Lajmet

Auditori i Përgjithshëm, z. Osmani, i shoqëruar nga Ndihmës Auditori i Përgjithshëm, Qerkin Morina dhe Drejtori i Departamentit për auditimin e Komunave Qendër Veri, Zukë Zuka, dje gjatë ditës, 5 tetor 2016, kanë vizituar Komunat e Leposaviqit, Zubin Potokut dhe Mitrovicës Veriore, ku janë takuar me Kryetarët e këtyre komunave.

Me këtë rast kanë biseduar për raportet individuale të auditimit dhe mundësitë për implementimin e rekomandimeve. Me theks të veçantë është diskutuar për kapacitetet administrative për përpilimin e pasqyrave nëntë mujore financiare. Kryetarët e komunave janë informuar me planin vjetor të auditimit si dhe janë prezantuar ekipet auditues që dje kanë filluar audimin e këtyre komunave.

Auditori i Përgjithshëm, i ka inkurajuar krerët komunal që të përkushtohen  në ngritjen e strukturave administrative komunale të qëndrueshme dhe profesionale në mënyrë që të sigurohet cilësia e shërbimeve publike lokale për qytetarët dhe të forcohen mekanizmat e kontrollit të brendshëm.

Kjo vizitë është realizuar në kuadër të planit të Zyrës Kombëtare të Auditimit, për të sensibilizuar institucionin dhe publikun për përfshirje më serioze në implementimin e rekomandimeve dhe do të vazhdojë me institucionet tjera që janë subjekt i auditimit.

Në Shkup nën organizimin e Institucionit Suprem të Auditimit të Maqedonisë është duke u mbajtur Takimi i 14-të vjetor i Grupit Punues të EUROSAI. Paralelisht po mbahet edhe seminari tre ditor për auditimin e mjedisit.

Auditori i Përgjithshëm i Kosovës, Besnik Osmani, po merr pjesë në këtë ngjarje si pjesë e panelit diskutues së bashku me Presidentët e Institucioneve Supreme të Auditimit të vendeve të Rajonit dhe më gjerë.

Temë e diskutimuit është kontrolli i zhvillimit të qëndrueshëm që përfshin aspektin ekonomik, social dhe mjedisor, Presidentët e Institucioneve Supreme të Auditimit dhe ekspertë ndërkombëtarë po prezantojnë konceptin e tyre të zhvillimit të qëndrueshëm dhe rolin e Institucioneve Supreme të Auditimit në këtë fushë.

Z. Osmani, ka shpjeguar qasjen, mundësitë dhe sfidat në auditimet nga fusha e zhvillimit të qëndrueshëm dhe mjedisit në Republikën e Kosovës dhe krijimin e mekanizmave të kontrollit për arritjen e qëllimeve të përcaktuara me strategjitë qeverisëse dhe planet e veprimit.

Gjatë qëndrimit në Shkup, z. Osmani ka takuar dhe biseduar për bashkëpunimin reciprok Auditorët e Përgjithshëm tëISA-ve të Sllovenisë, Estonisë, Maqedonisë, Bosnje e Hercegovinës dhe shumë ekspertë të fushës, me të cilët ka shkëmbyer përvojat e auditimit me qëllim të respektimit të standardeve ndërkombëtare në fushën e auditimit dhe kontabilitetit.

Takimi i 14-të Vjetor i Grupit Punues të EUROSAI për Auditime të Mjedisit, do t'i zhvillojë punimet nga data 27 deri me 29 shtator 2016, me moton "Le të auditojmë gjelbër", ku në fokus të diskutimit do të jenë instrumentet e tregut të bazuar për mbrojtjen e mjedisit dhe Standardet Ndërkombëtare të auditimit të mjedisit.

Nga Zyra Kombëtare e Auditimit në këtë takim do të marrin pjesë Vlora Spanca, Ndihmës Auditore e Përgjithshme dhe Labinot Sadiku, Auditor i Performancës.

Z. Besnik Osmani, Auditor i Përgjithshëm, ka prezantuar para Komisionit Parlamentar për Mbikëqyrjen e Financave Publike, raportin e  Performancës së Auditorit të Përgjithshëm dhe pasqyrave vjetore financiare për vitin 2015,  të audituara nga Grant Thornton, kompani e angazhuar nga Kuvendi.

Ky raport përmban informata për punën e Zyrës Kombëtare të Auditimit gjatë vitit 2015. Z. Osmani ka njoftuar Komisionin se gjatë kësaj kohe janë kryer gjithsej 109 auditime, prej të cilave 91 auditime të rregullsisë për të gjitha organizatat buxhetore dhe 18 auditime të performancës dhe fondeve të donatorëve. Në total janë dhënë 1033 rekomandime prej të cilave 336 apo 32% janë implementuar, 304 apo 29% janë në proces të adresimit ndërsa 393 apo 37% nuk janë adresuar fare.

