Lajmet

Per 'Rekomandimet e Kuvendit të Republikës së Kosovës lidhur me Raportin Vjetor të Auditimit të Zyrës Kombëtare të Auditimit për vitin 2015' klikoni ketu

 

 

Auditori i Përgjithshëm i Kosovës, Besnik Osmani, me bashkëpunëtorë, do të marrin pjesë në Kongresin e 22-të të Organizatës Ndërkombëtare të Institucioneve Supreme të Auditimit (ONISA).

ONISA është një organizatë autonome, e pavarur dhe jo-politike me status special konsultativ në Këshillin Ekonomik dhe Social të Kombeve të Bashkuara.

Kongresi i 22-të i ONISA-s do të mbahet në Abu Dhabi, Emiratet e Bashkuara dhe do t'i zhvilloj punimet nga data 7-11 dhjetor 2016 me temën kryesore: "Si Organizata Ndërkombëtare e Institucioneve Supreme të Auditimit mund të kontribuojë në agjendën e OKB-së deri në 2030 për zhvillim të qëndrueshëm, qeverisje të mirë dhe forcimin e luftës kundër korrupsionit?"

Kjo është hera e parë që Zyra Kombëtare e Auditimit merr pjesë në një Kongres të ONISA-s, anëtare e së cilës aspiron të bëhet në të ardhmen.

 

 

Fjala e Auditorit të Përgjithshëm të Kosovës, z. Besnik Osmani I nderuar  (Nën) Kryetar i Kuvendit, Të nderuar deputetë, Të nderuar Ministra, Kam kënaqësinë e veçantë të paraqes para Jush Raportin Vjetor të Auditimit për vitin fiskal 2015. Dëshiroj që fillimisht t'ju shpreh falënderimin tim për besimin që më keni dhënë në Mars të këtij viti, duke më zgjedhur si Auditorin e parë të Përgjithshëm - shtetas të Republikës së Kosovës. Ky fakt e rrit edhe më shumë përgjegjësinë time. Të nderuar deputetë, Raporti që po paraqes sot përfshinë opinionin, gjetjet kryesore dhe rekomandimet tona nga puna e kryer nga auditorët e Zyrës Kombëtare të Auditimit përgjatë sezonës së auditimit 2015/16. Opinionet individuale Raporti përmbledh transaksionet në lidhje me të gjitha aktivitetet e institucioneve, me përjashtim të Bankës Qëndrore të Kosovës, Trustit Pensional të Kosovës, Agjensionit Kosovar të Inteligjencës dhe Radio Televizionit të Kosovës. Për të përfunduar këtë raport, ne paraprakisht, kemi audituar dhe publikuar 90 raporte të rregullsisë (auditim i pasqyrave vjetore financiare dhe auditim i pajtushmërisë me rregullat përkatëse) dhe 8 raporteve të performancës (rishikim i vlerës për para të arritur nga përdorimi i burimeve). Gjatë periudhës audituese kemi pasur përkrahje nga Institucionet Supreme të Auditimit të Britanisë së Madhe, të Suedisë dhe të Holandës të cilët kanë ndihmuar ZKA-në për të rritur sigurinë që procesi i auditimit të jetë në pajtueshmëri të plotë me standardet ndërkombëtare të institucioneve supreme të auditimit dhe praktikat më të mira audituese. Në bazë të rezultateve nga puna audituese, na është mundësuar që të japim rekomandime për të promovuar qeverisjen e mirë dhe përmirësuar menaxhimin financiar. Në këto raporte ne kemi dhënë 91 opinione lidhur me Pasqyrat Vjetore Individuale Financiare, më saktësisht: -       30 opinione të pakualifikuara; -       41 opinione të pakualifikuara me theksim të çështjes; -       6 opinione të kualifikuara me theksim të çështjes; -       10 opinione të kualifikuara; dhe -       4 opinione të kundërta. Në këto raporte kemi vendosur  1237 të gjetura dhe kemi dhënë 1200 rekomandime nga të cilat 863 me prioritet të lartë. Të nderuar Deputetë, (Rezultatet pozitive)   Fillimisht, do të doja të theksoja disa zhvillime të rëndësishme pozitive që i kemi evidentuar gjatë vitit 2015 në zhvillimin e raportimit financiar dhe menaxhimin e parasë publike, krahasuar me vitin 2014.

• Është evidentuar performancë më e mirë buxhetore si rezultat i ndryshimit të politikave fiskale, aplikimit të rritjes së normës së TVSH-së dhe akcizës për disa produkte të caktuara, si dhe forcimin e kontrollit në menaxhimin e të hyrave,

• Po ashtu, në raport me vitin 2014 janë rritur të hyrat për 16.6%. Rritja ishte rezultat i inkasimit më të lartë të tatimeve, financimit nga huamarrja dhe financimit të njëhershëm nga Agjencia Kosovare e Privatizimit, si dhe i mbledhjes së të hyrave vetanake.

• Gjatë vitit 2015, Organizatat Buxhetore kanë treguar performancë më të mirë buxhetore në realizimin e pagesave si dhe uljen e obligimeve të papaguara në nivelin lokal.

• Qeveria e Kosovës, ka ndërmarr veprime konkrete për të siguruar regjistrimin e pagesave nga palët e treta në Sistemin Informativ të Menaxhimit të Financave të Kosovës dhe prezantimin e drejtë të tyre - edhe pse ende ekzistojnë mospërputhje, megjithatë ka përmirësim të ndjeshëm.

