Lajmet

Instituti Demokratik i Kosovës dhe Transparency Internacional Kosova kanë  publikuar raportin gjithëpërfshirës "Vlerësimi i sistemit të integritetit kombëtar në Kosovë" në të cilin vlerësohen mekanizmat kundër korrupsionit në 15 sektorë të shoqërisë që mbulojnë institucionet politike, institucionet e drejtësisë, institucionet e pavarura dhe institucionet jo qeveritare.

Nga ky hulumtim vlerësohet se në Kosovë legjislacioni kundër-korrupsionit është kryesisht adekuat, por në praktikë zbatimi i tij ka mbetur prapa, prandaj shumë çështje kanë mbetur për tu adresuar.

Ndërkohë që raporti i referohet  Zyrës së Auditorit të Përgjithshëm si një nga institucionet model i suksesshëm i integritetit dhe një potencial për të luftuar korrupsionin administrativ.

Auditori i Përgjithshëm në detyrë Z. Artan Venhari në konferencën përmbyllëse të këtij hulumtimi, vlerësoi lart punën për këtë hulumtim. Ndër të tjera ai tha se 'Ky raport ofron një pikë referimi ndër vite dhe indikatorë të qartë përmes të cilëve secili nga ne mund të vlerësojmë se sa jemi duke u zhvilluar apo stagnuar si institucione dhe sa jemi duke i përmbushur përgjegjësitë tona.'

Raporti përmban rekomandime për të adresuar dhe Instituti Demokratik i Kosovës kërkoj që ato të merren parasysh dhe të zbatohen.

Zyra e Auditorit të Përgjithshëm ka përfunduar Auditimin Paralel të Performancës1) dhe ka publikuar raportin “Sistemi për efiçiencë të energjisë ka nevojë për tu fuqizuar”.

Qëllimi i auditimit ishte vlerësimi nëse Qeveria ka krijuar bazën e nevojshme ligjore dhe sistemin organizativ për Efiçiencën e Energjisë (EE) në përputhje me marrëveshjen e BE-së dhe a zbatohet kjo bazë siç është synuar. Në raport identifikohen disa mangësi në procesin e realizimit të masave për EE dhe jepen rekomandime për përmirësimin e situatës. Entitetet e përfshira në këtë auditim janë: MZHE, AKEE, MAP, MAPL, MMPH dhe komuna e Drenasit, Gjakovës dhe Prizrenit.

Mënyra se si qeveritë janë duke shpenzuar paratë e tyre është temë diskutimi si në komunën më të vogël ashtu dhe në vendet më të mëdha. Megjithatë, ekziston një konsensus universal që fondet publike duhet të shpenzohen me maturi. Në këtë thelb, EE në sektorin publik është sinonim me menaxhim të mirë publik: kur kursehet energjia, kursehen edhe fondet publike. Pothuaj në secilin proces të realizimit të masave për EE ka mundësi përmirësimi.

Bazuar në analizat e thella të dëshmive të paraqitura nga entitetet dhe intervistat e kryera me zyrtarët përgjegjës, ne kemi identifikuar disa mangësi në procesin e marrjes së masave të EE. Institucionet qeveritare nuk kanë ndërmarrë veprimet e duhura për të përmirësuar EE-në në sektorin publik. Si rezultat i kësaj ne kemi nxjerrë rekomandime (shih kapitullin 5 të raportit) për nivelin qendror dhe lokal.

Ky proces auditimi deri në finalizimin e tij ka kaluar edhe në fazat e diskutimeve në nivel rajonal dhe janë shkëmbyer përvoja dhe janë bërë analiza e krahasime sa i përket EE në vendet përkatëse.

Grupi punues për Aktivitete të Përbashkëta në Auditim me përkrahjen e Zyrës Kombëtare të Auditimit të Suedisë kanë planifikuar organizimin një takimi përcjellës me vendet e përfshira në këtë auditim paralel dhe bashkë me entitetet e audituara të diskutohen masat e ndërmarra dhe niveli i adresimit të rekomandimeve.

