Lajmet

Me datën, 11 Maj 2017, në ambientet e Zyrës Kombëtare të Auditimit, Departamenti i Auditimit të Performancës ka organizuar tryezë pune lidhur me temën" Funksionimi i sistemit të menaxhimit të performancës në komuna". Në këtë tryezë, pjesëmarrës ishin përfaqësues nga Ministria e Administrimit të Pushtetit Lokal, përfaqësues nga komunat dhe përfaqësues nga projekti për Decentralizim dhe Përkrahje Komunave (DEMOS). MAPL në bashkëpunim me donator ndërkombëtarë ka zhvilluar Sistemin për Menaxhimin e Performancës së Shërbimeve Komunale. Matja e performancës së komunave ka për qëllim që vetë komunat, MAPL, qytetarët dhe të gjitha palët e interesit ta kuptojnë se deri në çfarë shkallë komunat kanë arritur të ofrojnë shërbime në kohën dhe cilësinë e duhur, në funksion të përmirësimit të jetës së qytetarëve. Diskutimi kryesisht është fokusuar në sfidat që komunat hasin gjatë punës me këtë sistem dhe rritja e performancës përmes menaxhimit më të mirë të këtij sistemi. E tërë kjo do të shërbejë për qëllime të auditimit, njëkohësisht duam të nxisim edhe komunikimin e drejtpërdrejtë midis palëve të përfshira në procesin auditues.

Sot, me 10 maj 2017, Auditor i Përgjithshëm i Kosovës, Besnik Osmani,  ka pritur për vizitë bilaterale Auditorin e Përgjithshëm të Uellsit (Britani e Madhe), z. Huw Vaughan Thomas, i shoqëruar nga John Herniman, Drejtor në Zyrën e Auditimit të Uellsit dhe Dr. Clive Grace O.B.E., Këshilltar Ndërkombëtar në Shërbime Publike. Gjatë kësaj vizite, z. Osmani dhe z. Thomas kanë nënshkruar marrëveshjen e bashkëpunimit në mes të Zyrës Kombëtare të Auditimit të Republikës së Kosovës dhe Zyrës së Auditimit të Uellsit, përmes së cilës janë pajtuar për bashkëpunim bilateral. Në fokus të kësaj marrëveshjeje do të jetë zbatimi i plotë i standardeve ndërkombëtare të auditimit në sektorit publik dhe praktikave të mira ndërkombëtare dhe shkëmbimi i përvojave në zhvillimin e institucioneve përkatëse, duke përfshirë zhvillimin e auditimit të performancës, shkëmbimin e praktikave të mira dhe aktivitetet kundër mashtrimit. Gjatë takimit të zhvilluar pas ceremonisë së nënshkrimit të marrëveshjes, z. Osmani dhe z. Thomas kanë biseduar lidhur me trendet aktuale të zhvillimit në auditimin publik dhe praktikat dhe përvojat nga të dyja institucionet. Krerët e të dyja institucioneve janë shprehur të kënaqur me mundësitë për shkëmbim të praktikave të mira, informacioneve dhe materialeve intelektuale me interes të përbashkët. Z. Thomas bashkë me delegacionin e tij, gjatë ditës kanë zhvilluar takime edhe me përfaqësues të Kuvendit dhe të Qeverisë  së Republikës së Kosovës.