Opinioni Përkundër këtyre zhvillimeve pozitive, Zyra Kombëtare e Auditimit ka dhënë Opinion të Kualifikuar me Theksim të Çështjes për Raportin Vjetor Financiar për Buxhetin e Kosovës për vitin fiskal 2015. Në fakt, Raporti Vjetor Financiar prezanton një pamje të drejtë dhe të vërtetë në të gjitha aspektet materiale për vitin e përfunduar më 31 dhjetor 2015, përveç efekteve në vijim:

• Qeveria e Kosovës fillimisht, e më pastaj Kuvendi i Kosovës duke miratuar Buxhetin për vitin 2015, kanë keq-klasifikuar në shkallë vendi buxhetimin për mallra e shërbime dhe subvencione e transfere në vlerë prej 23 milion euro duke i trajtuar si investime kapitale. Po, ashtu 2 milion euro të tjera janë keq-klasifikuar nga vet Organizatat Buxhetore - si pasojë e gabimeve dhe aplikimit jo të drejtë të planit kontabël apo përdorimit joadekuat të fondeve në dispozicion, gjatë procesit të ekzekutimit.

Ne poashtu vendosëm për theksim të çështjeve për shkak të:

• shpalosjeve jo të plota dhe të pasakta të pasurive në regjistrin e pasurisë mbi 1,000 €; si dhe

• për mos-shpalosje të plotë të Llogarive të Arkëtueshme.

Deficiti buxhetor   Përveç Opinionit të Auditimit ne kemi dhënë një vlerësim të pajtueshmërisë së kufirit të deficitit buxhetor. Vlen për t'u theksuar se Qeveria, kishte siguruar që deficiti i planifikuar të jetë brenda kufirit të lejuar me Ligjin për Menaxhimin e Financave Publike dhe Përgjegjësive. Nga perspektiva audituese, ne e nënvizojmë si shumë të rëndësishëm rezultatin që ka pasur Qeveria për të mbajtur deficitin në shkallën 1.3% të Bruto Produktit Vendor, për vitin 2015. Të nderuar deputetë, Në vijim dëshiroj të prezantoj para Jush gjetjet për disa fusha të rëndësishme që kërkojnë vëmendjen e Kuvendit dhe të Qeverisë, si: 1.    Menaxhimi i Prokurimit Publik 2.    Menaxhimi i Burimeve Njerëzore 3.    Qeverisja e mirë 4.    Menaxhimi i subvencioneve 5. Performanca në sektorë të caktuar që kanë qenë subjekt i auditimit Po filloj me prokurimin.   1. Menaxhimi i Prokurimit Publik në nivel të organizatave buxhetore   Raportet individuale të auditimit për vitin 2015 kanë treguar që ka akoma mangësi në menaxhimin e prokurimit. Një numër procesesh të aplikuara nga Organizatat Buxhetore nuk janë në pajtim të plotë me kornizën e Ligjit të Prokurimit Publlik. Në vitin 2015 institucionet publike kanë nënshkruar rreth 11 mijë kontrata përmes prokurimit në vlerë prej mbi 400 milion €. Kjo vlerë vë në pah rëndësinë e një kornize prokurimi të menaxhuar mirë për të siguruar maksimizimin e përfitimeve për taksapaguesit. Çështjet kryesore të pajtueshmërisë që janë hasur në shumicën e institucioneve të nivelit qendror dhe lokal janë:

• Vonesa në realizimin e projekteve kapitale

  o   vërehet mungesë e kontrolleve për të siguruar që procedurat e prokurimit kanë filluar me kohë o   nuk është monitoruar në mënyrë efektive implementimi i kontratës në baza kohore o   nuk është bërë harmonizimi i kërkesave për rrjedhë të parasë me fondet në dispozicion.

• Mos respektimi i kërkesave të Ligjit për Prokurim Publik

  o   janë bërë blerje pa procedura të prokurimit, në rastet kur kërkohet të aplikohen ato o   janë shmangur procedurat e hapura të prokurimit dhe janë aplikuar procedurat me kuotim çmimesh apo me vlerë minimale.   Qeveria e Kosovës ka filluar projektin e prokurimit elektronik i cili ka për qëllim të përmirësojë vendimmarrjen, transparencën dhe efikasitetin në zhvillimin e procedurave të prokurimit. Ne e kemi vlerësuar si shumë të dobishëm këtë projekt dhe presim që ai të bëhet sa më shpejtë plotësisht operacional, përfshirë ngritjen e kapaciteteve menaxheriale, njerëzore dhe teknike në agjencitë përgjegjëse qeveritare. Kjo është një mundësi e mirë, për të shmangur disa nga gjetjet që ne i kemi nënvizuar në raportet e deitanishme. 2. Menaxhimi i Burimeve Njerëzore në nivel të organizatave buxhetore Menaxhimi i personelit në nivelin e Organizatave Buxhetore ishte përcjellë me disa parregullsi, si: -       mbulimi i pozitave drejtuese me ushtrues detyre, përtej afateve të përcaktuara me kornizë ligjore -       lidhja e kontratave të shumta për shërbime të veçanta, pa procedura të rekrutimit, si dhe burimet të financimit të paqëndrueshme për këtë kategori derisa në disa raste qëllimet e rekrutimit janë të paqarta. Ne kemi evidentuar 1300  të punësuar që në raport me 78,381 punëtorë është  1.65%. 3. Qeverisja e mirë   Në fushën e Qeverisjes së mirë, kemi evidentuar zhvillime pozitive. Megjithatë, iniciativat e ndërmarra nga Qeveria e Kosovës ende nuk janë plotësisht efektive. Qeveria ka zhvilluar një sistem vet-vlerësues i cili është bazë për monitorimin e zhvillimeve në qeverisje. Gjetjet tona theksojnë nevojën për rritje të konsiderueshme të fokusit në çështje të qeverisjes nga ana e menaxherëve të sektorit publik. Qeveria duhet të vazhdojë ofrimin e trajnimeve shtesë për menaxherët e Organizatave Buxhetore për përdorimin e pyetësorit të vet-vlerësimit, për zhvillimin e procesit dhe për potencialin që ai ofron në zhvillimin e qeverisjes së mirë.   Njësia e Auditimit të Brendshëm dhe Komiteti i Auditimit kanë një rol kyç për ta mbështetur dhe promovuar qeverisjen e mirë. Rezultatet e auditimit tonë kanë treguar se:

• rreth 30% e Njësive të Auditimit të Brendshëm nuk kanë numrin e mjaftueshëm të stafit, ndërsa 9 Organizata Buxhetore nuk kanë themeluar Njësitë e Auditimit të Brendshëm.

• 20% e Organizatave Buxhetore nuk e kanë themeluar Komitetin e Auditimit.

• 54% e rekomandimeve të auditorëve të brendshëm janë implementuar plotësisht, 26% janë në proces të implementimit, ndërsa 20% e rekomandimeve nuk janë implementuar.

4. Menaxhimi i subvencioneve Menaxhimi i subvencioneve si në nivelin qendror ashtu edhe në atë lokal mbetet sfidë. Praktika aktuale e vlerësimit, monitorimit dhe raportimit të subvencioneve nuk ofron siguri të mjaftueshme se ato shfrytëzohen për qëllimet e dedikuara dhe nëse janë arritur rezultatet e pritura. Prandaj, Qeveria duhet me prioritet të ndërrmarr veprime për përgaditjen dhe aplikimin e rregulloreve financiare për menaxhimin e subvencioneve që të arrihet një proces më efektiv dhe trasaprentë. 5. Fushat me rëndësi të veçantë - auditimet e performancës Përveç auditimeve të rregullsisë, ZKA për çdo vit realizon një numër të auditimeve të performancës. Këto auditime kanë për qëllim të vlerësojnë ekonomicitetin, efikasitetin dhe efektshmërinë me të cilat një institucion i përdorë burimet gjatë kryerjes së veprimtarisë së tij. Megjithëse ka pasur përpjekje nga institucionet për të vendosur një organizim të strukturuar të përcjellë me bazë ligjore, auditimet tona kanë evidentuar se ka mungesë të konsistencës ndërmjet legjislacionit, planeve strategjike dhe mekanizmave implementues. Po ashtu vërehet zhvillim jo i mjaftueshëm i mekanizmave monitorues. Për sezonin e auditimit 2015/2016 ne kemi kryer disa auditime që kanë të bëjnë me: -       monitorimin e zotimeve të blerësve të Ndërmarrjeve shoqërore të privatizuara me spin off special, -       grantet komunale në bujqësi, -       masat e eficiencës së energjisë, -       menaxhimin e proceseve të pajisjes së nxënësve me tekste shkollore etj. Nga këto auditime të performancës, po i veçoj vetëm dy nga shumë konstatime të rëndësishme që rrjedhin nga ato: o   Përmbushja e zotimeve nga blerësit e Ndërmarrjeve Shoqërore, për investime brenda periudhës së zotuar ishte në masën 70% (pas zgjatjes së afatit të përmbushjes), derisa zotimet për punësim janë realizuar deri në masën prej 96%". o   Është vlerësuar mungesë efikasiteti në procesin e planifikimit, shpërndarjes dhe kthimit të teksteve shkollore. Vlerësimi ynë është që me një kujdes më të madh nga institucionet përkatëse në menaxhimin e procesit të shpërndarjes së teksteve shkollore mund të realizohen kursime të rëndësishme të buxhetit të Kosovës. Për të gjitha këto auditime, entitetet përkatëse kanë pranuar raportet tona si dhe udhëzimet për përmirësimet e nevojshme. IMPLEMENTIMI I REKOMANDIMEVE Adresimi i rekomandimeve nga vitet e kaluara Të nderuar deputetë, Shkalla e implementimit të rekomandimeve të dhëna në raportin e auditimit të vitit paraprak, nuk është e kënaqshme. Raporti i vitit 2015 tregon se nga 1177 rekomandime të dhëna, janë implementuar plotësisht vetëm 356 apo vetëm 30% e tyre. Vlerësimi ynë është që mungesa e zhvillimit të proceseve formale për monitorim sistematik të planeve të veprimit për implemetim të rekomandimeve mund të jetë një prej shkaktarëve për adresimin në shkallë të ulët të rekomandimeve. Për këtë arsye ZKA ka rekomanduar Qeverinë që: -       të zbatojë një proces sistematik për implementimin e rekomandimeve të dhëna në Raportin Vjetor të Auditimit 2015; si dhe -       të kërkojë nga të gjitha Organizatat Buxhetore që të implementojnë dhe raportojnë mbi implementimin e rekomandimeve të auditimit të dhëna në Raportet individuale të Pasqyrave Financiare. Të nderuar deputetë, Zyra Kombëtare e Auditimit, për sezonin 2016/17 ka planifikuar dhe është në proces të realizimit të mbi 90 auditimeve të rregullsisë dhe 15 auditimeve të performancës. Në këtë proces janë përfshirë (pothuajse) të gjitha organizatat buxhetore të nivelit qendror, të gjitha komunat e Kosovës dhe për herë të parë ka filluar edhe auditimi i një numri të ndërmarrjeve publike. Ne jemi të përkushtuar që të përmbushim mandatin kushtetues e ligjor, në funksion të përmirësimit të vazhdueshëm të qeverisjes e të llogaridhënies në institucionet publike të Kosovës në menaxhimin e fondeve publike si dhe të përmirësimit të shërbimit ndaj qytetarëve. Më lejoni që në fund të kësaj fjale të shpreh mirënjohjen për bashkëpunimin e mirë dhe konstruktiv për të gjitha institucionet që kanë qenë subjekt i auditimit, me theks të veçantë për Ministrinë e Financave dhe Komisionin për Mbikëqyrje Financiare të Kuvendit. Po ashtu, vlerësoj lartë angazhimin profesional të personelit të Zyrës Kombëtare të Auditimit që kanë punuar me përkushtim për të zhvilluar auditime në pajtim me stadartet e kontabilitetit dhe auditimit si dhe brenda afateve ligjore në fushën e auditimit. Ju faleminderit për vëmendjen dhe duke ditur rregullën që nuk mund të kemi mundësi për informata dhe sqarime shtesë, ne mbesim në dispozicion të secilit deputet, që varësisht nga interesimet Tuaja, në secilën kohë të arsyeshme për Ju, të jemi në dispozicion unë dhe stafi profesional i Zyrës. Faleminderit!

