Lajmet

Delegacioni i Zyrës Kombëtare të Auditimit, në mesin e shumë vendeve tjera, po merr pjesë në Konferencën Shkencore me temën “Auditimi mbi bazën e rrezikut” që është organizim i përbashkët i Byrosë Shtetërore të Auditimit  të Kuvajtit dhe Kontrollit të Lartë të Shtetit të Shqipërisë. Në këtë konferencë janë prezantuar përvojat dhe praktikat më të mira të institucioneve supreme të auditimit lidhur me auditimin mbi bazën e rrezikut, rrezikun institucional dhe menaxhimin e të dhënave masive dixhitale (Big data). Në një takim të vecantë mes Auditorit të Përgjitshëm të Kuvajtit z. Adel Abdulaziz Al-Sarawi dhe Auditorit të Përgjitshëm të Kosovës, z. Besnik Osmani, dy krerët e institucioneve janë dakorduar për format konkrete të bashkëpunimit dhe shkëmbimit të përvojave në fushën e auditimit, sidomos në përparimin e auditimeve të përformancës, përdorimit të të dhënave masive për qëllimet e auditimit sikurse edhe auditimet e sektorit bankar. Z. Ilir Salihu, Zëvendës i Auditorit të Përgjitshëm dhe Liridona Berisha, Auditore, në emër të Zyrës Kombëtare të Auditimit kanë prezentuar dy analiza lidhur me sfidat dhe teknikat e auditimit mbi bazën e rrezikut si dhe gjendjen reale mbi rreziqet me të cilat përballen institucionet supreme të auditimit – rasti i Zyrës Kombëtare të Auditimit të Kosovës. Gjatë kësaj Konference janë prezentuar përvojat e institucioneve supreme të auditimit të vendeve pjesëmarrëse si dhe të institucioneve tjera nga Kuvajti. Konferenca pritet të nxjerr një numër të rekomandimeve dhe produktet e prezentuara do të botohen me qëllim të promovimit të auditimit dhe përdorimit të gjerë edhe nga institucionet tjera supreme të auditimit.

Auditori i Përgjithshëm, z. Besnik Osmani ka pritur në vizitë zyrtare anëtarët Komisionit për Mbikëqyrje të Financave Publike (KMFP) të Kuvendit të Kosovës, të udhëhequr nga z. Driton Selmanaj, Kryetar i Komisionit. Qëllimi i vizitës ishte thellimi i bashkëpunimit dhe koordinimi ndërinstitucional për shqyrtimin e raporteve të auditimit për vitin financiar 2017 dhe rritjen e ndikimit të Kuvendit si organ mbikëqyrës ndaj organizatave buxhetore për zbatimin e rekomandimeve të dhëna në raportet e auditimit. Auditori i Përgjithshëm ka njoftuar anëtarët e Komisionit me progresin në zbatimin e planin të punës dhe sfidat në procesin e auditimit. Me këtë rast z. Osmani ka shprehur shqetësimin e tij se pavarësisht se raportet e auditimit ofrojnë informacion të bollshëm dhe të besueshëm për ekzekutivin dhe organet vendimmarrëse, niveli i zbatimit të rekomandimeve dhe veprimet e ndërmarra nga institucionet kompetente është i ulët. Lidhur me këtë, z. Osmani theksoi se kontributi i Kuvendit të Kosovës për ngritjen e llogaridhënies së zyrtarëve publik është i pazëvendësueshëm. Ai më pas shtroi