Lajmet

Auditori i Përgjithshëm i Republikës së Kosovës, Besnik Osmani ka pritur sot në vizitë pune Kryetarin e Kontrollit të Lartë të Shtetit, Bujar Leskaj me bashkëpunëtorë.

Z. Osmani i ka njoftuar mysafirët nga Shqipëria lidhur me aktivitetin e Zyrës Kombëtare të Auditimit të Kosovës në funksion të rritjes së efikasitetit të administratës publike, menaxhimit të mirë dhe kontrollit në shpenzimin e parasë publike. Ai po ashtu ka njoftuar mysafirët për partneritetin e Zyrës Kombëtare të Auditimit me Kuvendin dhe Qeverinë si dhe bashkëpunimin me shoqërinë civile dhe mediat me qëllim të rritjes së llogaridhënies në administratën publike të Kosovës. Ai shtoi se është i interesuar që këtë partneritet ta ngris në një nivel edhe më të lartë, përfshirë edhe institucionet akademike në mënyrë që puna e auditorëve të jetë sa më profesionale.

Z. Osmani, ka shprehur zotimin e tij institucional për të thelluar më tej bashkëpunimin ndërmjet dy institucioneve supreme të auditimit, përmes zhvillimit të aktiviteteve të përbashkëta në fushën e auditimit dhe implementimit të programeve për zhvillimin e vazhdueshëm profesional. Ai ka falënderuar drejtuesit e Kontrollit të Lartë të Shtetit të Shqipërisë për përkrahjen e vazhdueshme për Zyren e Auditorit të Përgjithshëm të Kosovës dhe ka shprehur bindjen që një përkrahje e tillë nuk do të mungojë edhe për anëtarësimin e institucionit të Auditorit të Përgjithshëm të Kosovës në mekanizmat ndërkombëtar të auditimit: INTOSAI dhe EUROSAI.

Kryetari i Kontrollit të Lartë të Shtetit, z. Bujar Leskaj ka uruar z. Osmani për detyrën e re si Auditor i Përgjithshëm i Kosovës duke i dëshiruar punë të mbarë në arritjen e rezultateve të synuara në përmbushjen e mandatit që i ka besuar Kuvendi i Kosovës. Z. Leskaj, ka shprehur dëshirën dhe gatishmërinë e tij për mundësitë reale të bashkëpunimit ndërmjet dy institucioneve për të ndihmuar Qeverinë dhe organizatat e audituara në menaxhimin e mirë të parasë publike.

Krerët e të dyja institucioneve u pajtuan se jo vetëm auditimi por edhe ofrimi i këshillave për organizatat e audituara është një mekanizëm i rëndësishëm në rritjen e efikasitetit në adresimin e rekomandimeve që dalin nga Institucionet Supreme të Auditimit.

Bashkëbiseduesit u pajtuan që të hartohet një kalendar i aktiviteteve të përbashkëta me qëllim të shkëmbimit të përvojave reciproke.

Zyra Kombëtare e Auditimit sot ka filluar punimet e Konferencës së 8-të Vjetore e cila do mbahet në datat 7 dhe 8 korrik 2016, në Hotel Amazona, ku temë diskutimi do të jetë  "Roli i Auditorit të Përgjithshëm dhe Zyres Kombëtare të Auditimit në përmirësimin e qeverisjes dhe rritjen e llogaridhënies në Kosovë".

Auditori i Përgjithshëm i Kosovës, Besnik Osmani hapi punimet e Konferencës në të cilën ishin të pranishëm edhe Kryeministri i Republikës së Kosovës, z. Isa Mustafa, deputetë të Kuvendit të Kosovës, përfaqësues të shoqërisë civile dhe të mediave.

Z. Osmani ka vënë në pah se kjo konferencë është një mekanizëm i rëndësishëm për të vlerësuar sezonin e sapo përfunduar të auditimit. Ai ka treguar se për sezonën e auditimit 2015/16, Zyra Kombëtare e Auditimit ka kryer mbi 90 auditime të rregullsisë dhe 6 auditime të perfomancës, të gjitha të finalizuara sipas afatit ligjor.

Z. Osmani ka theksuar se raportimi, qeverisja dhe menaxhimi financiar dhe i kontrolleve në përgjithësi kanë shënuar progres dhe lajmi i mirë është se këtë drejtim kemi marrë në shkallë vendi. Megjithatë shqetësim mbetet implementimi i ulët i rekomandimeve të dhëna në raportet paraprake si dhe ngecjet në disa fusha të rëndësishme siç janë planifikimi i buxhetit; menaxhimi i shpenzimeve; menaxhimi i kontratave të punësimit dhe menaxhimi i pasurive jo financiare.