Nazia Mintz - Habib, Drejtore Hulumtuese në Qendrën për Fuqitë në Rritje të Universitetit të Kembrixhit dhe z. Steve McCaule, Mentorues për Udhëheqje Ekzekutive  pranë kësaj Qendre, kanë vizituar Zyrën Kombëtare të Auditimit në datat 22 - 23 nëntor 2016. Me datë 22 nëntor 2016, Auditori i Përgjithshëm, Besnik Osmani, i ka pritur në një takim të shkurtër përshëndetës, ndërsa znj. Mintz dhe z. McCaule gjatë ditës kanë marrë pjesë në Ceremoninë e Certifikimit të Auditorëve të Zyrës Kombëtare të Auditimit në Sektorin Publik dhe në tryezën rajonale me temën "Sfidat në zhvillimin institucional dhe resurseve humane në Institucionet Supreme të Auditimit". Me datë 23 nëntor, znj. Mintz dhe z. Mc Caule, kanë takuar grupin menaxhues të Zyrës Kombëtare të Auditimit, për të diskutuar dhe shkëmbyer mendime me qëllim dizajnimin e një programi ekzekutiv të edukimit për zhvillimin e kapaciteteve të Zyrës Kombëtare të Auditimit. Në parim të dyja palët u pajtuan që fokusi kryesor i këtij programi duhet të jetë në ofrimin e kurseve për nivelin ekzekutiv në politika publike dhe një skemë certifikimi për auditorët e performancës. Përfaqësuesit e Universitetit të Kembrixhit, u shprehën shumë të kënaqur për mbështetjen që mund të japin për Zyrën Kombëtare të Auditimit, ndërsa angazhimi i mëtutjeshëm nga të dyja palët do të jetë në koordinim me aktivitetet dhe planin e vendosur.

Në ceremoninë e organizuar nga Zyra Kombëtare e Auditimit të Republikës së Kosovës, merr pjesë Presidenti i Republikës së Kosovës sh.t.z. Hashim Thaqi, përfaqësues të Kuvendit të Kosovës si dhe përfaqësues të lartë ndërkombëtar,  rajonal dhe vendor.

Me pjesëmarrjen e shumë mysafirëve nga institucionet e Kosovës, institucionet supreme të auditimit në rajon, të shoqërisë civile dhe akademike si dhe përfaqësues ndërkombëtar të akredituar në Kosovë, Zyra Kombëtare e Auditimit ka organizuar sot aktivitete ditore në vigjilje të ceremonisë së certifikimit të auditorëve publik, duke organizuar Tryezën e Përbashkët me institucionet simotra nga rajoni me temën "Sfidat në zhvillimin institucional dhe resurseve humane në Institucionet Supreme të Auditimit ", ka nënshkruar marrëveshjen e bashkëpunimit me organizata simotra në rajon dhe duke ndarë certifikatat për 105 auditorë të sektorit publik.

Në hapje të aktivitetit Presidenti i Republikës së Kosovës, sh.t.z. Hashim Thaqi ka nënvizuar që Zyra Kombëtare e Auditimit është shndërruar në një sinonim të institucionit më kredibil të vendit tonë dhe inkurajon që këtë epitet ta bartim edhe tek institucionet e audituara. Kjo, ka theksuar Presidenti Thaqi, na mundëson përdorimin e drejtë të fondeve publike dhe ndërtimin e qeverisjes së mirë.