Auditori i Përgjithshëm, para anëtarëve të Komisionit ka ngritur shqetësimin e tij, për rekomandimet që nuk po adresohen nga organizatat buxhetore. Ai ka kërkuar nga deputetët që bashkërisht të punohet në gjetjen e modaliteteve për krijimin e mekanizmave detyrues, në mënyrë që numri i rekomandimeve të pa-adresuara të bie dhe njëkohësisht të rritet performanca në administratë publike.

Pas një diskutimi thelbësor raporti është miratuar si i tillë nga anëtarët e komisionit, duke garantuar mbështetje të vazhdueshme për Zyrën Kombëtare të Auditimit.

Z. Qerkin Morina dhe z. Imri Semetishti, përfaqësues të Zyrës Kombëtare të Auditimit të Kosovës, morën pjesë në punimet e tryezës së rrumbullakët me temën "Pavarësia e Institucioneve Supreme të Auditimit", të mbajtur me 8 shtator 2016, në Sarajevë të Bosnje dhe Hercegovinës.

Pjesëmarrës në këtë tryezë ishin përfaqësues nga vendet e rajonit si: Shqipëria, Maqedonia, Turqia, Mali i Zi, Serbia, Rumania dhe Bosnja e Hercegovina si dhe përfaqësues nga Gjykata Evropiane e Auditorëve.

Në këtë takim janë diskutuar çështje të pavarësisë institucionale të Institucioneve Supreme të Auditimit sipas rregullimit kushtetues dhe ligjor të vendeve pjesëmarrëse, si dhe zgjidhjet ligjore për kryerjen e auditimeve të rregullta vjetore, veçanërisht për auditimin e subjekteve politike.

Kjo tryezë pune është organizuar nga Institucioni Suprem i Auditimit të Bosnje dhe Hercegovinës, me mbështetje nga SIGMA, në kuadër të aktiviteteve të Rrjetit të ISA-ve të vendeve kandidate dhe kandidate të mundshme për në BE.

Presidenti i Republikës së Kosovës, Hashim Thaçi, ka pritur sot në takim Auditorin e Përgjithshëm të vendit, Besnik Osmanin, i cili ia dorëzoi kreut të vendit raportin vjetor për vitin 2015.

"E mirëpres raportin dhe të gjeturat e tij. Zyra e Auditorit të Përgjithshëm gëzon besim dhe kredibilitet", ka thënë presidenti Thaçi.

Nga ana tjetër, Auditori i Përgjithshëm i Republikës së Kosovës, Besnik Osmani, është shprehur se ky institucion ka evidentuar përmirësime, porse mbeten ende edhe disa probleme.

Duke iu referuar punës së auditorëve, presidenti Thaçi theksoi se duhet të ruhet dhe të afirmohet sa më shumë Zyra e Auditorit të Përgjithshëm.

Lajmi është huazuar nga uebfaqja e Presidentit të Republikës së Kosovës: http://bit.ly/2bXv9hH

Komisioni Rregullativ i Prokurimit Publik i ka dorëzuar Zyrës Kombëtare të Auditimit planin e veprimit.

Organizatat buxhetore që ende nuk e kanë përmbushur obligimin ligjor dhe nuk kanë dorëzuar planet e veprimit për adresimin e rekomandimeve të dhëna në raportet e auditimit për pasqyrat vjetore financiare për vitin 2015, janë:

1. Universiteti i Prishtinës "Hasan Prishtina"; dhe

2. Komuna e Dragashit.

Ligji për Auditorin e Përgjithshëm dhe Zyrën Kombëtare të Auditimit të Republikës së Kosovës, 05/L-055, obligon organizatat buxhetore të audituara, që t'i dorëzojnë Zyrës Kombëtare të Auditimit planin e veprimit se si do t'i adresojnë rekomandimet e dhëna në raportin e auditimit.

Komuna e Parteshit i ka dorëzuar Zyrës Kombëtare të Auditimit planin e veprimit.

Organizatat buxhetore që ende nuk e kanë përmbushur obligimin ligjor dhe nuk kanë dorëzuar planet e veprimit për adresimin e rekomandimeve të dhëna në raportet e auditimit për pasqyrat vjetore financiare për vitin 2015, janë:

1. Komisioni Rregullativ i Prokurimit Publik;

2. Universiteti i Prishtinës "Hasan Prishtina";

3. Komuna e Dragashit.

Ligji për Auditorin e Përgjithshëm dhe Zyrën Kombëtare të Auditimit të Republikës së Kosovës, 05/L-055, obligon organizatat buxhetore të audituara, që t'i dorëzojnë Zyrës Kombëtare të Auditimit planin e veprimit se si do t'i adresojnë rekomandimet e dhëna në raportin e auditimit.