Auditori i Përgjithshëm i Republikës së Kosovës, Besnik Osmani, i shoqëruar nga bashkëpunëtorët kanë zhvilluar një vizitë pune në selinë kryesore të Zyrës Kombëtare të Auditimit të Suedisë, në Stokholm. Gjatë kësaj vizite, e cila u zhvillua në kuadër të bashkëpunimit bilateral në mes të Zyrës Kombëtare të Auditimit të Suedisë dhe të Kosovës, Auditori i Përgjithshëm, z. Osmani ka takuar Auditoren e Përgjithshme të Suedisë znj. Helena Lindberg, Zëvendës Auditorin e Përgjithshëm z. Magnus Lindell dhe zyrtarë të tjerë të Zyrës Kombëtare të Auditimit të Suedisë, me të cilët ka biseduar për thellimin e bashkëpunimit bilateral në mes të dy institucioneve. Z. Osmani e ka uruar homologen e tij për marrjen e detyrës së re dhe e ka njoftuar me aktivitetet aktuale, sfidat organizative dhe orientimet strategjike të Zyrës Kombëtare të Auditimit. Ai e ka falënderuar znj. Lindberg për përkrahjen që ka ofruar institucioni suprem i auditimit suedez për Zyrën Kombëtare të Auditimit dhe ka shprehur interesimin e tij për vazhdimin e bashkëpunimit bilateral. Z. Osmani ka theksuar veçanërisht përkrahjen që ka ofruar partneri suedez për përfshirjen e Zyrës Kombëtare të Auditimit në aktivitetet e institucioneve supreme të auditimit në nivelin regjional e ndërkombëtar që ka mundësuar pjesëmarrjen aktive të ZKA-së në ngjarjet më të rëndësishme globale në fushën e auditimit. Drejtuesit e Zyrës Kombëtare të Auditimit të Suedisë rikonfirmuan gatishmërinë për të ofruar përkrahjen e tyre për zhvillimin e mëtejshëm të kapaciteteve të Zyrës Kombëtare të Auditimit të Kosovës si në sferën e auditimeve të rregullsisë dhe të performancës ashtu edhe në atë të planifikimit strategjik dhe të lidershipit. Marrëveshja aktuale në mes të Zyrës Kombëtare të Auditimit të Kosovës dhe Suedisë përfundon në qershor të këtij viti, ndërkohë që është në përgatitje marrëveshja e re tri vjeçare e bashkëpunimit bilateral e cila pritet të nënshkruhet në Prishtinë, në qershor 2017.

Zyra Kombëtare e Auditimit në bashkëpunim me Fakultetin Ekonomik të Universitetit "Hasan Prishtina", ka mbajtur tryezën "Fuqizimi i Auditimit të Jashtëm përmes bashkëpunimit të Zyrës Kombëtare të Auditimit me organizatat e shoqërisë civile". Punimet e tryezës u hapën nga Auditori i Përgjithshëm, Besnik Osmani dhe Dekani i Fakultetit Ekonomik, But Dedaj. Auditori i Përgjithshëm, Besnik Osmani, në fjalën e tij ka theksuar gatishmërinë dhe dëshirën e Zyrës Kombëtare të Auditimit për të thelluar bashkëpunimin me shoqërinë civile, institucionet akademike dhe median. Përmes kësaj tryeze ne dëshirojmë të vendosim një komunikim të rregullt me këto organizata, me qëllim krijimin i një forumi konsultativ për të koordinuar bashkëpunimin dhe fuqizuar më shumë transparencën dhe llogaridhënien në Kosovë, ka thënë ai. Roli i organizatave të shoqërisë civile në fuqizimin e institucioneve të pavarura është shumë i rëndësishëm në shoqëritë demokratike, prandaj, z. Osmani i ka ftuar ato që në të ardhmen të bëjnë vlerësime të integritetit të ZKA-së dhe bashkërisht të krijohet një traditë e takimeve të rregullta dhe të krijohet një axhendë e shqyrtimit të raporteve të auditimit. Po ashtu Z. Osmani ka theksuar edhe nevojën e krijimit të një projekti të përbashkët për edukimin e publikut lidhur me rëndësinë e auditimit të jashtëm. Folëse tematike në tryezë ishte Dr. Nazia Mintz-Habib, Drejtore e kërkimeve në Qendrën për fuqitë në rritje të Universitetit të Kembrixhit në Angli e cila foli për vlerat dhe përfitimet e participimit publik: praktikat më të mira të bashkëpunimit në mes të institucioneve supreme të auditimit dhe organizatave të shoqërisë civile. Në vazhdim është  zhvilluar debat i hapur në panel dhe me pjesëmarrësit. Panelistë të tryezës ishin Luljeta Nano, Sekretare e përgjithshme e KLSH; Prof. Dr. Edmond Hajrizi, Rektor i UBT; Artan Canhasi, Menaxher i programit, KDI; Faik ISpahiu, Drejtor ekzekutiv i Internews Kosova dhe Ardiana Bunjaku, Drejtore ekzekutive e SHKÇAK Pjesëmarrësit kanë vlerësuar iniciativën dhe kanë shprehur gatishmërinë për të shtyrë tutje këtë axhendë. U theksua e nevojshme të intensifikimi i bashkëpunimit, qoftë në fushën e edukimit dhe trajnimit por edhe në rritjen e aktivitetit të përbashkët për të ndikuar në përmirësimin e administratës publike dhe shërbimit ndaj qytetarëve. Në këtë tryezë morën pjesë edhe përfaqësues tjerë nga Kontrolli i Lartë i shtetit të Republikës së Shqipërisë,  të organizatave të shoqërisë civile  - aktivitetet e të cilave ndërlidhen me veprimtarinë e ZKA-së, shoqatat profesionale që ofrojnë programe edukimi dhe kualifikimi për auditorë dhe kontabilistë, institucionet akademike (kolegje publike dhe private) dhe media.