nevojën e krijimit të mekanizmave efektiv ligjor për zbatimin e rekomandimeve të auditimit nga institucionet e vendit, me qëllim të rritjes së efikasitetit dhe përmirësimit të qeverisjes në administratën publike. Z. Osmani, po ashtu  ka njoftuar deputetët që ZKA është në finalizim të planit strategjik përmes të cilit synon që të rrisë fokusin në auditimet e performancës për të qenë në hap me  trendet e zhvillimit si dhe për të përmbushur nevojën e shtuar për auditime të performancës. Z. Selmanaj tha se Komisioni për Mbikëqyrje të Financave Publike vlerëson lartë punën e ZKA-së dhe se janë mirënjohës që ka trajtuar kërkesat e KMFP për auditimin e performancës së Sistemit Informativ Shëndetësor (SISH) dhe të Radio Televizionit të Kosovës (RTK). Ai tha se, KMFP e ka vlerësuar si shumë profesional raportin e ZKA-së për SISH-in, i cili ka pasqyruar një gjendje shqetësuese me këtë sistem dhe pret që edhe raporti për RTK-në të përfundoj sa më shpejtë. Kryetari Selmanaj është interesuar edhe për statusin e dy kërkesave të fundit te KMFP për auditimin e procesit të privatizimit dhe zbatimit të kontratës për distribucionin dhe furnizim me energji si dhe për auditimin e subvencioneve në fushën e bujqësisë. Auditori i Përgjithshëm është zotuar që do të trajtoj me seriozitet kërkesat që vijnë nga KMFP për auditime shtesë dhe do t’i adresoj ato me kohë, varësisht nga kapacitetet njerëzore dhe profesionale që ka ZKA. Në lidhje me këtë, z.Osmani theksoi se është e rëndësishme që të iniciohen ndryshime në Ligjin për Auditorin e Përgjithshëm dhe Zyrën Kombëtare të Auditimit në mënyrë që të krijohet mundësia për më shumë auditime të performancës dhe auditime të bazuara në rrezik. Anëtarët e KMFP shprehën gatishmërinë që të iniciojnë plotësim-ndryshimin e ligjit.

Auditori i Përgjithshëm i Republikës së Kosovës, z. Besnik Osmani, priti sot në vizitë bilaterale një ditore z. Naser Ademi, ushtrues detyre i Auditorit të Përgjithshëm të Republikës së Maqedonisë, me bashkëpunëtorë. Në takimin e dy delegacioneve është biseduar për bashkëpunimin bilateral dhe forcimin e mëtutjeshëm të marrëdhënieve në mes të dy institucioneve supreme të auditimit, dhe formalizimin e këtij bashkëpunimi me një marrëveshje bilaterale. Me këtë rast, z. Osmani dhe z. Ademi, u pajtuan që të zhvillohet një program i aktiviteteve të përbashkëta me qëllim të shkëmbimit të përvojave institucionale, si në fushën e metodologjisë, të kualifikimit profesional, të automatizimit të procesit të auditimit, të bashkëpunimit me organet legjislative dhe ekzekutive, etj. Në kuadër të vizitës në Kosovë, delegacioni i Zyrës Shtetërore të Auditimit të Republikës së Maqedonisë do të zhvilloj takime edhe me zyrtarë të lartë në Ministrinë e Financave dhe Ministrinë e Administrimit të Pushtetit Lokal.

