Lajmet

Sot, në ambientet e punës, Auditori i Përgjithshëm dhe personeli i Zyrës së Auditorit të Përgjithshëm, dhuruan gjak në mënyrë vullnetare. Aksioni për dhurimin e gjakut tashmë është bërë traditë dhe ky është viti i katërt që ky institucion organizon këtë aktivitet bamirës. Si edhe vitet e mëparshme, interesimi i stafit të ZAP që  të bëhen pjesë e këtij aktiviteti ishte i konsiderueshëm.

Ky organizim është bërë me përkujdesjen e Sindikatës së ZAP-it.

Auditori i Përgjithshëm, Besnik Osmani, si dhurues i gjakut, ka falënderuar stafin e ZAP për pjesëmarrje në këtë aksion humanitar dhe ka shprehur gatishmërin e tij që ky aktivitet të organizohet rregullisht edhe në të ardhmen. Ai poashtu ka falënderuar Drejtorin dhe ekipin e Qendrës Kombëtare të Kosovës për Transfuzionin e Gjakut, për realizimin e suksesshëm të këtij aktiviteti dhe për mundësinë që ai të realizohej në ambientet e Zyrës së Auditorit të Përgjithshëm.

Auditori i Përgjithshëm i Republikës së Kosovës, Besnik Osmani, i shoqëruar nga Zëvendës Auditori i Përgjithshëm, Artan Venhari kanë zhvilluar një vizitë pune në Zyrën Kombëtare të Auditimit të Mbretërisë së Bashkuar, nga 25 deri më 26 maj 2016.

Gjatë kësaj vizite, e cila u zhvillua në kuadër të Projektit të Binjakëzimit të financuar nga Bashkimi Evropian, në përkrahje të Zyrës së Auditorit të Përgjithshëm të Kosovës, janë realizuar takime me zyrtarë të lartë të Zyrës Kombëtare të Auditimit të Mbretërisë së Bashkuar, ku është biseduar për rolin dhe rëndësinë e procesit të auditimit dhe mbështetjen që Auditori i Përgjithshëm i jep Parlamentit dhe Qeverisë në përmirësimin e menaxhimit të mirë dhe kontrollit në shpenzimin e parasë publike.

Gjatë takimeve me drejtuesit e Zyrës Kombëtare të Auditimit të Mbretërisë së Bashkuar, u shkëmbyen përvojat reciproke dhe nga të dyja palët u konfirmua edhe një herë interesimi për të vazhduar bashkëpunimin. Mikpritësit nga Zyra Kombëtare e Auditimit të Mbretërisë së Bashkuar shprehën gatishmërinë për të ofruar ekspertizën e tyre për nevojat e Zyrës së Auditorit të Përgjithshëm të Kosovës.

Gjatë qëndrimit në Londër, Auditori i Përgjithshëm ka vizituar edhe Ambasadën e Kosovës në Mbretërinë e Bashkuar, ku është pritur nga Ambasadori Lirim Graiçevci.

Auditori i Përgjithshëm Besnik Osmani priti sot në takim Ministrin e Financave Avdullah Hoti, me të cilin bisedoi për progresin në reformën e menaxhimit të financave publike, implementimin e aktiviteteve në kuadër të Planit Kombëtar për Zbatimin e Marrëveshjes së Stabilizim Asociimit që kanë të bëjnë me kontrollin financiar, Ligjin e ri për Zyrën Kombëtare të Auditimit si dhe për çështje të tjera të bashkëpunimit ndërinstitucional.

Auditori i Përgjithshëm Besnik Osmani, theksoi rëndësinë që ka reforma në menaxhimin e financave publike në përmirësimin e shpenzimit të parasë publike dhe rritjen e efikasitetit të qeverisjes dhe rikonfirmoi gatishmërinë dhe interesimin e Zyrës Kombëtare për Auditim për të ndihmuar në implementimin e suksesshëm të saj.

Z. Osmani e cilësoi një lajm të mirë aprovimin e Ligjit të ri për Zyrën Kombëtare të Auditimit (siç do të quhet sipas Ligjit të ri) nga Kuvendi i Republikës së Kosovës, javën e kaluar dhe falënderoi Ministrin Hoti për përkrahjen në finalizimin e tij. Ai theksoi se "mirëpret rikonfirmimin ligjor për pavarësinë funksionale, financiare dhe operative të Zyrës Kombëtare të Auditimit, dhe se tani po analizohet ndikimi praktik i Ligjit si dhe po bëhen përgatitjet për implementimin e plotë të tij, sapo të hyj në fuqi".