___________________________________

1) Auditimi Paralel i Përformancës është projekt ku janë të përfshirë vendet e rajonit dhe që udhëhiqet nga Grupi Punues për Aktivitete të Përbashkëta në Auditim i Rrjetit të Institucioneve Supreme të Auditimit të vendeve të BE-së dhe vendeve kandidate dhe kandidate të mundshme për në BE. Ky projekt përkrahet nga Zyra Kombëtare e Auditimit të Suedisë. Në këtë auditim Kosova, Shqipëria dhe Bosnja e Hercegovina kanë qenë pjesëmarrëse aktive, përderisa vendet tjera të rajonit ishin vetëm si vëzhgues.

Në mbledhjen e mbajtur sot, Qeveria e Kosovës ka miratuar Projektligjin për Auditorin e Përgjithshëm dhe Zyrën Kombëtare të Auditimit të Republikës së Kosovës. Ky projektligj, ka për qëllim që të rregullojë organizimin, funksionimin dhe kompetencat e Auditorit të Përgjithshëm dhe Zyrës së Kombëtare të Auditorit të Përgjithshëm në Republikën e Kosovës për auditimin e fondeve publike, ekzekutimin e buxhetit, përdorimin dhe qeverisjen me burimet publike. Ky projektligj ndikon në ngritjen e nivelit të mbikëqyrjes së shpenzimit të parasë publike. Kjo do të reflektojë edhe në rritjen e nivelit të sundimit të ligjit në Kosovë. Projektligji synon të rritë nivelin e transparencës në funksionimin e Auditorit të Përgjithshëm si dhe do të harmonizojë definicionet e vjetruara me standardet ndërkombëtare.

Kosum Aliu-MF, Ali Sadriu-KMFP, Artan Venhari- ZAP; Bujar Leskaj- KLSH,  Nikola Kovacevic – ISA të Malit të Zi

Në datat 9 dhe 10 korrik 2015, Zyra e Auditorit të Përgjithshëm, ka mbajtur Konferencën e VII-të Vjetore të Zyrës. Kjo konferencë është një mjet për të festuar sukseset e arritura, identifikuar anët e forta dhe të dobëta dhe për të nxjerr në pah veprimet që duhet ndërmarrë për përmirësimet e nevojshme dhe zhvillimin e sektorit publik.

Në konferencë ishin të pranishëm përfaqësues nga Kuvendi i Kosovës, Qeveria, partnerë nga shoqëria civile dhe mediat si dhe partnerët tanë ndërkombëtarë nga Institucionet Supreme të Auditimit nga Shqipëria, Mali i Zi, dhe Suedia.

Zv. Auditori i Përgjithshëm, Z. Artan Venhari, hapi punimet e konferencës duke theksuar se fokusi kryesor gjatë dy ditëve të konferencës do të përqendrohej në rezultatet e arritura nga auditimi i jashtëm në raport me pritshmërinë e Kuvendit, Qeverisë, palëve të interesit dhe publikut si dhe format dhe tematikat e bashkëpunimit rajonal në fushën e auditimit.

Në fjalën e tij z. Venhari po ashtu theksoi se duhet të marrim parasysh gamën e mjeteve të vlerësimit dhe auditimit si dhe aftësitë e stafit për të maksimizuar ndikimin tonë në përmirësimin e performancës së sektorit publik ndërkohë që zhvillojmë fushëveprimin e punës tonë në auditim; dhe mënyrën se si shërbimet tona mund të jenë aq fleksibile sa t’i përshtaten një mjedisi që ndryshon shpejt dhe unik duke i balancuar presionet për vlerën për para dhe kohën e volitshme me rishikimet gjithëpërfshirëse dhe angazhimet efektive.

Në ditën e parë të punimeve të pranishmëve me fjalë rasti u janë drejtuar edhe Z. Ali Sadriu nga Komisioni për Mbikëqyrje të Financave Publike të Kuvendit të Kosovës; Z. Kosum Aliu nga Njësia Qendrore Harmonizuese e Auditimit të Brendshëm në Ministrinë e Financave; Z. Naim Ismaili nga Asociacioni i Komunave të Kosovës; Adrijana Hodzic nga Zyra Administrative për Mitrovicën e Veriut; Florina Ujupi nga BIRN; Bujar Leskaj nga Kontrolli i Lartë i Shtetit të Shqipërisë dhe Nikola Kovacevic nga Senati i Institucionit Supreme të Auditimit të Malit të Zi.