Sot, me 5 prill 2017, në Zyrën Kombëtare të Auditimit, është mbajtur trajnimi  për Prokurorët e rinj të emëruar nga Presidenti i Republikës së Kosovës në dhjetor 2016, qëllimi i të cilit është njohja më për së afërmi me rolin, mandatin dhe procesin auditues të Zyrës Kombëtare të Auditimit. Me këtë rast Auditori i Përgjithshëm, Besnik Osmani, i ka përshëndetur ata dhe ju ka dëshiruar punë të mbarë në detyrën e re. Përveç prezantimeve nga Departamenti Ligjor për Auditim, gjatë trajnimit është planifikuar edhe një diskutim i hapur i prokurorëve të rinj dhe stafit të ZKA-së lidhur me punën audituese dhe legjislacionin penal si dhe bashkëpunimi me organizatat e drejtësisë.

Me datë 15 mars 2017, Auditori i Përgjithshëm,  Besnik Osmani, ka zhvilluar vizitë bilaterale në Institucionin Shtetëror të Auditimit të Malit të Zi. Z. Osmani gjatë kësaj vizite ka zhvilluar takim me z. Milan Dabovic, President i Senatit dhe Nikola N. Kovacevic, Branislav Radulovic dhe Zoran Jelic anëtarë të Senatit të këtij institucioni. Në këtë takim z. Dabovic e ka njoftuar z. Osmani për kompetencat e Institucionit Shtetëror të Auditimit të Malit të Zi, dokumentet strategjike dhe bashkëpunimin që ky institucion ka me Parlamentin dhe Qeverinë e Malit të Zi. Nga ana e tij, z. Osmani, ka shprehur vlerësimin për punën dhe arritjet e këtij institucioni dhe ka konfirmuar edhe një herë gatishmërinë dhe interesimin që bashkëpunimi ndërmjet të dyja institucioneve të thellohet tutje siç ishte biseduar gjatë vizitës së z. Dabovic, në qershor të vitit të kaluar në Prishtinë. Krerët e të dyja institucioneve kanë arritur në pajtim të plotë  për fushat, oraret dhe çështjet tjera të bashkëpunimit bilateral ndërmjet Institucionit Shtetëror të Auditimit të Malit të Zi dhe Zyrës Kombëtare të Auditimit të Kosovës.

Gjatë qëndrimit në Podgoricë, Auditori i Përgjithshëm ka zhvilluar takime me kryetarin e komisionit parlamentar për ekonomi, financa dhe buxhet të Malit të Zi, Vujica Lazovic, dhe anëtarë tjerë, si dhe Drejtoren e përgjithshme të Drejtorisë për Harmonizimin Qendror të Kontrollit të Brendshëm, në Ministrinë e Financave, znj. Ana Krsmanovic.

Bashkë me Auditorin e Përgjithshëm në këtë vizitë ishin edhe Imri Semetishti, Drejtor i Departamentit Ligjor dhe Mirlinda Ahmeti, Drejtore për Auditimet e Performancës në Zyrën Kombëtare të Auditimit.