Auditori i Përgjithshëm Besnik Osmani kërkoi nga Ministri Hoti përkrahjen e mëtejshme institucionale në mënyrë që Zyra Kombëtare e Auditimit të pajiset me resurset adekuate për përmbushjen e obligimeve ligjore, qoftë me rekrutimin e personelit të nevojshëm, krijimin e hapësirave adekuate për punë dhe përkrahjen buxhetore për projektet që e lehtësojnë funksionimin e Zyrës së Kombëtare të Auditimit.

Ministri Hoti e njoftoi z.Osmani me progresin në reformën e menaxhimit të financave publike dhe tha se mirëpret rekomandimet e Auditorit të Përgjithshëm në këtë proces të rëndësishëm. Ai rikonfimoi përkrahjen e Qeverisë, në veçanti të Ministrisë së Financave në funksion të forcimit të pavarësisë financiare të Zyrës së Kombëtare të Auditimit si dhe ritheksoi gatishmërinë e Qeverisë për implementimin e plotë të rekomandimeve të Auditorit të Përgjithshëm.

Auditori i Përgjithshëm i Kosovës, z. Besnik Osmani, ka pritur në takime njoftuese, përfaqësues nga Shoqata e Kontabilistëve të Çertifikuar dhe Auditorëve të Kosovës dhe nga përfaqësues nga Institutit për Kontabilitet Auditim dhe Financa.

Gjatë këtyre takimeve, është nënvizuar rëndësia e një partneriteti të qëndrueshëm me theks të veçantë në krijimin e një vlere krahasuese në përmbushjen e detyrave në fushën e auditimit.

Z. Osmani, Auditor i Përgjithshëm i Kosovës, ka shprehur interesimin e tij në krijimin e një rrjeti të komunikimit në mes të Zyrës së Auditorit të Përgjithshëm dhe shoqatave profesionale në auditim, organizatave të fushës nga shoqëria civile dhe mediat  me qëllim të rritjes së debatit për raportet e auditimit të  Zyrës së Auditorit të Përgjithshëm,  dhe që ato të jenë më të afërta dhe të kuptueshme për qytetarët e vendit.

Në datat 25 - 27 prill 2016, në Podgoricë të Malit të Zi, është mbajtur punëtoria e parë e Projektit të dytë të Auditimit Paralel të Performancës, i cili do të ketë për temë auditimi 'Prokurimin Publik'. Kjo punëtori shënon edhe fillimin e punëve për këtë projekt, dhe  i gjithë procesi i auditimit deri në finalizimin e raporteve do të mbështetet nga ekspert të Zyrës Kombëtare të Auditimit të Suedisë dhe Gjykatës Evropiane të Auditorëve.

Ekipe të auditimit nga Institucionet Supreme të Auditimit (ISA) të vendeve të rajonit si Kosova, Shqipëria, Turqia, Maqedonia, Mali i Zi, Bosnja dhe Hercegovina si dhe Serbia, do të jenë pjesëmarrës në këtë projekt.

Qëllimi i këtij auditimi paralel me pjesëmarrje aktive të vendeve të rajonit është shkëmbimi i përvojave dhe vlerësimi i gjendjes në aspekt regjional. Në këtë punëtori u vu baza për punët në këtë auditim, është diskutuar për temën e auditimit, mënyrën e qasjes së parastudimit, fokusi në problemin e auditimit si dhe kriteret e auditimit.

Nga, Zyra e Auditorit të Përgjithshëm, në punimet e kësaj punëtorie morën pjesë, Fatlinda Ramosaj, Drejtor i Auditimit të Vlerës për Para në Prokurim, Arben Selimi, Udhëheqës e Ekipit dhe Donjetë Dreshaj, Auditore, si ekip i këtij auditimi paralel të performancës.

Punëtoria e radhës do të mbahet në Prishtinë, Kosovë, në qershor të këtij viti.

Besnik Osmani, Auditor i Përgjithshëm i Kosovës, ka pranuar letër urimi nga z. Mitrik, President i Institucionit Suprem të Auditimit të Republikës së Sllovakisë.

Në urimet e tij drejtuar z. Osmani, ai i ka dëshiruar sukses në përmbushjen e detyrave kaq të rëndësishme dhe specifike dhe ka shprehur interesimin e tij për bashkëpunim ndërmjet dy institucioneve.

Besnik Osmani, Auditor i Përgjithshëm i Kosovës, ka pranuar letër urimi nga Dr. Arunas Dulkys, Auditor i Përgjithshëm i Zyrës Kombëtare të Auditimit të Lituanisë.