Zbatimi i SISH larg synimeve të parashikuara Në ambientet e Bibliotekës Kombëtare “Pjetër Bogdani”, në prani të zyrtarëve të Qeverisë, përfaqësuesve të shoqërisë civile, të organizatave ndërkombëtare dhe të mediave, Zyra Kombëtare e Auditimit (ZKA), e ka bëtë prezantimin e raportit të auditimit të performancës “Efikasiteti dhe efektiviteti në implementimin e sistemit informativ unik të integruar shëndetësor”. Raporti konkludon se zbatimi i Sistemit Unik të Integruar Shëndetësor në vend karakterizohet me vështirësi në koordinimin e aktiviteteve ndërmjet institucioneve të përfshira në zbatim, ndërkaq, procesi i menaxhimit të zbatimit të këtij sistemi karakterizohet me parregullsi. Duke folur në hapje të këtij prezantimi, Ilir Salihu, Zëvendës Auditor i Përgjithshëm, tha se synimi i këtij auditimi ka qenë që të ofroj rekomandime adekuate që do t’i mundësojnë Ministrisë së Shëndetësisë dhe institucioneve tjera relevante që të sigurojnë që Sistemi Informativ Shëndetësor të jetë funksional dhe të mundësoj vazhdimin dhe shtrirjen e tij në të gjithë territorin e vendit tonë. Salihu më tej theksoi përkushtimin e Auditorit të Përgjithshëm dhe të ZKA-së për të krijuar një partneritet të fuqishëm me shoqërinë civile dhe mediat dhe iu bëri thirrje atyre që të kenë një vështrim sa më kritik për cilësinë e produkteve të ZKA-së. Ai po ashtu kërkoi nga Qeveria dhe subjektet e audituara që të rrisin përkushtimin e tyre për zbatimin e rekomandimeve të auditimit, me qëllim që të përmirësojnë qeverisjen dhe menaxhimin e parasë publike. Ndërkaq, nga Kuvendi dhe komisionet parlamentare kërkoi që të rrisin numrin e raporteve të auditimit që shqyrtohen në komisionet parlamentare me qëllim të rritjes së llogaridhënies së zyrtarëve publik. Znj. Myrvete Gashi, drejtore e Departamentit për Auditime të Performancës, foli në pika të shkurtra për raportin e auditimit mbi “Efikasitetin dhe efektivitetin në implementimin e sistemit informativ unik të integruar shëndetësor”, ndërsa prezantimin e këtij raporti e bënë z. Labinot Sadiku, udhëheqës i ekipit auditues dhe z. Elvin Mala, Auditor i Sistemeve të TI-së. Prezantimi i sotëm është i pari i këtij lloji dhe ZKA ka planifikuar që të organizoj dëgjime të tilla publike me aktorët kryesorë të përfshirë në proceset e auditimit, me anëtarë të komisioneve parlamentare, si dhe përfaqësues të shoqërisë civile dhe të mediave, për secilin raport të auditimit të performancës. Qëllimi është që të bëhet sa më transparente puna audituese dhe të sqarohen gjetjet dhe rekomandimet për publikun e gjerë, në mënyrë që të mos ketë keqkuptime dhe keqinterpretime. Raporti është i publik në uebfaqen e internetit të ZKA-së në ketë link: http://www.zka-rks.org/wp-content/uploads/2017/12/Raporti_auditimit_-SISH_shq.pdf

Auditori i Përgjithshëm i Republikës së Kosovës, Besnik Osmani, është pritur në takim pune nga z. Gene Dodaro, Auditor i Përgjithshëm i Shteteve të Bashkuara të Amerikës. Takimi në mes të dy Auditorëve të Përgjithshëm u zhvillua në një frymë miqësore dhe u fokusua në mundësitë e bashkëpunimi konkret. Me theks të veçantë janë trajtuar çështjet e bashkëpunimit për ngritjen e mëtejme të kapaciteteve profesionale të Zyrës Kombëtare të Auditimit në lidership, auditime të përformancës si dhe zbulimin e aktiviteteve korruptuese dhe të mashtrimit. Z. Dodaro e ka njoftuar z.Osmani me punën e Institucionit Suprem të Auditimit