Ai ka falënderuar Kuvendin dhe Qeverinë për gatishmërinë që kanë treguar për trajtimin e gjetjeve të prezantuara në raportet e auditimit për rritjen e llogaridhënies në administratën publike. Ai më tej ka ftuar mediat dhe shoqërinë civile që të marrin për bazë raportet e auditimit në punën e tyre dhe të prezantojnë ato në mënyrë korrekte.

Auditori i Përgjithshëm ka ftuar të gjithë partnerët që të përvetësojmë nga shembujt e mirë rreth nesh se si mund të maksimizojmë përfitimet shtetërore nga puna audituese.

Kryeministri i Republikës së Kosovës, z. Isa Mustafa, në fjalën e tij drejtuar të pranishmëve, ka shprehur kënaqësinë e tij që Kuvendi i Kosovës, bashkë me ligjin e ri për Auditorin e Përgjithshëm dhe Zyrën Kombëtare të Auditimit ka emëruar edhe auditorin e parë vendor, duke theksuar se kjo është edhe një dëshmi për pjekurinë institucionale dhe shtetformuese të popullit të Kosovës.

Z. Mustafa, është shprehur se Qeveria e Republikës së Kosovës mbështet fuqishëm institucionin e Auditorit të Përgjithshëm dhe se si Kryeministër i vendit ka ritheksuar se do të respektohet plotësisht pavarësia funksionale, financiare dhe operative e Zyrës Kombëtare të Auditimit.

Ai ka vlerësuar Zyrën Kombëtare të Auditimit si një institucion të rëndësishëm të Kosovës, që po ndihmon institucionet qendrore dhe ato komunale në përmirësimin e qeverisjes dhe rritjen e llogaridhënies. Z. Mustafa ka theksuar se Qeveria e Kosovës është e përkushtuar që t'i marr seriozisht rekomandimet e Auditorit dhe t'i implementojë ato në plotni.

Punimet e Konferencës kanë vazhduar me seancë tematike "Roli i Auditorit të Përgjithshëm dhe Zyres Kombëtare të Auditimit në përmirësimin e qeverisjes dhe rritjen e llogaridhënies në Kosovë", me panelin në përbërje të së cilit ishin Artan Venhari, Zëvendës Auditor i Përgjithshëm, z. Faton Topalli, kryetar i Komisionit për Mbikëqyrje të Financave Publike në Kuvendin e Kosovës, Shkëlqim Hysenaj, kryetar i Asociacionit të Gazetarëve dhe Florina Ujupi përfaqësuese nga BIRN.

Konferenca ka vazhduar me diskutime nga stafi i Zyrës Kombëtare të Auditimit në lidhje me përvojat dhe sfidat nga sezoni i kaluar i auditimit, me ç'rast janë dhënë rekomandime për rritjen e efikasitetit dhe  përmirësimin e mëtejshëm të cilësisë së procesit të auditimit.

Konferenca do të vazhdojë punimet edhe gjatë datës 8 korrik, ku do të ketë seanca informuese për punonjësit e Zyrës Kombëtare të Auditimit rreth orientimeve strategjike të zyrës, azhurnimin dhe hartimin e rregulloreve të brendshme dhe akteve nënligjore për implementimin e ligjit të ri për Zyrën Kombëtare të Auditimit.

Kryeprokurori i Shtetit, Aleksandër Lumezi, ka pritur sot në takim Auditorin e Përgjithshëm të Republikës së Kosovës, Besnik Osmani.

Gjatë këtij takimi, u bisedua për Raportet e Auditimit të Pasqyrave Financiare të cilat kanë përfunduar dhe janë publikuar për të gjitha institucionet publike të Republikës së Kosovës, si dhe kanë biseduar për modalitetet e bashkëpunimit  mes institucioneve që ata udhëheqin.

Po ashtu, ata i inkurajojnë dhe i thërrasin për bashkëpunim të gjitha institucionet që kanë qenë subjekt i auditimit që të bashkëpunojnë me Zyrën Kombëtare të Auditimit për implementimin e rekomandimeve si dhe me Zyrën e Kryeprokurorit të Shtetit, lidhur me rastet ku ka dyshime të arsyeshme se është kryer ndonjë vepër penale.

