Lajmet

Menaxhimi i sektorit të bujqësisë ka mangësi të theksuara që rrezikojnë efektivitetin dhe zhvillimin e qëndrueshëm të këtij sektori. Edhe pse janë hartuar strategji dhe programe dhe për çdo vit ndahen rreth 48 milion euro nga buxheti i vendit për të mbështetur këtë sektor, nuk janë arritur rezultatet e synuara.  Raporti i auditimit të perfomancës “Menaxhimi i procesit të granteve dhe subvencioneve në sektorin e bujqësisë”, tregon se ka mangësi në mënyrën e menaxhimit të dhënies së granteve dhe subvencioneve për fermerët dhe agrobizneset si në nivelin qendror ashtu edhe në atë lokal. Mënyra se si monitorohen rezultatet e arritura nga financimet publike ka rezultuar me mangësi dhe nuk dëshmon që forma aktuale e mbështetjes financiare për fermerët dhe agrobizneset është adekuate. Auditimi ka nxjerr në pah se ka projekte të investuara që nuk janë aktive e që kanë ndikim të drejtpërdrejtë në mos zhvillimin e bujqësisë dhe rritjen e punësimit. Ministria e Bujqësisë, Pylltarisë dhe Zhvillimit Rural (MBPZHR) përveç programeve të rregullta, ka miratuar edhe dy programe të veçanta të mbështetjes financiare në vlerë 8 milion euro, pa analizë paraprake dhe duke tejkaluar kështu kufijtë buxhetor të aprovuar. Kjo mënyrë e miratimit të programeve nuk siguron rezultate të qëndrueshme dhe mënyra e dhënies nuk siguron shfrytëzimin efektiv të fondeve publike. Dështimi në themelimin e strukturave sipas rregullave për Asistencë në Para-Anëtarësim për Zhvillim Rural (IPARD), ka bërë që Kosova, për dallim nga vendet e rajonit të mos përfitoj fonde nga Bashkimi Evropian për sektorin e bujqësisë. Si rrjedhojë, programet mbështeten nga buxheti kombëtar dhe mjetet e huazuara nga donatorët dhe organizatat financiare ndërkombëtare, si Banka Botërore, etj. Mungesa e komunikimit në mes të MBPZHR dhe komunave për mbështetjen e sektorit të bujqësisë ka mundësuar që aplikuesit e njëjtë të përfitojnë nga të dy nivelet, sikurse në rastin e komunës së Prishtinës. Besnik Osmani, Auditor i Përgjithshëm, lidhur me këtë auditim ka deklaruar se "Mbështetja financiare nga buxheti kombëtar për të zhvilluar sektorin e bujqësisë përmes qasjes së qëlluar strategjike dhe zbatimit të tyre ka një rëndësi të madhe dhe ka ndikim të gjerë në zhvillimin ekonomik dhe rritjen e punësimit. Në mungesë të menaxhimit të duhur, synimi për përmirësimin e sektorit të bujqësisë nuk është arritur. Prandaj, Qeveria dhe institucionet kompetente duhet të ndërmarrin veprime konkrete të strukturuara që të sigurohen se përdorimi i fondeve publike për zhvillimin e bujqësisë është adekuat dhe i orientuar në rezultate, në të kundërtën përdorimi i fondeve është i paarsyetuar.” Zyra Kombëtare e Auditimit, ka dhënë rekomandimet e saj, të cilat kanë për qëllim të sigurojnë se autoritetet përgjegjëse, në radhë të parë Zyra e Kryeministrit dhe MBPZHR të sigurojnë një menaxhim të duhur për të siguruar që fondet publike për sektorin e bujqësisë të ndikojnë në përmirësimin e gjendjes aktuale ekonomike dhe rritje të punësimit. Po ashtu, MBPZHR dhe komunat duhet të vendosin një koordinim efektiv për t’u siguruar që të mos ketë përfitime të dyfishta për të njëjtën kulturë bujqësore.   Raportin e plotë mund ta lexoni këtë vegzë.