të SHBA-ve (GAO), sistemin amerikan të mbikëqyrjes së shpenzimit të parasë publike, marrëdhëniet me Kongresin dhe llogaridhënien qeveritare. Ai e ka vlerësuar progresin e Zyres Kombëtare të Auditimit (ZKA) dhe ka shprehur konsideratën e tij për punën e bërë nga ky institucion. Z. Dodaro e ka siguruar Auditorin e Përgjithshëm të Republikës së Kosovës që do të ofrojnë përkrahjen e nevojshme në procesin e transformimit të mëtejshëm të ZKA-së, ngritjen e kapaciteteve profesionale për rritjen e portfolios së auditimeve të performancës si dhe zbulimin e aktiviteteve të mashtrimit dhe korrupsionit. Z. Osmani nga ana tjetër e informoi z, Dodaro për rolin dhe mandatin e Zyrës Kombëtare të Auditimit të Republikës së Kosovës, ndikimin e auditimit në rritjen e llogaridhënies në administratën publike të Kosovës dhe objektivat strategjike të Zyrës Kombëtare të Auditimit që kanë për qëllim përmirësimin e qeverisjes në administratën publike dhe zbatimin e praktikave të mira në fushën e menaxhimit të financave publike. Gjatë takimit është diskutuar edhe për mundësitë e integrimit të Zyres Kombëtare të Auditimit në institucionet ndërkombëtare të auditimit, me qëllim të përfitimit nga programet për ngritjen e kapaciteteve profesionale dhe zbatimit të standardeve ndërkombëtare të auditimit. Auditori i Përgjithshëm i SHBA-ve theksoi se roli i Institucionit Suprem të Auditimit të SHBA-ve në mekanizmat ndërkombëtar të auditimit është i rëndësishëm dhe shprehu gatishmërinë për të përkrahur aspiratat e Zyres Kombëtare të Auditimit për t’u bërë pjesë e familjes ndërkombëtare të auditimit të jashtëm. Ky takim ka inauguruar edhe bashkpunimin konkret midis dy institucioneve për faktin që dy auditorë të Zyrës Kombëtare të Auditimit të Kosovës filluan programin intensiv katër mujor të kombinuar të ligjëratave dhe punës praktike profesionale në Institucionin Suprem të Auditimit të Shteteve të Bashkuara të Amerikës, në mesin e 21 auditorëve nga mbarë bota që janë pjesë e këtij programi. Vizita e delegacionit të Zyrës Kombëtare të Auditimit vazhdon me takimet tjera në Thesarin Amerikan, Departamentin e Shtetit të Shërbimeve Fiskale, Fondin Monetar Ndërkombëtar dhe USAID. Auditori i Përgjithshëm në këtë vizitë po shoqërohet nga bashkëpunëtoret, Vlora Spanca dhe Qëndresa Mulaj.

Zyra Kombëtare e Auditimit, më 22 mars 2018 (e enjte) nga ora 10:00-12:00 do ta bëjë prezantimin e raportit të auditimit të performancës “Efikasiteti dhe efektiviteti në implementimin e sistemit informativ unik të integruar shëndetësor”. Ky prezantimi do të mbahet në amfiteatrin e Bibliotekës Kombëtare “Pjetër Bogdani”. Në këtë prezantim të ftuar janë edhe deputetë të Kuvendit të Kosovës nga Komisioni për Shëndetësi dhe Komision për Mbikëqyrje të Financave Publike, përfaqësues të Ministrisë së Shëndetësisë, shoqërisë civile, mediave, organizatave ndërkombëtare, si dhe do të jetë i hapur për publikun.