Lajmi është huazuar nga uebfaqja e Prokurorit të Shtetit, http://www.psh-ks.net/?page=1,8,973

Auditori i Përgjithshëm i Republikës së Kosovës, z. Besnik Osmani, hapi sot punimet e punëtorisë rajonale: "Auditimi paralel i performancës në fushën e prokurimit publik", që po mbahet për herë të parë në Prishtinë dhe do të zhvilloj punimet nga sot deri më 30 qershor 2016. Ky organizim ka për qëllim koordinimin dhe zhvillimin e mëtutjeshëm të punëve lidhur me auditimin paralel të performancës në fushën e prokurimit publik".

Auditori i Përgjithshëm u ka uruar mirëseardhje pjesëmarrësve nga vendet e rajonit dhe shprehu kënaqësinë që Zyra Kombëtare e Auditimit të Kosovës është nikoqire e këtij aktiviteti. Ai me këtë rast ka theksuar se organizimi i kësaj punëtorie është një mundësi reale për të thelluar më tej bashkëpunimin regjional, për të përmirësuar cilësinë e auditimit në funksion të rritjes së llogaridhënies së zyrtarëve publik dhe për të përmirësuar qeverisjen në vendet tona.

Përvojat e përbashkëta në fushën e prokurimit, paraqesin një mundësi të shkëlqyeshme për të avancuar auditimet tona dhe për të forcuar besimin në përdorimin e fondeve publike.

Ekipe të auditimit nga Institucionet Supreme të Auditimit të vendeve të rajonit si: Shqipëria, Maqedonia, Mali i Zi, Bosnja dhe Hercegovina, Serbia, Turqia dhe Kosova janë pjesëmarrës në këtë aktivitet, ndërsa i gjithë procesi i auditimit për këtë projekt deri në finalizimin e raporteve do të mbështetet nga ekspertë të Gjykatës Evropiane të Auditorëve dhe të Zyrës Kombëtare të Auditimit të Suedisë.

Auditori i Përgjithshëm i Republikës së Kosovës, Besnik Osmani, ka pritur sot në vizitë bilaterale, z. Milan Dabovic, President i Senatit dhe bashkëpunëtorët e tij, z. Nikola Kovaçeviç, anëtar i Senatit dhe znj. Marija Zugic, udhëheqëse e Divizionit për Marrëdhënie Ndërkombëtare të  Institucionit Suprem të Auditimit të Malit të Zi.

Z. Osmani, i ka njoftuar mysafirët për mandatin dhe aktivitetin e Zyrës Kombëtare të Auditimit të Kosovës në funksion të rritjes së efikasitetit të administratës publike, menaxhimit të mirë dhe kontrollit në shpenzimin e parasë publike. Ai po ashtu i ka njoftuar mysafirët nga Mali i Zi për përkrahjen institucionale dhe raportet me Parlamentin dhe Qeverinë si partnerët kryesorë të Zyrës Kombëtare të Auditimit si dhe bashkëpunimin me shoqërinë civile dhe mediat me qëllim të rritjes së llogaridhënies në administratën publike të Kosovës.

Z. Osmani ka shprehur interesimin e tij për forcimin e bashkëpunimit bilateral dhe shkëmbimin e përvojave me institucionin e auditimit të Malit të Zi si dhe thellimin e bashkëpunimit me institucionet simotra të vendeve fqinje.

Presidenti i Senatit të Institucionit Suprem të Auditimit të Malit të Zi, z. Milan Dabovic uroi z.Osmani për detyrën e re si Auditor i Përgjithshëm i Republikës së Kosovës dhe rikonfirmoi interesimin e tij për të vazhduar dhe thelluar edhe më tej bashkëpunimin me Zyren Kombëtare të Auditimit të Kosovës. Ai shprehu bindjen që të dy institucionet mund të mësojnë shumë nga përvojat reciproke dhe ofroi mbështetjen e plotë të Institucionit Suprem të Auditimit të Malit të Zi për shkëmbime institucionale.

Me theks të veçantë janë diskutuar modalitetet e përkrahjes së Kosovës për pjesëmarrje dhe anëtarësim në strukturat e INTOSAI dhe EUROSAI.