Në ambientet e Zyrës Kombëtare të Auditimit, u mbajt sesion informues nga Universiteti Amerikan i Kosovës për Programin Certifikues për Lidership dhe Zhvillimin e Politikave Publike, program i financuar nga USAID.

Qëllimi i programit është që të ndihmojë në ngritjen e kapaciteteve të shërbyesve civil dhe do të ofrojë trajnime të specializuara në lidership, analiza të politikave publike, vendimmarrje të bazuar në dëshmi, si dhe vlerësim të programit.

Komuna e Mitrovicës Veriore, Zubin Potokut, Leposaviqit dhe Zveçanit i kanë dorëzuar Zyrës Kombëtare të Auditimit planet e veprimit.

Organizatat buxhetore që ende nuk e kanë përmbushur obligimin ligjor dhe nuk kanë dorëzuar planet e veprimit për adresimin e rekomandimeve të dhëna në raportet e auditimit për pasqyrat vjetore financiare për vitin 2015, janë:

1. Komisioni Rregullativ i Prokurimit Publik;

2. Universiteti i Prishtinës "Hasan Prishtina";

3. Komuna e Dragashit;

4. Komuna e Parteshit;

Ligji për Auditorin e Përgjithshëm dhe Zyrën Kombëtare të Auditimit të Republikës së Kosovës, 05/L-055, obligon organizatat buxhetore të audituara, që t'i dorëzojnë Zyrës Kombëtare të Auditimit planin e veprimit se si do t'i adresojnë rekomandimet e dhëna në raportin e auditimit.

Ardita Salihu, e para nga e majta,  rreshti në mes

Në datat 8-12 gusht 2016, në Institutin e Vjenës, Austri, është mbajtur trajnimi " Metodologjia e vlerësimit të performancës së menaxhimit të borxheve" i  përkrahur nga Banka Botërore.

Ardita Salihu, auditore nga Zyra Kombëtare e Auditimit të Republikës së Kosovës ishte pjesëmarrëse në këtë trajnim bashkë me përfaqësues nga vende të ndryshme si: Bosnja dhe Hercegovina, Bjellorusia, Azerbajxhani, Korea, India, Bregu i Fildishtë etj, kryesisht vende në zhvillim.

Metodologjia e vlerësimit të performancës së menaxhimit të borxheve, është një nga indikatorët e rëndësishëm të vlerësimit të  Shpenzimeve Publike dhe Llogaridhënies Financiare (PEFA). Materialet, diskutimet dhe shkëmbimi i përvojave gjatë trajnimit janë vlerësuar si shumë të dobishme, duke ditur  interesimin gjithnjë e më të madh të Kosovës  për mundësitë e financimit nga jashtë. Trajnime të tilla janë me interes për ngritjen e kapaciteteve të auditorëve tanë marrë parasysh rëndësinë e auditimit të elementëve të huamarrjes nga Qeveria dhe auditimin e performancës në menaxhimin e borxheve.

Në pajtim me  Ligjin për Auditorin e Përgjithshëm dhe Zyrën Kombëtare të Auditimit të Republikës së Kosovës, 05/L-055, neni 23, paragrafi 5,  organizatat buxhetore të audituara kanë obligim që t'i dorëzojnë Zyrës Kombëtare të Auditimit planin e veprimit se si do t'i adresojnë rekomandimet e dhëna në raportin e auditimit.

Organizatat që kanë dështuar të përmbushin obligimin ligjor dhe nuk kanë dorëzuar planet e veprimit për adresimin e rekomandimeve të dhëna në raportet e auditimit për pasqyrat vjetore financiare për vitin 2015, janë:

1. Komisioni Rregullativ i Prokurimit Publik;

2. Universiteti i Prishtinës "Hasan Prishtina";

3. Komuna e Dragashit;

4. Komuna e Parteshit;

5. Komuna e Mitrovicës Veriore;

6. Komuna e Zveçanit;

7. Komuna e Zubin Potokut; dhe

8. Komuna e Leposaviçit.

Besnik Osmani, Auditor i Përgjithshëm i Kosovës, ka pritur sot në takim Ministrin e Diasporës, Valon Murati.

Gjatë këtij takimi është biseduar për raportin e auditimit për pasqyrat vjetore financiare të vitit 2015, çështjet e ngritura në raport dhe rekomandimet e dhëna nga Auditori i Përgjithshëm.

Z. Osmani është njoftuar nga Ministri Murati, për përgatitjen e planit të veprimit nga Ministria e Diasporës për të adresuar të gjeturat e prezantuara në raport dhe implementimin e rekomandimeve të dhëna.

Z. Murati ka  vlerësuar auditimin si një mekanizëm të rëndësishëm në avancimin e menaxhimit të mirë dhe kontrollit në Ministrinë e Diasporës.