Në luftën për sundim të ligjit, puna e auditorëve është shumë e vlefshme dhe si e tillë, në çdo moment, do të ketë përkrahjen e institucionit të Presidentit të Kosovës.

Derisa, Auditori i Përgjithshëm z. Besnik Osmani, ka potencuar që Zyra Kombëtare e Auditimit promovon një partneritet të hapur me të gjithë akterët e shoqërisë në funksion të përmirësimit të qeverisjes dhe të llogaridhënies në Kosovë dhe sot, kjo zyre ka shënuar kurorëzimin e suksesshëm të një programi të specializuar edukativ të auditorëve të sektorit publik të Republikës së Kosovës.

Kjo padyshim që është një arritje e jashtëzakonshme për një institucion të ri për nga mosha, por jo edhe për nga përvoja dhe rezultatet si dhe pritjet janë të natyrshme që në vijim të kemi performancë edhe më të mirë individuale të auditorëve si dhe të institucionit në përgjithësi.

Ai ka nënvizuar që përmes ngritjes së kapaciteteve të kapitalit njërëzor, Zyra Kombëtare e Auditimit, përmirëson dhe më tej cilësinë e raporteve të auditimit dhe në këtë mënyrë ndikon në përmirësimin e qeverisjes në institucionet publike të vendit tonë.

Megjithatë, Auditori i Përgjithshëm, ka shprehur brengosjen e tij lidhur me nivelin e ulët të implementimit të rekomandimeve të dhëna në raportet paraprake të auditimit. Ai u ka bërë ftesë krerëve të institucioneve publike që t'i kushtohet vëmendje më e madhe implementimit të rekomandimeve të auditorëve.

Në margjinat e aktivitetit të sotëm është nënshkruar Marrëveshjen e Bashkëpunimit dhe Planin e Veprimit për  aktivitetet e përbashkëta midis z. Besnik Osmani, Auditor i Përgjithshëm i Kosovës dhe z. Bujar Leskaj, President i Kontrollit të Lartë të Shtetit të Republikës së Shqipërisë.

Këtë aktivitet e kanë përshëndetur edhe drejtuesit e institucioneve supreme të auditimit të Malit të Zi dhe Maqedonisë, të cilët njëzëri kanë nënvizuar nevojën për thellimin e bashkpunimit në fushën e auditimit, për të shkëmbyer përvojat dhe për të maksimalizuar rezultatet. Poashtu përfaqësues nga Qendra për Fuqitë në Rritje e Universitetit të Kembrixhit ka përshëndetur certifikimin e auditorëve, ndërsa znj. Nazia Mintz-Habib, Drejtore Hulumtuese e kësaj Qendre, ka prezantuar në panelin e tryezës rajonale "Sfidat në zhvillimin institucional dhe resurseve humane në Institucionet Supreme të Auditimit".

Shënim për media: - Zyra Kombëtare e Auditimit të Republikës së Kosovës  është institucioni më i lartë i kontrollit ekonomik dhe financiar. Mandat auditimi të të gjitha aktivitetet financiare dhe administrative, programe dhe projekte të menaxhuara nga një apo më shumë institucione publike, përfshirë proceset dhe të ardhurat nga shitja e pasurive, privatizimit dhe koncesionet; ka të drejtë t'i përcjellë fondet publike deri tek përfituesi i fundit. Vetëm gjatë vitit 2016 ka publikuar mbi 110 raporte të auditimit të pasqyrave financiare, të rregullsisë si dhe raporte të përformancës. Këto, raporte janë duke u diskutuar gjerësisht në Parlamentin e Kosovës dhe përmbajnë rreth 1300 rekomandime për të përmisuar menaxhimin financiar dhe qeverisjen e mirë.

 

 

Nesër (e martë) date: 22 nëntor 2016, nga ora: 10:30, në Hotel Emerald, Zyra Kombëtare të Auditimit  (ZKA), mbanë konferencën ditore me fokus kapacitetet e Zyrës Kombëtare të Auditimit dhe njëherësh ceremoninë e certifikimit të auditorëve. Ngjarja ka tri sesione të veçanta dhe ka për qëllim të mbledhë gjithë akterët rajonal, vendor dhe ndërkombëtarë si nevojë për reflektim dhe zotim për angazhimet e përbashkëta në funksion të fuqizimit të këtij mekanizmi të rëndësishëm për Republikën e Kosovës.

Përmes kësaj ngjarje, Zyra Kombëtare e Auditimit, shpreh angazhimin dhe fokusin për të adresuar sfidat, promovuar sukseset dhe për të parë bashkërisht me parterët rrugën përpara. Ky është moment tejet i rëndësishëm, për gjithë akterët në funksion të bashkimit të energjive, njëherësh një shenjë mirënjohje për të gjithë korpusin që angazhohen në këtë mision te auditimit.

Përveç fjalimeve kryesore në ceremoninë e certifikimit nga z. Besnik Osmani, Auditor i Përgjithshëm dhe Sh.T.Z. Hashim Thaçi, Presidenti i Republikës së Kosovës, në sesionet tjerë do të prezantojnë përfaqësues të lartë ndërkombëtarë, rajonal dhe vendorë (shihni detajet e sesioneve).