Kryetari i Kuvendit të Republikës së Kosovës, Kadri Veseli, priti sot në takim Auditorin e Përgjithshëm të Republikës së Kosovës, Besnik Osmani dhe njëherësh, pranoi Raportin e Auditimit të Pasqyrave Financiare të Kuvendit, për vitin 2015, si dhe raportet e gjashtë institucioneve të tjera.

Duke uruar Auditorin e ri të Kosovës, me rastin e fillimit të punës në krye të këtij institucioni, kryeparlamentari Veseli e cilësoi shumë të rëndësishme për Kosovën që tani Zyrën e Auditorit e udhëheq një vendor.

Pasi pranoi raportet, kryetari Veseli ftoi të gjithë të interesuarit që t'i lexojnë dhe analizojnë ato, pasi që, nëpërmjet tyre, vërtetohet mënyra e menaxhimit dhe e shpenzimit të parave të taksapaguesve, nga ana e institucioneve publike.

"Transparenca është përgjegjësi dhe mirëqeverisja e parasë publike është detyrim yni, andaj këto raporte duhet t'i nënshtrohen vlerësimit të opinionit publik dhe të dihet mënyra e shpenzimit të parasë publike. Ftojmë institucionet gjegjëse që të bëjnë vlerësimin e këtyre raporteve dhe konform të gjeturave të tyre të ndërmarrin veprime ligjore. Ftoj, po ashtu, institucionet që kanë marrë rekomandimet, të zbatojnë rekomandimet e parealizuara edhe nga viti i shkuar dhe rekomandimet e këtij viti", theksoi kryetari Veseli.

Kreu i Kuvendit i ofroi Auditorit të Përgjithshëm mbështetje të plotë në realizimin e detyrave ligjore, duke qenë i bindur se udhëheqja e këtij institucioni është sfidë që do mbështetjen e të gjitha institucioneve.

Auditori i Përgjithshëm, Besnik Osmani, nga ana e tij, bëri të ditur se së shpejti do të bëhet publikimi i 104 raporteve të auditimit për institucione të ndryshme të vendit. Ai konfirmoi zotimin e tij e të institucionit që drejton, për punë profesionale dhe të paanshme, konform standardeve ndërkombëtare të auditimit.

Lajmi është huazuar nga uebfaqja e Kuvendit të Kosovës, http://www.kuvendikosoves.org/?cid=1,128,8018

Komisioni për Buxhet dhe Financa në mbledhjen e sotme, shqyrtoi Vendimin e Qeverisë së Kosovës për shpërndarjen e kontigjencës për korrektim të formulës-pjesës së Grantit të Përgjithshëm për vitin 2017 për komuna në vlerë prej 4,000,000 euro, Raportin vjetor financiar të Zyrës së Auditorit të Përgjithshëm për vitin 2015, Raportin financiar vjetor të Radiotelevizionit të Kosovës për vitin 2015, Raportin financiar vjetor i Zyrës Rregullative për Energji për vitin 2015, Raportin të shpenzimeve të Kuvendit të Kosovës për tremujorin e parë të vitit 2016 dhe Kërkesat Buxhetore të Kuvendit sipas Qarkore Buxhetore 2017/01.

Vendimin e Qeverisë së Kosovës për shpërndarjen e kontigjencës për korrektim të formulës-pjesës së Grantit të Përgjithshëm për vitin 2017 për komuna në vlerë prej 4,000,000 euro, e prezantojë zv. ministri i financave z. Agim Krasniqi. Pas diskutimeve dhe sqarimeve, Komisioni përkrahu në parim vendimin e qeverisë, me konstatimin që ky vendim mund të ekzekutohet, vetëm pasi që të krijohet baza ligjore përmes ndryshimeve dhe plotësimeve të ligjit që rregullon formulën e granteve.

Raportin vjetor financiar të Zyrës së Auditorit të Përgjithshëm për vitin 2015, e prezantoi Aduditori i Përgjithshëm z. Besnik Osmani, të cilin pas diskutimeve dhe sqarimeve, Komisioni e përkrahu dhe rekomandoi për miratim në Kuvend.

Më pas Komisioni shqyrtoi Raportin vjetor financiar të Radiotelevizionit të Kosovës për vitin 2015, qe e prezantoi kryesuesi i Bordit të RTK-së, z. Ismet Behxheti dhe Raportin vjetor financiar të Zyrës Rregull z. Krenar Bujupi, të njëjtat i përkrahu dhe i rekomandoi Kuvendit për miratim.