Një vlerë të veçantë punimeve në konferencën vjetore të ZAP-it i japin grupet punuese, që u mbajtën pasditen e ditës së parë dhe gjatë ditës së dytë të konferencës. Në këto grupe punuese zhvillohen debate, propozime dhe konkluzione që nxirren lidhur me temat me interes e që kësaj radhe ishin: të kuptohet konteksti; të qenit në hap me ndryshimet në pritshmëri; të qenit i rëndësishëm; sigurimi i cilësisë dhe kryerja me kohë e operacioneve; marrja e impakteve më të mira; promovimi i qeverisjes së mirë në dizajnimin e sistemit dhe implementimi; dhe të qenit një model. Tashmë është bërë traditë që në grupet punuese të përfshihen edhe Auditor nga Kontrolli i Lartë i Shtetit dhe kësaj radhe pjesë aktive e këtyre grupeve ishin edhe 15 auditor ku ndanë përvojën dhe praktikat e tyre në auditimet financiare dhe të performancës dhe dhanë kontributin e tyre në diskutimet lidhur me temat e përcaktuara.

Në kuadër të konferencës një takim i veçantë u mbajt nga menaxhmenti i zyrës me mysafirët nga Shqipëria dhe Mali i Zi ku u bisedua për bashkëpunimet e mundshme dhe krijimin e grupeve të përbashkëta punuese në identifikimin e sfidave dhe nevojave të përbashkëta.

Në mbrëmjen e 9 korrikut u organizua darkë solemne për nder të ish Auditorit të Përgjithshëm Z. Lage Olofsson me ç’ rast ju nda mirënjohje e veçantë në shenjë falënderimi për kontributin e tij dhënë për Zyrën e Auditorit të Përgjithshëm, auditimin e jashtëm dhe sektorin publik në përgjithësi në Kosovë, gjatë pesë viteve të mandatit të tij.

Një delegacion nga Kosova i përbërë nga përfaqësues të MAPL, ZAP, Asociacioni I Komunave dhe Projekti DEMOS, nga data 7-13 Qershor 2015, kanë marrë pjesë në një vizitë studimore në institucionet publike në Wales të Britanisë së Madhe. ZAP në këtë vizitë është përfaqësuar nga z. Qerkin Morina, Ndihmës i Auditorit të Përgjithshëm, dhe z. Bujar Sejdiu, Drejtor i Departamentit për Qeverisjen Lokale. Kjo vizitë ka pasur për qëllim zhvillimin dhe avancimin e Sistemeve të Menaxhimit të Performancës në Kosovë,

Vizita është organizuar nga Projekti DEMOS (Programi për Decentralizim dhe Mbështetje Komunave) që financohet nga HELVETAS Swiss Intercooperation.

Qëllimi i kësaj vizite ishte njoftimi me organizimin dhe praktikat e zbatuara nga institucionet e Wales-it lidhur me Sistemin e Menaxhimit të Performancës në autoritetet lokale. Gjatë prezantimeve nga zyrtarët e institucioneve në fjalë (Këshillat e Qyteteve apo komunat, Asambleja dhe Qeveria e Wales-it, Zyra e Auditimit të Wales-it, Këshilli Britanik dhe Shkolla e Biznesit në Cardiff), janë paraqitur strukturat organizative, forma e menaxhimit, mënyra e raportimit dhe roli i Auditorit të Përgjithshëm në procesin e Menaxhimit të Performancës. Përveç kësaj, janë zhvilluar biseda inter-aktive ku përfaqësuesit e Republikës së Kosovës kanë pasur rastin që të njoftohen për së afërmi me aktivitetet që zhvillohen në këtë vend për të siguruar që qytetarët marrin shërbime cilësore si dhe mbajtja e zyrtarëve  llogaridhënës para të gjitha palëve të interesit në një kohë kur i tërë globi po ballafaqohet me shtimin e kërkesave për performancë cilësore të shërbimeve në njërën anë, ndërsa në anën tjetër po imponohen shkurtime të vazhdueshme të burimeve dhe fondeve.