10:30, sesioni i parë (salla Mozart)

Ceremonia e nënshkrimit të aktiviteteve të përbashkëta ndër-shtetërore Kosovë - Shqipëri

o   Zyra Kombëtare të Auditimit dhe Kontrollit të Lartë të Shtetit

11:00, sesioni i dytë (salla Bethoven)

Ceremonia kryesore - certifikimi i auditorëve

o    Z. Besnik Osmani, Auditor i Përgjithshëm

o    Z. Hashim Thaçi, President i Republikës së Kosovës

(Auditori i Përgjithshëm bashkë me Presidentin e vendit, z. Hashim Thaçi do të ndajnë Certifikatat. Prezent partnerë nga Institucionet Supreme të Auditimit nga vendet e rajonit. Përfaqësues të Institucioneve vendore, shoqëria civile dhe partnerë tjerë vendorë dhe ndërkombëtarë).

 

13:45, sesioni i tretë (salla Verdi)

Tryezë rajonale "Sfidat në zhvillimin institucional dhe resurseve humane në Institucionet Supreme të Auditimit"

o  Z.Besnik Osmani, Auditor i Përgjithshëm - Republika e Kosovës

o  Z. Bujar Leskaj, Kontrolli i Lartë i Shtetit - Republika e Shqipërisë

o  Z. Naser Ademi, Zyra Shtetërore e Auditimit - Republika e Maqedonisë

o  Z. Nikola Kovaceviq, Institucioni Suprem i Auditimit - Republika e Malit të Zi

o  Znj. Nazia Habib Mintz, Drejtoresh Hulumtuese (Qendrës për Ngritje të Kapaciteteve të Universitetit të Kembrixhit)

(Në këtë tryezë rajonale do të prezantojnë drejtuesit e mekanizmave të institucioneve supreme të auditimit nga rajoni, përfaqësueses nga Universiteti i Kembrixhi, ndërkaq të ftuar janë përfaqësues diplomatik, donatorë, përfaqësues nga niveli qendrorë dhe lokal dhe mekanizmave tjerë institucional dhe jo-qeveritar)

 

Për informatën tuaj:

Zyra Kombëtare e Auditimit, me sukses është duke përmbyllur Skemën e Certifikimit për Auditor të Sektorit Publik dhe kjo po ndodh për herë të parë në Kosovë.

Skemës së Certifikimit për Auditor të Sektorit Publik i janë nënshtruar gjithsej  109 auditor të Zyrës Kombëtare të Auditimit prej të cilëve 57 kanë arritur titullin më të lartë, Auditor i Certifikuar i Sektorit Publik, 34 kanë arritur titullin, Auditor i Sektorit Publik,  dhe 9, Asistent Auditor i Sektorit Publik.

Për informata shtesë ju lutem na kontaktoni në:

e-mail: qendresa.mulaj@oagks.org, ose

telefon: + 377 (0)45 109 000

 

Ju ftojmë ta përcjellni këtë ngjarje të rëndësishme për institucionin tonë dhe Republikën e Kosovës.

 

 

Auditori i Përgjithshëm i Kosovës, Besnik Osmani, sot ka pritur në takim njoftues, znj, Nataliya Apostolova, Shefe e Zyrës së BE-së në Kosovë njëkohësisht Përfaqësuese e Posaçme e Bashkimit Evropian në Kosovë dhe ku për së afërmi është njofuar lidhur me punën, rezultatet dhe planet e Zyrës Kombëtare të Auditimit për të përmbushur obligimet kushtetuese dhe standartet ndërkomëbatre të auditimit dhe kontabilitetit.

Me këtë rast, z. Osmani i ka uruar asaj marrjen e postit dhe ka shprehur mirënjohjen e tij për rolin që Zyra e BE-së në Kosovë ka luajtur në themelimin dhe ndërtimin e kapaciteteve në mënyrë që Zyra të ofrojë auditime të bazuara dhe me integritet të lartë.

Znj. Apostolova, nga ana e saj ka shprehur gatishmërinë që Zyra e BE-së në Kosovë të vazhdojë mbështetjen për Zyrën Kombëtare të Auditimit në zhvillimin e mëtutjeshëm të kapaciteteve dhe rrugën e vet drejt integrimit dhe anëtarësimit në organizatat profesionale të Auditimit si ONISA dhe EUROSAI. Në vazhdim ka nënvizuar rëndësinë që ka Parlamenti dhe Auditori i Përgjithshëm për të mbajtur në llogari Qeverinë për përdorimin e fondeve publike.

Bashkbiseduesit janë pajtuar për rëndësinë e aktivitetit auditues për të siguruar kontrolle efikase jo vetëm duke raportuar se cka ka ndodhur por edhe duke identifikuar se ku mund të bëhen përmisimet dhe duke promovuar praktikat e mira.

Po ashtu theks i veçantë gjatë bisedimit u vu në forcimin e mekanizmave mbikëqyrës  në kontekst të ndikimit tek organizatat buxhetore në implementimin e rekomandimeve të dhëna nga Zyra Kombëtare e Auditimit dhe rritjen e performancës në administratë publike, duke siguruar kështu shërbime të mira publike për qytetarët dhe njëkohësisht përmbushjen e obligimeve në procesin e integrimeve evropiane.

