP, në mënyrë që të krijohet një ambient edhe më cilësor për studim. Marrëveshja e nënshkruar sot, parasheh që të dy institucionet t’i ofrojnë ndihmë reciproke profesionale njëra-tjetrës për realizimin e konferencave, seminareve sidomos në fushën e auditimeve të përformancës dhe synon animimin e opinionit publik lidhur me rëndësinë e auditimeve dhe përfitimet e institucioneve dhe publikut nga raportet e Zyrës Kombëtare të Auditimit. Për zbatimin e kësaj Marrëveshjeje, ditët një vijim do të hartohet plani i veprimit dhe do të filloj zbatimi praktik i Marrëveshjes.  

Auditor i Përgjithshëm i Kosovës, z. Besnik Osmani, sot ka paraqitur para Kuvendit të Republikës së Kosovës, Raportin Vjetor të Auditimit për vitin fiskal 2016. Raporti Vjetor i Auditimit për vitin fiskal 2016, përmban gjetjet dhe rekomandimet kryesore për buxhetin e shtetit për këtë vit. Të dhënat e prezantuara në raport janë të bazuara në raportet e auditimit për 92 organizata buxhetore, 4 ndërmarrje publike, 2 projekte të donatorëve dhe 7 auditime të performancës. Opinioni i auditimit për Raportin Financiar Vjetor të Buxhetit të Republikës së Kosovës (RFV/BRK) është “Opinion i pamodifikuar me theksim të çështjes”, dhe paraqet një pamje të drejtë dhe të vërtetë në të gjitha aspektet materiale për vitin e përfunduar me 31 dhjetor 2016, në përputhje me SNKSP dhe Ligjin për Menaxhimin e Financave Publike dhe Përgjegjësitë. Theksim i çështjes vije për faktin se nuk është bërë shpalosje adekuate e informatave sa i përket shënimeve shpjeguese. Auditori i Përgjithshëm i Kosovës, z Besnik Osmani, në fjalën e tij para deputetëve ka theksuar se shkalla e zbatimit të rekomandimeve të dhëna në raportin e auditimit të vitit paraprak, nuk është e kënaqshme. “Në raportet individuale të auditimit kemi dhënë mbi 1,300 rekomandime nga të cilat mbi 900 me prioritet të lartë dhe 400 me prioritet të mesëm. Krahasuar me vitin 2015, në vitin 2016 numri i rekomandimeve të dhëna është rritur për 13%. Në vitin 2015 janë zbatuar më pak rekomandime se sa në vitin paraprak. Vetëm ¼ apo rreth 26% janë zbatuar plotësisht, 36% pjesërisht dhe 38% nuk janë zbatuar fare.” – tha ai. Gjithashtu ka vënë në pah disa nga gjetjet kryesore të fushave me rëndësi të shpalosura në raport si: menaxhimi i prokurimit publik, menaxhimi i pasurive publike, obligimet e papaguara, llogaritë e arkëtueshme, ekzekutimi i detyrueshëm i pagesave, Ndërmarrjet Publike, si dhe fushat me rëndësi të veçantë nga auditimet e performancës. Auditori i Përgjithshëm, ka kërkuar nga Qeveria, që të aprovojë dhe zbatojë planin e veprimit për adresim të rekomandimeve të dhëna në raport. Në fund të fjalës së tij, z. Osmani, ka ftuar Kuvendin dhe Qeverinë që të përmbushin rolin e tyre në rritjen e llogaridhënies nga organizatat buxhetore dhe përmirësimin e gjendjes në zbatimin e rekomandimeve të auditimit.  

Presidenti i Republikës së Kosovës, Hashim Thaçi ka pritur sot Auditorin e Përgjithshëm të Kosovës, z. Besnik Osmani, të cilit i ka dhënë mbështetje për punën dhe aktivitetet e Auditorit të Përgjithshëm. Presidenti Thaçi ka thënë se Auditori i Përgjithshëm me punën e tij është duke forcuar llogaridhënien duke rritur besimin në institucionet publike. “Ju përgëzoj për përkushtimin, profesionalizimin dhe pavarësinë e institucionit tuaj”, ka theksuar Presidenti. Nga ana tjetër, Besnik Osmani ka thënë se Zyra Kombëtare e Auditimit do të vazhdojë të bëjë auditimin e detyrueshëm të rregullsisë për Buxhetin e Qeverisë së Kosovës si dhe auditime tjera. Presidenti ka thënë se Kosova duhet të vazhdojë përpjekjet maksimale për transparencë Lajmi është marrë nga uebfaqja e Zyrës së Presidentit : http://bit.ly/2yECPE9  