Me gjithë progresin e bërë në Republikën e Kosovës, nga mësimi i marrur në këtë vizitë është konkluduar që është e nevojshme organizimi i disa punëtorive brenda vendit duke përfshirë edhe institucione tjera, përveç atyre pjesëmarrëse në vizitë, për të krijuar një dokument strategjik duke u bazuar në praktikat e mësuara, i cili do të shërbente si bazë për vendosjen dhe/apo avancimin e sistemeve ekzistuese në vendin tonë për menaxhimin e performancës.

Roli i Zyrës së Auditorit të Përgjithshëm në zhvillimin e tërë sistemit do të fokusohet në validimin/vlerësimin e procesit në mbledhjen dhe raportimin e të dhënave, si dhe cilësinë e indikatorëve të publikuar nga autoritetet qendrore dhe lokale. ZAP çmon organizimin e kësaj vizite dhe i konsideron shumë frytdhënëse praktikat dhe mësimet e marra me qëllim të ofrimit të shërbimeve dhe produkteve sa më cilësore për qytetarët e Republikës së Kosovës. 

Zyra e Auditorit të Përgjithshëm së bashku me partnerët e vetë nga Zyra Kombëtare e Auditimit të Britanisë së Madhe, Gjykata e Auditimit të Holandës dhe Zyra e Auditimit të Estonisë, sot ka mbajtur konferencën përmbyllëse të Projektit të Binjakëzimit “Mbështetja e mëtutjeshme për Zyrën e Auditorit të Përgjithshëm të Kosovës në arritjen e praktikave të mira dhe standardeve të BE-së”, në vlerë prej 1.5 milion eurosh dhe financuar nga Bashkimi Evropian. Projekti ka implementuar një program prej katër komponentëve të rëndësishme që mbështesin zyrën në kryerjen e auditimeve më cilësore dhe përmirësimin organizativ: Cilësia në audtime individuale; Cilësia në qeverisje korporative; Efektiviteti në procese të auditimit dhe Qëndrueshmëria Institucionale. E gjithë kjo ndikon në shfrytëzimin më të mirë të parasë publike dhe sisteme të zgjeruara të kontrollit financiar.

Konferenca u hap nga Zëvendës Auditori i Përgjithshëm, Artan Venhari, i cili u shpreh i kënaqur me punën që është bërë nga të dyja palët gjatë implementimit të Projektit dhe theksoi se fokusi kryesor ka qenë në ngritjen e cilësisë, çka ka ndikuar edhe në ngritjen e nivelit të llogaridhënies së Institucioneve Publike në Kosovë.

Z. David Goldsworthy nga Zyra Kombëtare e Auditimit të Britanisë së Madhe dhe Z. Andre Van Ommeren nga Gjykata e Auditimit të Holandës, reflektuan mbi të arriturat e projektit.

Me fjalën e tyre të pranishmëve ju drejtuan edhe Ambasadori i Britanisë së Madhe, Z. Ruari O’Connell; Ambasadori i Holandës, Z. Robert Bosch; Z. Ali Sadriu nga Komisioni për Mbikëqyrjen e Financave Publike – Kuvendi i Kosovës; dhe Z. Thomas Gnocchi nga Zyra e BE-së në Kosovë. 

Artan Venhari, Zëvendës Auditor i Përgjithshëm, ka prezantuar në seancë plenare në Kuvendin e Kosovës, Raportin Vjetor të Auditimit për vitin financiar 2013.

Në fjalën e tij drejtuar deputetëve, z. Venhari tha se ky raport ka për qëllim të ofrojë një bazë për Kuvendin që shpenzuesit buxhetor t’i mbajë llogaridhënës. Për të arritur një fotografi të qartë, ne kemi kryer 102 auditime të rregullsisë, performancës dhe fondeve të donatorëve. Fokusi ynë kryesor ka qenë që të fuqizojmë: Llogaridhënien – lidhur me mënyrën se si është menaxhuar shpenzimi i parasë publike me paratë e besuara; Transparencën – se si janë administruar ato para dhe të mbështetet llogaridhënia; dhe Vlera për Para – përdorimi efektiv dhe ekonomik i fondeve.