Në urimin e tij, z. Dukys, fton z. Osmani, në bashkëpunim të mëtutjeshëm në mes Institucioneve Supreme të Auditimit, në kuadër të Komitetit të Kontaktit të BE-së, ONISA dhe EUROSAI.

Z. Vesel, ka uruar z. Osmani, dhe i ka dëshiruar sukses në arritjen e synimeve të tij në detyrën e re. Ai ka shprehur përkushtimin e tij për bashkëpunim ndërmjet dy institucioneve dhe më gjerë në komunitetin ndërkombëtarë të auditorëve.

"Ka një numër të konsiderueshëm çështjesh për të cilat ne mund të shkëmbejmë opinionet, pikëpamjet dhe ekspertizën, në vazhdën e bashkëpunimit ndërmjet institucioneve tona respektive" është shprehur z. Vesel, në letrën e tij.

Presidenti i Senatit të Institucionit Suprem të Auditimit të Malit të Zi, ka dërguar letër urimi për Auditorin e Përgjithshëm të Kosovës, Besnik Osmani.

Ai, ka shprehur dëshirën që bashkëpunimi ndërmjet Institucioneve Supreme të Auditimit të të dyja vendeve, të thellohet edhe më tutje dhe për një zhvillim të përbashkët brenda kornizave të ONISA dhe EUROSAI.

Në letrën e tij për Auditorin e Përgjithshëm të Kosovës, z. Migaud, ka dërguar urimet e tij dhe në emër të Gjykatës së Llogarive të Republikës së Francës, z. Osmani i dëshiron sukses në detyrën e re.

Ai ka shprehur dëshirën dhe vullnetin për bashkëpunim dhe për të forcuar raportet profesionale veçanërisht në ONISA dhe EUROSAI.

Kay Scheller, President i Institucionit Suprem të Auditimit të Gjermanisë, i ka dërguar letër urimi Auditorit të përgjithshëm të Kosovës, Besnik Osmani.

Z. Scheller, ka shprehur dëshirën për forcuar bashkëpunimin ndërmjet institucioneve dhe ka uruar zhvillim të mëtutjeshëm të Zyrës së Auditorit të Përgjithshëm në arritjen e rezultateve.

Në datat 13 dhe 14 prill 2016, në Beograd, është mbajtur punëtori dyditore mbi "Formimi i opinioneve të auditimit dhe trajtimi i materialitetit". Kjo punëtori u organizua në kuadër të Rrjetit të ISA-ve,  të shteteve  kandidate dhe kandidate të mundshme për në BE, me mbështetjen e Zyrës Kombëtare të Auditimit të Suedisë (SNAO) dhe SIGMA, si dhe Grupin për Aktivitete të Përbashkëta në Auditim (JWGAA). Mbështetje shtesë në organizimin e punëtorisë është dhënë edhe nga Projekti i UNDP-së.

Objektivi i kësaj punëtorie ishte që të shkëmbehen njohuri dhe praktika rreth formimit të Opinionit të Auditimit mbi paragrafin "Baza për Opinion" dhe "Materialiteti" në aspektin financiar dhe të pajtueshmërisë në raportet e auditimit mbështetur nga shembujt e praktikave të mira.

Rrjeti me përfaqësuesit e Institucioneve Supreme të Auditimit (ISA) nga Kosova, Shqipëria, Serbia, Bosnja dhe Hercegovina, Mali i Zi, Maqedonia dhe Turqia po vazhdon të kontribuoj në progresin dhe në bashkëpunimin mes këtyre institucioneve në shkëmbimin  e përvojave, praktikave, metodave dhe procedurave të punës.

Gjatë punëtorisë përfaqësuesit e ISA-ve pjesëmarrës u  prezantuan  në tema të caktuara dhe i shpalosën praktikat e tyre në implementimin e Standardeve Ndërkombëtare të Auditimit, ndërtimit të Metodologjisë së auditimit dhe dhënies së opinionit mbi Pasqyrat Financiare.

Zyra e Auditorit të Përgjithshëm të Kosovës në këtë punëtori është përfaqësuar nga auditorët: Aida Podrimaj dhe Mujë Gashi.

Ekspertët e SNAO-s, SIGM-ës dhe kolegët e vendeve tjera dhanë vlerësimet e tyre për punën e arritur në një kohë relativisht të shkurtër, duke sugjeruar disa përmirësime që do t'i shërbejnë veprimtarisë audituese  në të ardhmen.