Sot në Prishtinë, Auditori i Përgjithshëm mori pjesë në konferencën rajonale me temën  “Mbikëqyrja Parlamentare e Financave Publike” të organizuar nga Komisioni për Mbikëqyrje të Financave Publike në bashkëpunim me GIZ. Në këtë konferencë u diskutua për rolin, funksionin dhe bashkëpunimin në mes të  Komisionit për Mbikëqyrje të Financave Publike  dhe Komisionit për Buxhet dhe Financa, në mbikëqyrjen e financave publike. Po ashtu, një rëndësi e veçantë ju dha përdorimit të Raporteve të Auditimit, nga ana e këtyre komisioneve për të mbajtur Qeverinë të përgjegjshme për shpenzimin e parasë publike. Si dhe mundësinë e përfitimit nga gjetjet e auditimit, në planifikim më të mirë të shpenzimeve publike. Auditori i Përgjithshëm, z. Besnik Osmani, ka prezantuar, përvojën dhe praktikat e bashkëpunimit të Zyrës Kombëtare të Auditimit  me Kuvendin, në Kosovë, me ç ‘rast janë prezantuar rezultat konkrete nga ky bashkëpunim. “Bashkëpunimi në mes të auditorëve dhe deputetëve ka shënuar progres, duke rritur kështu ndikimin e auditimit të jashtëm.  Së bashku me komisionet parlamentare jemi duke shikuar mundësitë e forcimit të mekanizmave me qëllim të rritjes së përqindjes të rekomandimeve të adresuara të cilat ndikojnë ne përmirësimin e shërbimeve dhe arrijnë vlerën për para, si dhe të rrisim besimin e Kuvendit në punën tonë” tha z. Osmani. Z. Driton Selmanaj, kryetar i Komisionit për Mbikëqyrje të Financave Publike, dhe z. Lumir Abdixhiku, kryetar i Komisionit për Buxhet dhe Financa kanë vlerësuar lartë rolin e Zyrës Kombëtare të Auditimit. Ata  kanë cilësuar punën e ZKA-së si profesionale dhe të besueshme, mirëpo u theksua se shqetësues mbetet fakti, për numrin e ulët të zbatimit të rekomandimeve. Në këtë konferencë është diskutuar dhe janë shkëmbyer përvojat e komisioneve parlamentare dhe bashkëpunimi i tyre me Institucionet Supreme të Auditimit të vendeve të rajonit. Pjesëmarrës ishin përfaqësues nga Komisionet parlamentare  për financa publike, përfaqësues nga Institucionet Supreme të Audimit, Bankës Botërore dhe shoqërisë civile, të vendeve të rajonit si Shqipëria, Maqedonia Veriore, Mali i Zi dhe Kroacia.

Në kuadër të programit për të njohur më mirë rëndësinë e auditimit dhe më qëllim të sensibilizimit të publikut, Zyra Kombëtare e Auditimit ditëve të fundit ka ndërmarrë aktivitete për shpërndarjen e donacioneve - pajisje kompjuterike në disa organizata jo-qeveritare në nevojë. Dhurimi i këtyre pajisjeve, është një akt simbolik për të përkrahur dhe për t’u solidarizuar me punën dhe përkushtimin e këtyre organizatave si dhe për të përmirsuar kushtet e tyre të punës. Me këtë rast, Auditori i Përgjithshëm z. Besnik Osmani, i ka njoftuar përgjegjësit e këtyre organizatave lidhur me rolin dhe punën e Zyrës Kombëtare të Auditimit, si dhe u informua për së afërmi me punën dhe aktivitetet e tyre. Në emër të Shoqatës Down Syndrome Kosova, znj. Sebahate Hajdini-Beqiri, pasi shprehu falënderimin për këtë donacion, njoftoj për themelimin e kësaj organizate me iniciativë të vet prindërve. Misioni i shoqatës është ngritja e dinjitetit të individëve me sindromë Down dhe familjarëve të tyre, duke avokuar e lobuar për të drejtat dhe respektimin e këtyre të drejtave, për ngritjen e cilësisë së jetës dhe gjithëpërfshirjen e plotë të individëve me sindromë Down në shoqëri. Prandaj, ajo theksoi se ndihma të tilla janë të mirëseardhura dhe te vlefshme për të ndihmuar në zhvillimin e aktiviteteve të shoqatës. Në shenjë mirënjohje dhe falënderimi për kontributin e dhënë,  përfaqësuesve të ZKA-së ju dhanë  dhurata  simbolike të punuara nga vet fëmijët. Me rastin e shpërndarjes së pajisjeve për shoqatën jo-fitimprurëse, “HANDIKOS”, përfaqësuesit e kësaj shoqate u shprehen se: “ky donacion është i mirëseardhur dhe pajisjet do të përdoren në zhvillimin e aktiviteteve të tyre të përditshme”. HANDIKOS ka për qëllim përfaqësimin dhe përkrahjen e personave me aftësi të kufizuar duke avokuar, lobuar e ofruar shërbime profesionale për të ngritur mirëqenien e tyre dhe për të arritur të drejta të barabarta, një jetë të pavarur e të dinjitetshme për të gjithë. Pajisje kompjuterike i janë dhuruar edhe Qendrës për Mbrojtjen e Grave dhe Fëmijëve „Shtëpia Ime“  në Ferizaj, komunitetit kroat në Janjevë si dhe një pjesë e këtyre pajisjeve i janë dhuruar edhe Gjimanzit “Xhevdet Doda” në Prishtinë. Pajisjet janë të përdorura, por ekspertët e TI-së të Zyrës Kombëtare të Auditimit i kanë funksionalizuar plotësisht duke i shtuar jetën e përdorimit edhe për një kohë optimale dhe mund të plotësojnë nevojat e këtyre organizatave.