Opinioni i përgjithshëm i auditimit për cilësinë e informacionit në BK / PVF ishte:

“Pasqyrat Vjetore Financiare të Buxhetit të Republikës së Kosovës prezantojnë, në të gjitha aspektet materiale, një pamje të drejtë dhe të vërtetë të gjendjes financiare për vitin e përfunduar më 31 dhjetor 2013”

Ndërsa si Theksim i Çështjes ne tërheqim vëmendjen tuaj tek prezantimi i pasaktë i pasurisë mbi 1,000€. Proceset joefektive për identifikimin e vlerave të pasurive në secilën OB dhe proceset jo të plota të konsolidimit të pasurive në kuadër të Ministrisë së Financave në lidhje me BK-në ka rezultuar me mos përfshirjen e vlerave materiale të pasurive në BK. (ISSAI 200 Opinion i pamodifikuar me theksim të çështjes)

Më tej ai shpalosi një numër të sfidave të identifikuara në raport, dhe që është e rëndësishme që Kuvendi të ketë mekanizma mbikëqyrjeje shumë të përforcuar. Një nga sfidat që duhet adresuar janë një numër mangësive të identifikuara në komuna si problemet me trajtimin e borxheve të mbledhura, mangësitë në kontrollin e brendshëm si dhe adresimin e rekomandimit nga raporti i kaluar për ri-vendosjen e funksionit të menaxherit ekzekutiv, përgjegjës për ofrimin e shërbimeve ndaj qytetarëve.

Raporti Vjetor i Auditimit për vitin 2012 bashkë me rekomandimet e Komisionit për Mbikëqyrje të Financave Publike, është mbështetur nga të gjitha partitë politike. 

Sot, para deputetëve të Kuvendit të Kosovës, Zv. Auditori i Përgjithshëm Artan Venhari, do të prezantojë Raportin Vjetor të Auditimit për vitin financiar 2013.

Ky raport shpalos informata shume të rëndësishme dhe mbulon zbatimin që Qeveria i ka bërë buxhetit dhe pasqyrave financiare të buxhetit të Kosovës për atë periudhë.

Sipas rendit të ditës të përcaktuar nga Kryesia e Kuvendit për këtë seancë, shqyrtimi i Raportit Vjetor të Auditimit të Zyrës së Auditorit të Përgjithshëm do të jetë në pikën 25 të rendit të ditës. 

Zyra e Auditorit të Përgjithshëm ka publikuar raportin e auditimit të performancës “Aktivitetet e Policisë së Trafikut dhe Sigurisë në trafikun rrugor” që në mënyrë të veçantë e adreson efikasitetin dhe efektivitetin e aktiviteteve të Policisë së Kosovës.

Ky auditim është përqendruar në vlerësimin nëse patrullimet e policisë së trafikut janë të bazuara në rrezik, të menaxhuara në mënyrë efektive dhe efikase duke u bazuar në informata të besueshme, të përditësuara dhe relevante. Raporti i auditimit nxjerr përfundimin se ka mjaft hapësirë për përmirësim për ta bërë policimin e trafikut plotësisht efektiv.

Policia e trafikut mund të bëjë edhe më shumë për të përmirësuar aktivitetet e saj; t’i përdorë informatat në mënyrë efektive si dhe t’i planifikojë burimet. Kontrollet duket se janë pjesërisht të bazuara në rrezikshmëri, por cilësia e të dhënave nuk lejon të theksojmë se policia e trafikut në Kosovë - në mënyrë sistematike - është duke i kryer kontrollet efektive në aspektin e vendeve dhe të kohës.

Aksidentet në trafik janë ndër shkaktarët kryesor të vdekjeve, lëndimeve të njerëzve dhe dëmtimit të pronës në Kosovë. Kostot e drejtpërdrejta ekonomike të aksidenteve të trafikut në Kosovë janë vlerësuar se përfaqësojnë rreth 1.2% të Bruto Prodhimit të Brendshëm ndërsa gjendja e sigurisë në trafik është konsideruar shqetësuese edhe në Raportin e Progresit për vitin 2014 i cili është publikuar së fundi nga BE-ja.