 

 

Besnik Osmani, Auditori i Përgjithshëm i Republikës së Kosovës, mori pjesë në punimet e Konferencës Rajonale për zhvillimin e marrëdhënieve efektive të punës së mes të Institucioneve Supreme të Auditimit dhe Parlamenteve, e cila u mbajt në Ankara, në datat 8 -9 nëntor 2016.

Konferenca ka zhvilluar punimet e veta në tri panele. Pjesëmarrësit kanë diskutuar për standardet ndërkombëtare të auditimit, faktorët kontekstual, si dhe karakteristikat dhe praktikat në të gjithë Evropën, duke nxjerr në pah çështjet kryesore të marrëdhënieve efektive të punës në mes të Institucioneve Supreme të Auditimit dhe Parlamenteve.

Z. Osmani, ka prezantuar marrëdhëniet e bashkëpunimit që Zyra Kombëtare e Auditimit të Kosovës ka me Parlamentin, në kuadër të diskutimit në panelin e parë. Në fjalën e tij,  ka ngritur nevojën e zhvillimit të mëtutjeshëm të këtij bashkëpunimi përmes arritjes së një memorandumi të bashkëpunimit dhe komunikimit të ZKA-së me Kuvendin e Republikës së Kosovës dhe nevojën që raportet e auditimit përveç shqyrtimit në Komisionin për Mbikëqyrje të Financave Publike të shqyrtohen edhe në komisionet tjera funksionale të kuvendit me qëllim të rritjes së implementimit të rekomandimeve të dhëna nga Auditori i Përgjithshëm. Po ashtu shumë të rëndësishme e ka parë edhe gjetjen e modaliteteve për shqyrtimin e raporteve të auditimit për komunat në Asambletë Komunale dhe rritjen e nivelit të debatit për këto raporte.

Institucionet Supreme të Auditimit të 33 shteteve anëtare të BE-së dhe vendet e zgjerimit, kanë kontribuar në ofrimin e të dhënave për praktikat e zbatuara nga shtetet e tyre në marrëdhëniet e bashkëpunimit ISA me Parlamentin. Bazuar në këtë ekspertë nga SIGMA, kanë hartuar dokumentin udhëzues  "Zhvillimi i marrëdhënieve efektive të punës në mes të Institucioneve Supreme të Auditimit dhe Parlamenteve" i cili do të shërbejë Institucioneve Supreme të Auditimit dhe Parlamenteve, në zhvillimin dhe forcimin e rolit të tyre si dy institucionet më të rëndësishme për ta mbajtur llogaridhënëse Qeverinë në përdorimin e fondeve publike.

Konferenca është organizuar nga SIGMA ndërsa nikoqir ishin Gjykata Turke e Llogarive. Në konferencë morën pjesë Auditorët e Përgjithshëm/Presidentët e  Institucioneve Supreme të Auditimit dhe  deputetë të Parlamenteve të vendeve të rajonit si Shqipëria, Maqedonia, Mali i Zi, Bosnja dhe Hercegovina, Serbia dhe Turqia. Përfaqësues nga Gjykata Evropiane e Auditorëve, përfaqësues të ISA-ve nga vendet e BE-së, përfaqësues nga Drejtoria e Përgjithshme e Buxhetit të Komisionit Evropian si dhe ekspertë nga SIGMA dhe OECD.

Auditori i Përgjithshëm në këtë konferencë ishte i shoqëruar nga bashkëpunëtorët Qëndresa Mulaj dhe Valbon Bytyqi, ndërsa pjesëmarrës ishin edhe përfaqësues të Kuvendit të Republikës së Kosovës.

 

 

Përfaqësuesi i Zyrës Kombëtare të Auditimit, Zukë Zuka mori pjesë në  punëtorinë dy ditore që u mbajt në Durrës më 29 dhe 30 tetor 2016.

Qëllimi i kësaj punëtorie, të organizuar nga KDI, ishte "Përvojat e Evropiane mbi Luftimin e  Korrupsionit në Prokurimin Publik".

Gjatë kësaj punëtorie u shpalosën praktika nga perspektiva lokale e ndërkombëtare të cilat do të ndihmojnë në fuqizimin e bashkëpunimit dhe koordinimin e përpjekjeve për avokim më të fuqishëm, në mënyrë që ndikimi dhe efektet në luftimin dhe parandalimin e korrupsionit të jenë sa më të dukshme. Gjatë diskutimeve të ndryshme, rëndësi të veçantë iu dha raporteve të auditimit nga Zyra Kombëtare e Auditimit,  të cilat u vlerësuan lartë në këtë drejtim.

Në këtë punëtori morën pjesë përfaqësues të  institucioneve shtetërore, deputetë të Kuvendit të Kosovës, shoqëria civile dhe gazetarë të mediave të ndryshme vendore, si dhe znj. Cornelia Abel dhe z. Gabriel Sipos nga Transparency International.

 

 

Me 28 tetor 2016, u mbajt Konferenca "Rritja e transparencës nëpërmjet promovimit të rolit të Auditorit të Brendshëm në zinxhirin e llogaridhënies", organizuar nga Instituti KAF dhe financuar nga organizata Balkan Trust for Democracy. Në këtë Konferencë u bë publikimi dhe diskutimi i Raportit me të njëjtin titull dhe u shpalosën të gjeturat, konkluzionet dhe rekomandimet lidhur me gjendjen aktuale të auditimit të brendshëm dhe rolin e tyre në përmirësimin e llogaridhënies publike.