Me rastin e dhurimit të këtij donacioni Auditori i Përgjithshëm, z. Besnik Osmani, tha se ky është një akt simbolik për të përkrahur dhe për t’u solidarizuar me përpjekjet e personelit  arsimor dhe nxënësit në nxënien e njohurive të reja dhe sado pak për të përmirësuar kushtet e tyre  të punës. Në anën tjetër drejtori i Gjimnazit “Xhevdet Doda”, z. Azem Jaha  shprehu falënderimin e tij për këtë donacion duke theksuar se është shumë i mirëseardhur dhe do të jetë në shërbim të nxënësve të kësaj shkolle. Pajisjet janë të përdorura dhe me ndihmën e ekspertëve të TI-së të Zyrës Kombëtare të Auditimit janë funksionalizuar plotësisht duke i shtuar jetën e përdorimit edhe për një kohë optimale dhe mund të plotësojnë të gjitha nevojat e nxënësve. Ky aktivitet është duke u zhvilluar në kuadër të programit të Zyrës Kombëtare të Auditimit për të njohur më mirë rëndësinë e auditimit dhe sensibilizimin e publikut që të mbajnë në përgjegjësi autoritetet publike për zbatimin e rekomandimeve sikurse për të shprehur edhe nevojën për një edukim më cilësor në Kosovë.

Ngritja e kapaciteteve në fushën e auditimit të përformancës diskutohet me pjesëmarrje të përfaqësuesve të institucioneve akademike e shkencore Me qëllim të realizimit të objektivës strategjike për të rritur cilësinë dhe zgjeruar portfolion e auditimeve të përformancës si dhe aftësimin e vazhdueshëm të auditorëve, sot në ambientet e Zyrës Kombëtare të Auditimit është mbajtur një takim i përbashkët me përfaqësues nga Universiteti i Kembrixhit dhe Kolegjit UBT. Diskutimi është fokusuar në gjetjen e modaliteteve të bashkëpunimit që ka për synim dizajnimin e një programi të edukimit profesional për auditorët e performancës. Programi do të fokusohet në fushat të cilat janë të nevojshme për t’i forcuar njohuritë dhe pritet të rezultoj me rritjen e kualitetit të raporteve të auditimit dhe që të mund të zbatohet gjerësisht në Kosovë, në mënyrë që zbatimi i rekomandimeve për të siguruar shërbime cilësore dhe vlerën për para të rritet.