Të gjeturat kryesore i gjeni në faqet 9-24, ndërsa ne rekomandojmë Drejtorin e Përgjithshëm të Policisë së Kosovës, që:

• Të merr një iniciativë për përmirësimin e sistemit ekzistues të informimit dhe ta bëjë atë plotësisht efektiv;
• Të përmirësojë përdorimin e të dhënave në mënyrë që të qartësojë planifikimin vjetor dhe të vendosë objektiva performance të qarta, për njësi operative;
• Të konsiderojë caktimin e më shumë politikave të policisë së trafikut dhe të ri-konsiderojë alokimet ndërmjet njësive të ndryshme të policisë së trafikut;
• Të sigurojë se një plan investimi kost-efektiv për pajisje është hartuar;
• Policia e trafikut të përqendrohet së pari në detyrat e tyre kryesore: parandalimi i aksidenteve dhe të përmirësojë bashkëpunimin ndërmjet funksioneve të ndryshme policore në nivel rajonal;
• Të sigurohet që aktivitetet e policisë së trafikut janë kryer në rrugë dhe vende të rrezikshme; dhe
• Të sigurohet që policia e trafikut të përqëndrohet edhe në sjelljet e tjera të ngasësve përveçse te tejkalimi i kufizimit të shpejtësisë.

Komunikata për Media dhe raporti janë në dispozicion nga data e publikimit në:

http://www.oag-rks.org ? Facebook 

Në datat 19-20 mars 2015, organizuar nga Gjykata e Auditimit të Sllovenisë, në Lubjanë, u zhvilluan takimet e radhës të Rrjetit të ISA-ve të vendeve anëtare të BE-së, Kandidate dhe Kandidate të mundshme për në BE, me pjesëmarrjen e ECA-s dhe SIGMA-s, si dhe bashkëpunimin e JWGAA (Grupi punues për aktivitete të përbashkëta në auditim). Zyra e Auditorit të përgjithshëm në këtë takim u përfaqësua nga Qëndresa Mulaj, Zyrtare Ndërlidhëse.

Takimi i Rrjetit të vendeve anëtare të BE-së, u kryesua nga ISA-i slloven, me ç’rast Auditori i Përgjithshëm, z. Tomas Vesel mbajti një fjalë mirëseardhje. Ndërsa takimi i Rrjetit të vendeve kandidate dhe kandidate të mundshme për në BE, me pjesëmarrjen e ECA-s dhe SIGMA-s si dhe bashkëpunimin e JWGAA, u kryesua nga ISA-i i Shqipërisë, znj. Irena Islami dhe znj. Dëshira Huqi.

Gjatë këtij takimi u diskutua lidhur me aktivitetet e planifikuara për tu zhvilluar në të ardhmen sipas planit të punës miratuar në takimin e Budva-s. Këto aktivitete janë: Punëtori mbi materialitetin dhe metodat e kampionimit, për t’u mbajtur në Shqipëri; dhe Tryeza e rrumbullakët mbi raportet dhe opinionet e auditimit, për t’u mbajtur në Serbi, të dyja brenda vitit 2015, si dhe Konferenca mbi rolin e ISA-ve në luftën kundër mashtrimit dhe korrupsionit, për t’u mbajtur në Bosnje dhe Hercegovinë; dhe Konferenca mbi kuadrin analitik, për t’u mbajtur në Turqi, në vitin 2016 për shkak të specifikave dhe çështjeve organizative.

Po ashtu u raportua për të arriturat e deritanishme të SAI-ve pjesëmarrëse në PPA I (auditimin paralel të performancës), ku z. Budulac, udhëheqës i JWGAA dhe përfaqësuesi i SNAO u shprehën të kënaqur me punën e deritanishme. Vendet pjesëmarrëse aktive në këtë auditim, Kosova, Bosnje Hercegovina dhe Shqipëria duhet të dorëzojnë draft raportet e tyre në fillim të muajit maj dhe të njëjtat do të diskutohen në punëtorinë përmbyllëse për këtë projekt që do të mbahet në Luksemburg me 19-21 maj, 2015. U diskutua edhe mundësia e vazhdimit të PPA II, me qëllim që të gjitha SAI-t e vendeve të rajonit të jenë pjesëmarrës aktiv në këtë projekt. 

Zyra e Auditorit të Përgjithshëm ka publikuar raportin e auditimit të performancës “Sistemi i Prokurimit në Sektorin Shëndetësor” i cili adreson në mënyrë specifike menaxhimin e Prokurimit në Sektorin Shëndetësor.