Komisioni gjithashtu shqyrtoi Raportin e shpenzimeve të Kuvendit të Kosovës për tremujorin e parë të vitit 2016, të cilin e përkrahu dhe i rekomandoi Kryesisë së Kuvendit për miratim. Komisioni i tumiri edhe kërkesat buxhetore të Kuvendit sipas Qarkores Buxhetore 2017/01 dhe ia rekomandoi Kryesisë për miratim dhe të njëjtat t'ia dërgojë Ministrisë së Financave që t'i përfshijë në linjat buxhetore të Buxhetit të Republikës së Kosovës për vitin 2017-2019, sipas qarkores buxhetore 2017/01.

Lajmi është huazuar nga uebfaqja e Kuvendit të Kosovës, http://www.kuvendikosoves.org/?cid=1,128,7996

Kryeministri i Republikës së Kosovës, Isa Mustafa, ka takuar sot Auditorin e Përgjithshëm, Besnik Osmani, me të cilin ka biseduar lidhur me progresin në reformën e menaxhimit të financave publike si dhe aplikimin e standardeve të njohura ndërkombëtare dhe praktikave të mira evropiane të auditimit në sektorin publik.

Kryeministri Mustafa theksoi se Qeveria e Kosovës përkrah fuqishëm institucionin e Auditorit të Përgjithshëm dhe siguroi se do të respektohet plotësisht pavarësia funksionale, financiare dhe operative e Zyrës së Auditorit të Përgjithshëm.

Auditori i Përgjithshëm e ka informuar kryeministrin lidhur me përgatitjet për implementimin e ligjit të ri për Auditorin e Përgjithshëm, bashkëpunimin me organizatat ndërkombëtare të auditimit dhe planet afatmesme për zhvillimin e sektorit të auditimit në Kosovë. Ai, poashtu, ka kërkuar përkrahjen e Qeverisë së Kosovës për sigurimin e një hapësire publike ku Zyra e Auditorit të Përgjithshëm do të mund të zhvillojë aktivitetin e vet.

Lajmi është huazuar nga uebfaqja e Zyrës së Kryeministrit, http://www.kryeministri-ks.net/?page=1,9,5912

Sot, në ambientet e punës, Auditori i Përgjithshëm dhe personeli i Zyrës së Auditorit të Përgjithshëm, dhuruan gjak në mënyrë vullnetare. Aksioni për dhurimin e gjakut tashmë është bërë traditë dhe ky është viti i katërt që ky institucion organizon këtë aktivitet bamirës. Si edhe vitet e mëparshme, interesimi i stafit të ZAP që  të bëhen pjesë e këtij aktiviteti ishte i konsiderueshëm.

Ky organizim është bërë me përkujdesjen e Sindikatës së ZAP-it.

Auditori i Përgjithshëm, Besnik Osmani, si dhurues i gjakut, ka falënderuar stafin e ZAP për pjesëmarrje në këtë aksion humanitar dhe ka shprehur gatishmërin e tij që ky aktivitet të organizohet rregullisht edhe në të ardhmen. Ai poashtu ka falënderuar Drejtorin dhe ekipin e Qendrës Kombëtare të Kosovës për Transfuzionin e Gjakut, për realizimin e suksesshëm të këtij aktiviteti dhe për mundësinë që ai të realizohej në ambientet e Zyrës së Auditorit të Përgjithshëm.

Auditori i Përgjithshëm i Republikës së Kosovës, Besnik Osmani, i shoqëruar nga Zëvendës Auditori i Përgjithshëm, Artan Venhari kanë zhvilluar një vizitë pune në Zyrën Kombëtare të Auditimit të Mbretërisë së Bashkuar, nga 25 deri më 26 maj 2016.

Gjatë kësaj vizite, e cila u zhvillua në kuadër të Projektit të Binjakëzimit të financuar nga Bashkimi Evropian, në përkrahje të Zyrës së Auditorit të Përgjithshëm të Kosovës, janë realizuar takime me zyrtarë të lartë të Zyrës Kombëtare të Auditimit të Mbretërisë së Bashkuar, ku është biseduar për rolin dhe rëndësinë e procesit të auditimit dhe mbështetjen që Auditori i Përgjithshëm i jep Parlamentit dhe Qeverisë në përmirësimin e menaxhimit të mirë dhe kontrollit në shpenzimin e parasë publike.