Zyra Kombëtare e Auditimit ka publikuar raportin e auditimit të performancës me titull "Procesi i rishikimit të teksteve shkollore". Arsimi cilësor është e vetmja mënyrë për të rritur mundësitë e nxënësve për arsimim të mëtejshëm dhe për punësim më të mirë. Cilësia në arsim është një çështje komplekse dhe është e lidhur edhe me qeverisjen dhe udhëheqjen, si dhe me infrastrukturën, përgatitjen dhe trajnimin e mësimdhënësve si dhe cilësinë e kurrikulave dhe teksteve shkollore. Ministria e Arsimit, Shkencës dhe Teknologjisë në vitin 2015 ka iniciuar procesin e rishikimit të teksteve shkollore me qëllim të përmirësimit të tyre. Përmes këtij auditimi, kemi vlerësuar aktivitetet e ndërmarra nga Ministria e Arsimit, Shkencës dhe Teknologjisë, respektivisht Këshilli i Ekspertëve për Programe dhe Tekste Shkollore me qëllim të arritjes së objektivave të synuara gjatë procesit të rishikimit të teksteve shkollore. Ne vlerësojmë se aktivitetet e kryera nga Këshilli i Ekspertëve për Programe dhe Tekste Shkollore gjatë procesit të rishikimit të teksteve shkollore, nuk kanë arritur qëllimet e synuara. Procesi i rishikimit ka rezultuar me tekste shkollore të përmirësuara në përqindje të vogla dhe përgjithësisht të natyrës teknike. Objektiva lidhur me lehtësimin e çantës shkollore nuk është prekur fare, ndërkohë që vendimi për të botuar të gjithë tirazhin e teksteve shkollore, përfshirë ato që nuk i janë nënshtruar rishikimit, ka krijuar shpenzime të mëdha e jo kursime siç ishte synuar fillimisht. Iniciativa për të rishikuar tekstet shkollore ishte e qëlluar dhe e domosdoshme.  Mirëpo, ne vlerësojmë se do të duhej të lejohej më shumë kohë në dispozicion si dhe komunikim e bashkërenditje të aktiviteteve në mes të pjesëmarrësve të përfshirë në proces. Këshilli do të duhej të kishte kritere më të qarta në bazë të të cilave do kryente rishikimet si dhe duhet të ishin më të kujdesshëm në marrjen e vendimeve se cilat tekste duhet të ribotohen duke pasur parasysh përqindjen e ulët të ndryshimeve, natyrën e ndryshimeve dhe faktin se disa prej teksteve nuk ishin rishikuar fare. Gjithashtu, nuk është bërë ndonjë analizë e mirëfilltë nga Këshilli apo Ministria e Arsimit, Shkencës dhe Teknologjisë lidhur me implikimet financiare të ribotimit të teksteve shkollore. Me qëllim të krijimit të mekanizmave të duhur dhe të qëndrueshëm të rishikimit të teksteve shkollore, Ministria e Arsimit, Shkencës dhe Teknologjisë duhet që përmes një udhëzimi administrativ apo ndonjë rregulloreje të brendshme, të definojë qartë përgjegjësitë e të gjithë akterëve të përfshirë në proces të rishikimit si dhe të jetë transparente në emërimin e recensentëve dhe monitorimin e punës së tyre apo të çfarëdo subjekti tjetër që ka rolin e rishikimit të teksteve shkollore.  Gjithashtu, Këshilli duhet të angazhojë ekspertë të fushave të ndryshme, të bëjë planifikim të arsyeshëm kohor për të finalizuar rishikimet e teksteve shkollore, dhe të ndërmerr  një analizë të duhur dhe të detajuar financiare përpara se të merret një vendim për ribotim të teksteve shkollore. Raportin e plotë mund ta lexoni në ueb faqen tonë: www.zka-rks.org

Auditori i Përgjithshëm i Republikës së Kosovës, Besnik Osmani mori pjesë në punimet e Konferencës Vjetore të Kontrollit të Lartë të Shtetit (KLSH) të Republikës së Shqipërisë.