Auditori i Përgjithshëm i Kosovës, z. Besnik Osmani, ka pritur sot në takim Ambasadorin e Shteteve të Bashkuara në Kosovë, Shkëlqesinë e tij, Greg Delawie dhe Drejtorin e Përgjithshëm të USAID në Kosovë, James Hope. Z. Osmani e ka informuar Ambasadorin Delawie, mbi mandatin, aktivitetet audituese dhe objektivat strategjike të Zyrës Kombëtare të Auditimit (ZKA), në funksion të përmirësimit të vazhdueshëm të qeverisjes së mirë dhe rritjes së llogaridhënies në institucionet publike të Kosovës. Ai ka theksuar se raportet e auditimit janë mjaft cilësore dhe ofrojnë informata dhe rekomandime të mjaftueshme për Kuvendin e Kosovës, Qeverinë dhe të gjitha organizatat buxhetore për menaxhimin e shëndoshë të parasë publike dhe rritjes së cilësisë së shërbimeve për qytetarët. Auditori i Përgjithshëm e ka falënderuar Ambasadorin Delawie për ndihmën që Shtetet e Bashkuara të Amerikës në vazhdimësi i kanë dhënë institucioneve të Kosovës, veçanërisht mbështetjen dhe partneritetin me Zyrën Kombëtare të Auditimit përmes projekteve të USAID në trajnimin e stafit për detektimin e aktiviteteve të mashtrimit dhe korrupsionit dhe rritjen e efektivitetit dhe transparencës në nivelin lokal. Po ashtu, z. Osmani, ka vlerësuar lart përkrahjen e USAID dhe angazhimin e tyre që për herë të parë dy auditore të ZKA, Donjeta Dreshaj dhe  Laureta Matoshi do të përfitojnë nga programi i punës praktike profesionale në Institucionin Suprem të Auditimit të Shteteteve të Bashkuara të Amerikës. Ndërsa, ambasadori Delawie, theksoi se SHBA do të vazhdojë të mbështesë fuqizimin dhe zhvillimin profesional të të rinjve në Kosovë dhe në veçanti do të angazhohet në mbështetjen e institucioneve të cilat kanë një rol të rëndësishëm në parandalimin e korrupsionit dhe dekurajojnë praktika jo të mira në administratën publike. Ai ka uruar dy auditoret, duke ju dëshiruar që të sjellin në shtëpi praktikat më të mira të menaxhimit të financave publike në SHBA.

Auditori i Përgjithshëm i Kosovës, z. Besnik Osmani, ka pritur sot në takim Ambasadorin e Shteteve të Bashkuara në Kosovë, Shkëlqesinë e tij, Greg Delawie dhe Drejtorin e Përgjithshëm të USAID në Kosovë, James Hope. Z. Osmani e ka informuar Ambasadorin Delawie, mbi mandatin, aktivitetet audituese dhe objektivat strategjike të Zyrës Kombëtare të Auditimit (ZKA), në funksion të përmirësimit të vazhdueshëm të qeverisjes së mirë dhe rritjes së llogaridhënies në institucionet publike të Kosovës. Ai ka theksuar se raportet e auditimit janë mjaft cilësore dhe ofrojnë informata dhe rekomandime të mjaftueshme për Kuvendin e Kosovës, Qeverinë dhe të gjitha organizatat buxhetore për menaxhimin e shëndoshë të parasë publike dhe rritjes së cilësisë së shërbimeve për qytetarët. Auditori i Përgjithshëm e ka falënderuar Ambasadorin Delawie për ndihmën që Shtetet e Bashkuara të Amerikës në vazhdimësi i kanë dhënë institucioneve të Kosovës, veçanërisht mbështetjen dhe partneritetin me Zyrën Kombëtare të Auditimit përmes projekteve të USAID në trajnimin e stafit për detektimin e aktiviteteve të mashtrimit dhe korrupsionit dhe rritjen e efektivitetit dhe transparencës në nivelin lokal. Po ashtu, z. Osmani, ka vlerësuar lart përkrahjen e USAID dhe angazhimin e tyre që për herë të parë dy auditore të ZKA, Donjeta Dreshaj dhe  Laureta Matoshi do të përfitojnë nga programi i punës praktike profesionale në Institucionin Suprem të Auditimit të Shteteteve të Bashkuara të Amerikës. Ndërsa, ambasadori Delawie, theksoi se SHBA do të vazhdojë të mbështesë fuqizimin dhe zhvillimin profesional të të rinjve në Kosovë dhe në veçanti do të angazhohet në mbështetjen e institucioneve të cilat kanë një rol të rëndësishëm në parandalimin e korrupsionit dhe dekurajojnë praktika jo të mira në administratën publike. Ai ka uruar dy auditoret, duke ju dëshiruar që të sjellin në shtëpi praktikat më të mira të menaxhimit të financave publike në SHBA.