Gjatë takimeve me drejtuesit e Zyrës Kombëtare të Auditimit të Mbretërisë së Bashkuar, u shkëmbyen përvojat reciproke dhe nga të dyja palët u konfirmua edhe një herë interesimi për të vazhduar bashkëpunimin. Mikpritësit nga Zyra Kombëtare e Auditimit të Mbretërisë së Bashkuar shprehën gatishmërinë për të ofruar ekspertizën e tyre për nevojat e Zyrës së Auditorit të Përgjithshëm të Kosovës.

Gjatë qëndrimit në Londër, Auditori i Përgjithshëm ka vizituar edhe Ambasadën e Kosovës në Mbretërinë e Bashkuar, ku është pritur nga Ambasadori Lirim Graiçevci.

Auditori i Përgjithshëm Besnik Osmani priti sot në takim Ministrin e Financave Avdullah Hoti, me të cilin bisedoi për progresin në reformën e menaxhimit të financave publike, implementimin e aktiviteteve në kuadër të Planit Kombëtar për Zbatimin e Marrëveshjes së Stabilizim Asociimit që kanë të bëjnë me kontrollin financiar, Ligjin e ri për Zyrën Kombëtare të Auditimit si dhe për çështje të tjera të bashkëpunimit ndërinstitucional.

Auditori i Përgjithshëm Besnik Osmani, theksoi rëndësinë që ka reforma në menaxhimin e financave publike në përmirësimin e shpenzimit të parasë publike dhe rritjen e efikasitetit të qeverisjes dhe rikonfirmoi gatishmërinë dhe interesimin e Zyrës Kombëtare për Auditim për të ndihmuar në implementimin e suksesshëm të saj.

Z. Osmani e cilësoi një lajm të mirë aprovimin e Ligjit të ri për Zyrën Kombëtare të Auditimit (siç do të quhet sipas Ligjit të ri) nga Kuvendi i Republikës së Kosovës, javën e kaluar dhe falënderoi Ministrin Hoti për përkrahjen në finalizimin e tij. Ai theksoi se "mirëpret rikonfirmimin ligjor për pavarësinë funksionale, financiare dhe operative të Zyrës Kombëtare të Auditimit, dhe se tani po analizohet ndikimi praktik i Ligjit si dhe po bëhen përgatitjet për implementimin e plotë të tij, sapo të hyj në fuqi".

Auditori i Përgjithshëm Besnik Osmani kërkoi nga Ministri Hoti përkrahjen e mëtejshme institucionale në mënyrë që Zyra Kombëtare e Auditimit të pajiset me resurset adekuate për përmbushjen e obligimeve ligjore, qoftë me rekrutimin e personelit të nevojshëm, krijimin e hapësirave adekuate për punë dhe përkrahjen buxhetore për projektet që e lehtësojnë funksionimin e Zyrës së Kombëtare të Auditimit.

Ministri Hoti e njoftoi z.Osmani me progresin në reformën e menaxhimit të financave publike dhe tha se mirëpret rekomandimet e Auditorit të Përgjithshëm në këtë proces të rëndësishëm. Ai rikonfimoi përkrahjen e Qeverisë, në veçanti të Ministrisë së Financave në funksion të forcimit të pavarësisë financiare të Zyrës së Kombëtare të Auditimit si dhe ritheksoi gatishmërinë e Qeverisë për implementimin e plotë të rekomandimeve të Auditorit të Përgjithshëm.

Auditori i Përgjithshëm i Kosovës, z. Besnik Osmani, ka pritur në takime njoftuese, përfaqësues nga Shoqata e Kontabilistëve të Çertifikuar dhe Auditorëve të Kosovës dhe nga përfaqësues nga Institutit për Kontabilitet Auditim dhe Financa.

Gjatë këtyre takimeve, është nënvizuar rëndësia e një partneriteti të qëndrueshëm me theks të veçantë në krijimin e një vlere krahasuese në përmbushjen e detyrave në fushën e auditimit.

Z. Osmani, Auditor i Përgjithshëm i Kosovës, ka shprehur interesimin e tij në krijimin e një rrjeti të komunikimit në mes të Zyrës së Auditorit të Përgjithshëm dhe shoqatave profesionale në auditim, organizatave të fushës nga shoqëria civile dhe mediat  me qëllim të rritjes së debatit për raportet e auditimit të  Zyrës së Auditorit të Përgjithshëm,  dhe që ato të jenë më të afërta dhe të kuptueshme për qytetarët e vendit.