Në hapje të punimeve të Konferencës, z. Osmani përgëzoi drejtuesit e Kontrollit të Lartë të Shtetit për arritjet dhe punën e bërë gjatë vitit 2016 dhe prezantoi aspekte të performancës institucionale të Zyrës Kombëtare të Auditimit. Z. Osmani u shpreh i kënaqur me bashkëpunimin në mes të dy institucioneve më të larta supreme të auditimit të Shqipërisë dhe Kosovës në realizimin e aktiviteteve sipas Marrëveshjes së Bashkëpunimit të nënshkruar në nëntor 2016, si dhe falënderoi kryetarin e KLSH-së z. Leskaj, për mbështetjen që KLSH po i jep ZKA-së në proceset e integrimit në organizatat ndërkombëtare.

Me datë 23 shkurt 2017, Auditori i Përgjithshëm, Besnik Osmani, mori pjesë në punëtorinë "Ngritja e kapaciteteve të zyrave të auditorit të brendshëm për monitorim, vlerësim dhe këshillim", organizuar nga Instituti Kosovar për Qeverisje Lokale. Me këtë rast, z. Osmani, ka përshëndetur organizatorët dhe ka vlerësuar se punëtori të tilla janë të një rëndësie të veçantë. Ai ka folur për rëndësinë e auditimit të brendshëm në menaxhimin e financave publike dhe ka theksuar në mënyrë të veçantë specifikat për ngritjen e kapaciteteve në këtë fushë. Auditori i brendshëm mund të ndihmojë që të merren vendime më të mira dhe janë instrument kyç që ndihmon që punët të kryhet në mënyrë efektive dhe profesionale, tha z. Osmani.  Ndër të tjera ai ka theksuar edhe sfidat me të cilat përballen auditorët e brendshëm si dhe rëndësinë e bashkëpunimit në mes të auditimit të brendshëm dhe të jashtëm me qëllim të rritjes së efikasitetit dhe zvogëlimit të kostove në sektorin publik. Ardiana Sahiti,  Drejtore e Njësisë së Auditimit të Brendshëm në Zyrën Kombëtare të Auditimit, gjithashtu ka prezantuar mbi Standardet Ndërkombëtare për Praktikën Profesionale të Auditimit të Brendshëm (Standardet). Znj. Sahiti duke bërë një krahasim mes Kornizës së vjetër Ndërkombëtare të Praktikës Profesionale me atë të renë,  tregojë se sa ka ndryshuar dhe se si është përmirësuar korniza e re e cila i kishte paraprirë edhe azhurnimit të Standardeve. Ajo i njoftoi të pranishmit lidhur me karakteristikat dhe rolin e Standardeve në aktivitetet e auditimit të brendshëm si dhe ndryshimet të cilat kanë hyrë në fuqi nga Janari 2017.

Zyra e Kombëtare e Auditimit ka publikuar raportin e auditimit të pajtueshmërisë dhe performancës për "Fondin Zhvillimor".