Bujar Sejdiu, përfaqësues nga Zyra Kombëtare e Auditimit ka marrë pjesë në Konferencë dhe ka qenë pjesë panelit diskutues. Në fjalën e tij, Z. Sejdiu ka potencuar rëndësinë që auditimi i brendshëm ka në menaxhimin financiar dhe kontrollin që zbatohet në institucionet publike. Ai po ashtu ka theksuar rolin e rëndësishëm të Zyres Kombëtare të Auditimit në këtë aspekt si një prej hallkave kyçe në forcimin  e llogaridhënies, transparencës dhe qeverisjes së mirë në përgjithësi.

 

 

Auditori i Përgjithshëm i Kosovës, Besnik Osmani, dhe Zv. Auditori i Përgjithshëm, Artan Venhari, po marrin pjesë në punimet e Konferencës Rajonale me temë, "Përforcimi i performancës së institucioneve të pavarura: Roli i Parlamentit në Rajonin e Ballkanit Përendimor", të organizuar nga Misioni i Organizatës për Siguri dhe Bashkëpunim në Evropë (OSBE) në Kosovë, në bashkëpunim me Kuvendin e Kosovës.

Konferenca ka për qëllim trajtimin e pavarësisë financiare dhe funksionale të Institucioneve të Pavarura, mbikëqyrjen parlamentare si dhe sfidat dhe mundësitë për bashkëpunim rajonal.

Z. Osmani në kuadër të panelit për sesionin e dytë të konferencës ku është trajtuar tema e pavarësisë financiare dhe veprimtarisë së Institucioneve të Pavarura, ka folur për rregullimin kushtetues e ligjor, të Auditorit të Përgjithshëm dhe Zyrës Kombëtare të Auditimit të Kosovës, me theks të veçantë mbi pavarësinë institucionale në kryerjen dhe ushtrimin e funksioneve dhe kompetencave, në përmbushje të mandatit.

Përveç kësaj, Auditori i Përgjithshëm, ka trajtuar edhe përgjegjësinë për llogaridhënie të Institucioneve të Pavarura, para Kuvendit, lidhur me aktivitetin e tyre dhe mënyrën se si e kanë menaxhuar buxhetin.

Konferenca vazhdon punimet sot dhe nesër, ndërsa pjesëmarrës janë përfaqësues të Parlamenteve, përfaqësues të Institucioneve të Pavarura dhe të shoqërisë civile nga Kosova dhe vendet tjera të rajonit si Shqipëria, Mali i Zi, Maqedonia dhe Bosnje dhe Hercegovina.

 

 

Auditori i Përgjithshëm i Republikës së Kosovës, Besnik Osmani, i shoqëruar nga bashkëpunëtorët Vlora Mehmeti dhe Ilir Salihu kanë zhvilluar një vizitë pune në selinë kryesore të Zyrës Kombëtare të Auditimit të Suedisë, në Stokholm.

Gjatë kësaj vizite, e cila u zhvillua në kuadër të bashkëpunimit bilateral në mes të Zyrës Kombëtare të Auditimit të Suedisë dhe të Kosovës, Auditori i Përgjithshëm, Z Osmani ka takuar Auditoren e Përgjithshme të Suedisë znj. Margareta Åberg, Zëvendës Auditorin e Përgjithshëm z.Magnus Lindell dhe zyrtarë të tjerë të Zyrës Kombëtare të Auditimit të Suedisë, me të cilët ka biseduar për thellimin e bashkëpunimit bilateral në mes të dy institucioneve.

Z. Osmani e ka njoftuar homologen e tij me aktivitetet aktuale dhe orientimet strategjike të Zyrës Kombëtare të Auditimit. Ai e ka falënderuar znj. Åberg për përkrahjen që ka ofruar institucioni suprem i auditimit suedez për Zyrën e Auditorit të Përgjithshëm dhe ka kërkuar vazhdimin e përkrahjes si në aspektin bilateral, ashtu edhe në atë regjional e ndërkombëtar me qëllim që institucioni më i lartë i auditimit në Kosovë të bëhet pjesë aktive e zhvillimeve në fushën e auditimit.

Drejtuesit e Zyrës Kombëtare të Auditimit të Suedisë shprehën gatishmërinë për të ofruar ekspertizën e tyre për zhvillimin e mëtejshëm të kapaciteteve të Zyrës Kombëtare të Auditimit të Kosovës si në sferën e auditimeve të rregullsisë ashtu edhe në atë të performancës. Në këtë kuadër palët u pajtuan që marrëveshja aktuale e bashkëpunimit të zgjerohet dhe të konkretizohet me një plan të aktiviteteve.

Gjatë vizitës zyrtare në Suedi, Auditori i Përgjithshëm,  z. Osmani vizitoi edhe Parlamentin suedez ku u prit nga z. Göran Pettersson zëvendës-kryesues i Këshillit Parlamentar për Zyrën Kombëtare të Auditimit dhe anëtar i Komitetit për Çështje të Jashtme dhe z. Mikael Åsell, kryesues i Sekretariatit të Komitetit për Financa.