Me datë 18 tetor 2017, në Tiranë, Auditori i Përgjithshëm i Kosovës, Besnik Osmani i shoqëruar nga Ndihmës Auditorja e Përgjithshme, Vlora Spanca, morën pjesë në takimin e 15^-të  të grupit punues të EUROSAI-t për Auditimet e Mjedisit (WGEA), organizuar nga Kontrolli Lartë i Shtetit të Shqipërisë. Temat kryesore të aktivitetit ishin “Auditimi i përdorimit të tokës dhe zhvillimi” dhe “Si mund të përdoren të dhënat në auditimet e mjedisit?”. Në këtë takim morën pjesë rreth 75 përfaqësues nga 26 Institucione Supreme të Auditimit. Ky grup pune ka në përbërjen e tij 42 anëtare dhe është krijuar ne vitin 1999 në Kongresin e IV-t të EUROSAI-t. Qëllimi i këtij grupi është promovimi i frymës së bashkëpunimit bazuar në integritet, komunikim të hapur dhe përsosmëri profesionale. Kjo synohet të arrihet nëpërmjet inkurajimit dhe mbështetjes së bashkëpunimit profesional dhe shkëmbimit të eksperiencës së mirë midis SAI-ve. Zyra Kombëtare e Auditimit, është ftuar t’i bashkohet këtij grupi në vitin e kaluar në takimin e mbajtur në Shkup të Maqedonisë. Aktualisht, ZKA është e angazhuar në auditimin përbashkët të performancës mbi ‘Cilësinë e ajrit’. Në kuadër të këtij takimi është mbajtur edhe seminari trajnues i dedikuar për të Dhënat dhe Analizat në Auditimin e Mjedisit, i cili është ndjekur nga dy auditorë të ZKA-së të përfshirë në auditimin e përbashkët për cilësinë e ajrit.   Diskutimi dhe shembujt e prezantuar gjatë punimeve shërbyen si një platformë e shkëlqyer për shkëmbimin e eksperiencave të përfaqësuesve të SAI-ve pjesëmarrëse në nxjerrjen e të dhënave, përpunimin e tyre dhe përdorimin e burimeve inovative të të dhënave.

Auditor i Përgjithshëm i Kosovës, z. Besnik Osmani, ka pritur sot në takim, Shkëlqesinë e tij z. Ruari O’Connell, ambasador i Britanisë së Madhe në Kosovë. Auditori i Përgjithshëm, ka informuar ambasadorin O’Connell me objektivat strategjike të Zyrës Kombëtare të Auditimit si dhe aktivitetet audituese për sezonën 2017/2018. Me këtë rast z. Osmani theksoi marrëdhëniet shumë të mira që Zyra Kombëtare e Auditmit të Kosovës ka me Zyrën Kombëtare të Auditimit të Britanisë së Madhe dhe shprehi interesimin e tij që bashkëpunimi ndërmjet këtyre dy institucioneve të intensifikohet edhe më shumë përmes projekteve të veçanta për shkëmbim të përvojave dhe praktikave të mira në auditim. Ambasadori O’Connell nga ana tij tha:  “E përgëzoj Zyrën e Auditorit të Përgjithshëm të Kosovës për  punën e mirë,  e cila konfirmohet edhe në Raportin e BE-së për Kosovën. Ne i inkurajojmë të vazhdojnë me punën e mirë dhe në të njëjtën kohë i bëjmë thirrje Kuvendit të Kosovës që të analizojë me vëmendje rekomandimet e këtyre raporteve.  Adresimi i raportit të auditimit është pjesë themelore e demokracisë dhe llogaridhënies. Prandaj, inkurajojmë Kuvendin të kërkoj përgjegjësi dhe llogaridhënie nga institucionet për çështje të ngritura në raportet e Auditorit të Përgjithshëm.” Gjatë takimit nga të dyja palët u theksua rëndësia e auditimit të jashtëm,  në veçanti ndikimi që ka në përmirësimin e vazhdueshëm në menaxhimin e mirë të financave publike, rritjen e transparencës në administratë publike dhe rritjen e cilësisë së shërbimeve për qytetarët. Ambasadori O’Connell takoi edhe grupin menaxhues dhe auditues senior në ZKA, ku është njoftuar më për së afërmi me objektivat dhe qasjen në auditim si dhe ka bashkëbiseduar me ta lidhur me rëndësinë që ka institucioni suprem i auditimit dhe puna audituese për një vend në zhvillim siç është Kosova.