Auditori i Përgjithshëm, Besnik Osmani, mori pjesë në konferencën e organizuar nga Instituti GAP, me rastin e publikimit të Analizës “ Efektet e ligjit për faljen e borxheve”. Z. Osmani, në fjalën e tij, ka vlerësuar raportin e publikuar nga Instituti GAP, si një analizë të rëndësishme  dhe që ofron mjaft informata për publikun e gjerë por edhe për të gjithë akterët të cilët ligji për faljen e borxheve i bën përgjegjës për implementimin e tij. Auditori i Përgjithshëm, më tutje ka theksuar se auditimet nga Zyra Kombëtare e Auditimit kanë nxjerrë që menaxhimi i obligimeve që dalin nga ky ligj ka qenë i pa qëndrueshëm, pasi dështimi kryesor është bërë në zbatimin e nenit 5 të ligjit, ku kërkohet nga të gjitha ndërmarrjet publike dhe institucionet shtetërore të krijojnë listat e personave që do të mund të përfitonin nga ky ligj. Sipas, z. Osmani vetëm ATK dhe Dogana kanë përpiluar listat e tyre. Me qëllim të përmirësimit të transparencës dhe mbledhjes së detyrimeve, si dhe për të rritur përgjegjësinë e konsumatorëve, Instituti GAP në këtë raport nxjerr rekomandime adresuar  për Ministrinë e Financave, Zyrën Kombëtare të Auditimit, dhe Qeverinë e Kosovës. Lidhur me këtë, Auditori i Përgjithshëm, theksoi se do ta marrë në shqyrtim që në planin e punës 2018/2019 të përfshijë edhe auditimin e performancës për implementimin e ligjit për faljen e borxheve. Në këtë konferencë morën pjesë edhe zëvendësministri i Financave, z. Fatmir Gashi, drejtori i Autoritetit Rregullator për Shërbimet e Ujit, z. Raif Preteni, dhe përfaqësues të ndërmarrjeve publike, komunave dhe institucioneve të tjera publike.

Me 15 shkurt 2018, Auditori i Përgjithshëm, Besnik Osmani, mori pjesë në Konferencën Vjetore të Kontrollit të Lartë të Shtetit të Republikës së Shqipërisë, ku është prezantuar veprimtaria e Institucionit të Kontrollit të Lartë të Shtetit për vitin 2017, të arriturat, sfidat dhe ndikimin që auditimet kanë pasur në përmirësimin e menaxhimit të fondeve publike. Auditori i Përgjithshëm, në fjalën e tij drejtuar të pranishmëve, ka uruar homologun e tij për të arriturat  e KLSH-së gjatë vitit 2017, cilësinë në auditim dhe ndikimin në forcimin e llogaridhënies dhe transparencës së institucioneve publike. Z. Osmani tha – “Misioni i institucioneve supreme të auditimit dhe puna e auditorëve është sa fisnike aq edhe sfiduese. Zbatimi i standardeve ndërkombëtare në fushën e auditimit dhe kontabilitetit kërkon përpjekje dhe angazhim të vazhdueshëm profesional si nga institucionet audituese ashtu edhe nga entitetet e audituara. Prandaj, ne mund ta shpallim të suksesshëm misionin tonë, vetëm atëherë kur arrijmë që integritetin dhe kredibilitetin e institucioneve tona ta bartim efektivisht edhe tek administrata publike” Ai, ka shprehur falënderimin e tij për Kryetarin Leskaj për bashkëpunimin e shkëlqyeshëm me dy institucioneve duke theksuar se një praktikë e tillë duhet tu shërbejë si shembull mekanizmave tjerë institucionalë të dy vendeve tona. Të pranishëm në këtë ngjarje ishin edhe Presidenti i Republikës së Shqipërisë, z. Ilir Meta, Rektorja e Universitetit “Aleksandër Moisiu” të Durrësit, Kseanela Sotirofski, Zëvendës Auditori i Përgjithshëm i Zyrës Shtetërore të Auditimit të Maqedonisë Naser Ademi, Sekretari i Përgjithshëm i Komisionit të Ekonomisë dhe Financave Anastas Angjeli, dhe përfaqësues nga komuniteti ndërkombëtar në Shqipëri, shoqëris civile dhe mediat.  