Marrëveshja e Brukselit për Mbledhjen e të hyrave Doganore ka paraparë themelimin e Fondit Zhvillimor. Sipas marrëveshjes, ky Fond, ka për qëllim promovimin e zhvillimit social - ekonomik dhe përfitimin e popullatës vendore në Komunat: Mitrovicë e Veriut, Zveçan, Zubin Potok dhe Leposaviq. Termet e Referencës kishin paraparë që përmes Fondit të financohen projektet e ndërlidhura me ndërtimin dhe mirëmbajtjen e infrastrukturës publike (rrugë, shkolla, spitale etj.), mbështetje të bizneseve, fermerëve dhe shoqërisë civile,  promovimin e të drejtave, edukimin, qasja në kujdesin shëndetësor dhe transport. Ky auditim ka përfshirë periudhën që nga themelimi i Fondit në vitin 2013 deri në shtator 2016. Qëllimi i auditimit ishte që palëve të interesit të ju ofrojmë një vlerësim lidhur me menaxhimin e projekteve të financuara me mjetet e Fondit dhe nëse është arritur qëllimi i synuar me marrëveshje. Auditimi ynë ka identifikuar, që komunat përfituese të Fondit kanë kryer aktivitetet e tyre pjesërisht  në pajtim me legjislacionin në fuqi. Realizimi i ulët i buxhetit rreth 14% ?sht? tregues se komunat përfituese nuk ishin efikase n? realizimin e projekteve. Deri në fund të shtatorit të vitit 2016 vetëm 2 nga 21 projekte janë realizuar dhe kanë arritur qëllimin e synuar me këtë fond. M? tutje, mos vendosja e projekteve n? ligjin e buxhetit, tejkalimi i dhënies s? avanseve dhe zotimi i buxhetit pas lidhjes s? kontratave jan? tregues q? kontrollet n? menaxhimin financiar duhet t? përmirësohen. Raporti përmban informata mjaft të rëndësishme për të cilat duhet diskutuar, dhe Zyra Kombëtare e Auditimit ka nxjerrë këtë konkluzion të përgjithshëm: Dogana e Kosov?s ka instaluar nj? sistem funksional p?r mbledhjen e t? hyrave. Megjithatë, mos vendosja e agjentëve doganor në dy pikat e kalimit kufitar dhe plotësimi i dokumentacionit nga oficeri doganor ka rezultuar me konflikt interesi pasi që i njëjti  institucion plotëson dhe vlerëson dokumentacionin  e zhdoganimit të mallrave. Bordi Menaxhues i Fondit ka kryer funksionin e tij, n? pajtim me marrëveshjen dhe termet e referencës. Megjithat?, zgjedhjet vendore dhe vakumi institucional kishin ndikuar q? shqyrtimi i projekteve t? b?het me vones?. Po ashtu ende nuk është instaluar procesi i raportimit nga Komunat dhe monitorimi i projekteve. Ministria e Financave ka arritur q? t? siguroj parakushte p?r komunat p?r t? lejuar procedimin e pagesave përmes SIMFK, në përjashtim të Komunës së Leposaviqit. Megjithatë, alokimi i buxhetit tek Komuna dhe lejimi i procedimit të pagesave për 14 projekte të cilat nuk ishin pjesë e Ligjit të Buxhetit mbetet shqetësimi kryesor. Më tutje, ndarja buxhetore e Fondit ishte b?r? vet?m n? kategorinë p?r investime kapitale përderisa projektet e aprovuara nga Bordi ishin edhe të natyrës së mallrave dhe shërbimeve dhe subvencioneve. Me qëllim të promovimit të transparencës dhe rritjes së llogaridhënies tek autoritetet përgjegjëse lidhur me menaxhimin e Fondit dhe të përmbushjes së synimeve t? parapara me marrëveshje ne kemi dhënë rekomandimet tona për Fondin Zhvillimor të cilat i gjeni në faqe 23-24 të raportit. Raportin e plotë mund ta lexoni në uebfaqen tonë: www.zka-rks.org

Zyra Kombëtare e Auditimit ka publikuar raportin e auditimit të performancës me titull "Administrimi i Programit për Trajtim të Pacientëve Jashtë Institucioneve Shëndetësore Publike". Për të ndihmuar pacientët në nevojë, të cilëve nuk mund tu ofrohet shërim brenda Institucioneve Shëndetësore Publike, Ministria e Shëndetësisë ka krijuar Programin për Trajtimin e Pacientëve Jashtë Institucioneve Shëndetësore Publike, përmes të cilit subvencionon trajtimin mjekësor brenda dhe jashtë vendit. Për të rregulluar këtë çështje Ministria e Shëndetësisë ka nxjerrë udhëzimin administrativ UA 15/2013. Përmes këtij programi dhe bazuar në UA, sipas mundësive financiare me kompensim nga Buxheti i Republikës së Kosovës, MSH subvencionon trajtimin mjekësor të qytetarëve të Kosovës, të diagnostikuar me sëmundje të cilat nuk mund të trajtohen në Institucionet Publike Shëndetësore. Programi parasheh që qytetarëve tu ofrohet trajtim mjekësor në institucione shëndetësore private në vend dhe në institucione shëndetësore publike dhe private jashtë vendit.  Për këtë qëllim, për vitin 2015 ishin alokuar 7.8 mln.€ dhe për vitin 2014 ishin alokuar 7.9 mln.€. Objektivë e jona gjatë auditimit ishte të vlerësohet nëse akterët përgjegjës brenda Ministrisë së Shëndetësisë janë duke e administruar programin në mënyrën e duhur dhe nëse Ministria po përmbush qëllimin për të cilin është krijuar ky program. Gjatë procesit auditues ne kemi konstatuar se: nuk ekziston një bazë e sigurt e të dhënave e cila do të shmangte ndërhyrjet në radhën e aplikimit; Bordi Ekzekutiv nuk evidenton nëse aplikacionet shqyrtohen sipas prioriteteve; nuk ka mënyrë të definuar për të monitoruar rrjedhën e shpenzimit të mjeteve financiare të alokuara për trajtim të pacientëve. Një gjendje e tillë mund të shpie deri te krijimi i borxheve, mjeteve të mbetura në këto klinika si dhe eventualisht shfrytëzimin e mjeteve për qëllime tjera e jo sipas destinimit. Bazuar në të gjeturat e auditimit, ne kemi përfunduar se ka hapësirë dhe mundësi për të përmirësuar mënyrën aktuale të menaxhimit të këtij programi. Ne kemi rekomanduar Ministrinë e Shëndetësisë që në bashkëpunim me akterët tjerë përgjegjës të sigurojë:

• Vendosjen e një aplikacioni softverik për regjistrimin, menaxhimin dhe përpunimin e të dhënave të aplikuesve;
• Komisioni për Vlerësim Mjekësor pas shqyrtimit të aplikacioneve, të përpiloj dhe zyrtarizoj një listë me emra sipas datës së aplikimit/ shqyrtimit;
• Përpilimi i një liste të institucioneve Shëndetësore ku pacientët e kryejnë trajtimin. Lidhur me këtë MSH duhet të vendos një linjë komunikimi me të gjitha këto institucione shëndetësore, ofruese të shërbimeve dhe të zhvillojë forma për të monitoruar rrjedhën e shpenzimit të mjeteve financiare.

Raportin e plotë mund ta lexoni në uebfaqen tonë: www.zka-rks.org  

Në datat 26 dhe 27 janar 2017, në Krakov të Polonisë, përfaqësues të Zyrës Kombëtare të Auditimit morën pjesë në takimin e parë të programit të auditimit të përbashkët "Cilësia e Ajrit". Ky auditim është paraparë të kryhet në kuadër të aktiviteteve të programit të Organizatës Evropiane të Institucioneve Supreme të Auditimit (EUROSAI) e cila aktualisht përbëhet nga 50 anëtarë. Nikoqir i këtij takimi ishte Institucioni Suprem i Auditimit të Polonisë , ndërsa bashkë me Gjykatën Holandeze të Auditimit janë koordinatorë të këtij auditimi të përbashkët. Në këtë takim u prezantuan auditime të cilësisë së ajrit me përvoja të vendeve të ndryshme si Polonia, Izraeli dhe Spanja. Agjencia Evropiane e Mjedisit gjithashtu prezantoi një raport përmbledhës mbi cilësinë e ajrit në Evropë. Gjykata Evropiane e Auditorëve dhanë kontributin e tyre mbi përcaktimin e kritereve dhe pyetjeve të auditimit. Auditorët e performancës Drilon Shala dhe Labinot Sadiku do të jenë pjesë e këtij auditimi të përbashkët, i cili pritet të finalizohet në tre mujorin e parë të vitit 2018. Për këtë qëllim gjatë takimit u diskutuan edhe afatet kohore të realizimit të auditimeve individuale si dhe kontributi i secilit shtet pjesëmarrës në raportin e përbashkët që pritet të përpilohet në fund të këtij auditimi. Përveç Kosovës, pjesëmarrës ishin përfaqësuesit e Institucioneve Supreme të Auditimit të Shqipërisë, Spanjës, Gjeorgjisë, Bullgarisë, Estonisë, Hungarisë, Izraelit, Maqedonisë, Moldavisë, Rumanisë, Sllovakisë dhe  Zvicrës. Tjerë përfaqësues ishin edhe Gjykata Evropiane e Auditorëve dhe Agjencia Evropiane e Mjedisit. Fakti që Zyra Kombëtare e Auditimit të Kosovës merr pjesë në një auditim të përbashkët të organizuar në nivel Evropian është një hap i suksesshëm drejt zhvillimit të mëtutjeshëm të zyrës dhe stafit të saj si dhe krijon mundësinë e krijimit të kontakteve të cilat do të shërbejnë për bashkëpunim të mëtutjeshme.