Shpenzimet në sektorin e shëndetësisë përmes procesit të prokurimit pergjatë tri viteve ishin rreth 115 milion euro. Në anën tjertër në vitin 2013 filloi të zbatohet reforma përmbajtësore e sistemit ekzistues shëndetësor bazuar në një strategji të re për sektorin shëndetësor dhe legjislacionin përkatës. Kjo reformë parasheh riorganizimin e plotë të sistemit duke përfshirë edhe përgjegjësitë në fushën e prokurimit.

Pasi që në vazhdimësi janë paraqitur mangësi në menaxhimin e prokurimit në sektorin shëndetësor përmes këtij auditimi jemi munduar të japim kontribut për zgjidhje të problemeve të prokurimit në sistemin e ri shëndetësor duke analizuar shkaktarët e sfidave aktuale dhe se si këto të merren parasysh me rastin e dizajnimit të sistemit të ri.

Përfundimet:

• Aktualisht Ministrisë i mungon një strategji e prokurimit e shkruar, artikuluar dhe komunikuar qartë përgjatë gjithë organizatës e veçënarisht tek stafi i sektorit të prokurimit;
• Ministria ka magësi në vlerësim të nevojave dhe ato duhet të adresohen që prej fazës së cilësisë së të dhënave deri tek vendimarrja;
• Menaxhmi i kontratave duhet të bëhet në mënyrë më efektive që do të parandalojnë vonesat e ekzekutimit. Kjo ndërlidhet me planifikim dhe delegim të duhur të menaxhimit të kontratave;
• Komiteti i Auditimit duhet të jetë më efektiv dhe të luajë rol proaktiv ne kërkim të llogaridhënies nga Menaxhmenti për adresim të rekomandimeve;
• Të zhvillohen çasje për të rritur vlerën për para gjatë zhvillimit të procedurave të prokurimit;
• Secila reformë duhet të fillojë pas një studimi të mirëfilltë të sfidave të mëhershme dhe të mësuarit prej praktikave të mira. Në të njëjtën kohë duhet të sigurojë resurset e duhura për implemetim; dhe
• Përveç këtyre të lartëpërmendurave, të gjitha ndryshimet duhet të komunikohen përgjatë gjithë organizatës.

Komunikata për Media dhe raporti janë në dispozicion nga data e publikimit në:

http://www.oag-rks.org,     Facebook

Nisur nga iniciativa e Zyrës së Auditorit të Përgjithshëm për të filluar një debat rreth asaj se si mund të përdoren në Kosovë indikatorët kyç të performancës për ta zhvilluar përmirësimin e performancës, sot u mbajt konferencë diskutimi, organizuar në bashkëpunim edhe me Ministrinë e Financave, Ministrinë e  Administrimit të pushtetit Lokal dhe Associacionit të Komunave. 

Në këtë takim morën pjesë dhe u paraqiten me fjalimet e tyre Zëvendës Auditori i Përgjithshëm Artan Venhari, Ministri i Financave Besim Beqaj, Sekretari i Përgjithshëm i Ministrisë së Administrimit të Pushtetit Lokal Besnik Osmani, Drejtori Ekzekutiv i Asociacionit të Komunave të Kosovës Sazan Ibrahimi, dhe Drejtori i Departamentit të Buxhetit të Komunave në Ministrinë e Financave Petrit Popova. 

Dokumenti “Performanca financiare dhe shërbimi i ofruar në komuna në vitin 2013 - të dhëna krahasuese dhe indikatorë të performancës” i Zyrës së Auditorit të Përgjithshëm, prezantuar nga Qerkin Morina Ndihmës Auditor i Përgjithshëm ishte tema kyçe e Konferencës.

Përgatitja e këtij dokumenti dhe nxitja e debatit lidhur me të ka për qëllim nxerrjen e konkluzioneve se si mund të përdoren më mirë buxhetet komunale në shërbim të qytetarëve. 

Të pranishëm në Konferencë ishin edhe Kryetarët e Komunave, Drejtorë për Buxhet dhe Financa dhe Zyrtarë tjerë komunalë si dhe donatorë dhe ekspertë ndërkombëtar.