Sot ka filluar trajnimi për zyrtarët e Zyrës Kombëtare të Auditimit (ZKA) me temën kundër mashtrimit në prokurimin publik dhe projektet e BE-së, ky trajnim organizohet në kuadër të projektit “Komunat transparente, efektive dhe llogaridhënëse”, i iniciuar dhe financuar nga Agjencia Amerikane për Zhvillim Ndërkombëtar (USAID), ndërsa DAI është partner implementues i këtij projekti. Në hapjen e këtij aktiviteti, fjalë rasti ka mbajtur z. Valbon Bytyqi, Ndihmës Auditor i Përgjithshëm, i cili shprehu mirënjohje dhe falënderim për USAID-in dhe partnerët e tyre që në vazhdimësi e kanë përkrahur Zyrën Kombëtare të Auditimit në ngritje të kapaciteteve, me theks të veçantë në kontributin për edukim të vazhdueshëm profesional. Ai shtoi se kjo temë është shumë e rëndësishme ngase ndërlidhet me rritjen e njohurive kundër mashtrimit në prokurimin e publik sipas praktikave më të mira ndërkombëtare. Ai e vlerësoi lartë bashkëpunimin me USAID dhe tha se do të vazhdojnë të bashkëpunojnë edhe në të ardhmen për të fuqizuar edhe më shumë institucionin e Zyrës Kombëtare të Auditimit i cili kontribuon në rritjen e transparencës dhe llogaridhënies të institucioneve të Republikës së Kosovës. Ndërsa Zëvendës Drejtoresha e projektit nga DAI, znj. Afërdita Mekuli, e cila poashtu vlerësoi lartë bashkëpunimin me ZKA-në, ajo tha se projekti i tyre i ka tre komponenta, e para lidhet me ngritjen e kapaciteteve të komunave, e dyta me adresimin e sfidave që kanë komunat në nivelin qendror dhe e treta me detektimin e mashtrimit në prokurim publik. Znj. Mekuli më tej shtoi se ZKA është një partner kyç i tyre për përmbushjen e objektivave të projektit të tyre. Në fund të ceremonisë hapëse, për objektivat e trajnimit foli znj. Iva Todorova nga organizata KPMG që është partnere në zbatim të këtij projekti. Trajnimi do të mbahet gjatë këtij muaji, në total do të zgjasë nëntë ditë në tre grupe dhe do të marrin pjesë rreth 60 auditorë të ZKA-së.  

Në datat 13 – 14 shkurt 2018, Auditori i Përgjithshëm i Kosovës ka zhvilluar vizitë zyrtare në Zyrën Supreme të Auditimit të Polonisë. Gjatë qëndrimit në Varshavë, z. Osmani ka takuar Presidentin e Zyrës Supreme të Auditimit të Polonisë, z. Krzysztof Kwiatkowski, Zëvendës Presidentin e kësaj Zyre, z. Wojciech Kutyla si dhe zyrtarë të tjerë. Qëllimi i vizitës ishte fuqizimi dhe bashkëpunimi bilateral ndërmjet dy institucioneve dhe  aktivitetet konkrete në kuadër të realizimit të Projektit të Binjakëzimit në mes të Zyrës Supreme të Auditimit të Polonisë dhe Zyrës Kombëtare të Auditimit të Kosovës, mbështetur nga Zyra e BE-së në Kosovë. Projekti ka dy komponentë kryesore që përqendrohen në qasjen dhe metodologjinë e auditimit të Ndërmarrjeve Publike, të zhvilluara dhe me mbështetje të Divizionit për Menaxhimin e Cilësisë në Auditim dhe atij të auditimit të Ndërmarrjeve Publike. Përveç kësaj bashkëbiseduesit u pajtuan që bashkëpunimi në fusha të ndryshme të auditimit të forcohet më tutje me qëllim të shkëmbimit të informatave, përvojave dhe praktikave të mira në interes të ngritjes së nivelit të cilësisë së auditimit të jashtëm në të dyja vendet.