Sot, Zyra Kombëtare e Auditimit, ka bërë prezantimin publik të raportit të perfomancës, “Zhvillimi i Kapaciteteve në Procesin e Bërjes së Politikave dhe Koordinimit”, projekt i financuar nga Sida dhe zbatuar nga Zyra e Kryeministrit”. Pjesëmarrës në këtë prezantim ishin zyrtarë të Ministrive, Zyrës së Kryeministrit, projektit SIDA, shoqërisë civile, mediave, organizatave ndërkombëtare si dhe përfaqësues të Ambasadës Suedeze në Kosovë dhe Universitetit të Kembrixhit. Me këtë rast, Ndihmës Auditorja e Përgjithshme Znj. Vlora Spanca, nën udhëheqjen e të cilës është kryer ky auditim, falënderoj Ambasadën Suedeze dhe Zyrën e Kryeministrit për besimin e dhënë që Zyra Kombëtare e Auditimit të kryej auditimin e një projekti kaq të rëndësishëm. Marrja përsipër e një angazhimi të tillë përveç që ishte privilegj kërkonte përgjegjësi dhe kompetence të lartë profesionale. Një angazhim si ky tregon po ashtu për besueshmërinë qe shtetet e tjera dhe institucionet publike kane ndaj Zyrës Kombëtare të Auditimit, shtoi ajo. Znj. Myrvete Gashi, drejtore e Departamentit për Auditime të Performancës, tha se Zyra Kombëtare e Auditimit vlerësoi objektivin e përgjithshëm të Projektit duke pasur për synim zhvillimin e qëndrueshëm të kapaciteteve në fushën e procesit të zhvillimit të politikave. Auditimi ka konkluduar se Projekti ka arritur rezultate të rëndësishme duke kontribuar në ngritjen e kapaciteteve në zhvillimin e politikave brenda qeverisë. Sidoqoftë, përkundër progresit të bërë nga Projekti në procesin e zhvillimit të politikave, ka disa të meta që mund të rrezikojnë efektivitetin dhe qëndrueshmërinë e procesit të zhvillimit të politikave, tha Gashi. Ndërsa, prezantimi detaj i raportit përfshirë gjetjet konkluzionet dhe rekomandimet e auditimit , është bërë nga  Fikret Ibrahimi udhëheqës i ekipit auditues. Në anën tjetër nga Zyra e Kryeministrit z. Arben Krasniqi, ka vlerësuar lartë kontributin e Zyrës Kombëtare të Auditimit për ecurinë e projektit. Ai është zotuar se rekomandimet e dhëna në këtë raport do të adresohen dhe së shpejti do të dorëzohet edhe plani i veprimit për adresimin e tyre.  Ndërsa, përfaqësuesi nga Fondacioni Kosovar për shoqërinë civile (KCSF), Dren Puka, foli për rolin dhe rëndësinë e pjesëmarrjes së shoqërisë civile në procesin e hartimit të politikave. Zyra Kombëtare e Auditimit ka filluar të bëjë prezantimin publik të raporteve të auditimit dhe të bashkëbisedoj me palët përgjegjëse të përfshirë në proceset e auditimit, me anëtarë të komisioneve parlamentare, si dhe përfaqësues të shoqërisë civile dhe të mediave, për secilin raport të auditimit të performancës. Qëllimi është që të bëhet sa më transparente puna audituese dhe të sqarohen gjetjet dhe rekomandimet për publikun e gjerë, në mënyrë që të mos ketë keqkuptime dhe keqinterpretime.   Raportin e plotë mund ta lexoni në këtë vegzë.

Zyra Kombëtare e Auditimit, në raportet e auditimit, në mënyrë të vazhdueshme ka dhënë rekomandime sa i përket përdorimit ekonomik të fondeve publike për qëllimet e reprezentacionit. Këto rekomandime nuk po zbatohen në mënyrë efektive. Auditori i Përgjithshëm i Kosovës, z. Besnik Osmani mori pjesë në debatin e organizuar nga BIRN me pjesëmarrjen edhe të përfaqësuesve nga Ministria e Administrimit të Pushtetit Lokal, Asociacionit të Komunave të Kosovës si dhe të organizatave të shoqërisë civile e mediave. Me këtë rast janë publikuar rezultatet e analizës së kryer nga BIRN për përdorimin e buxhetit për shpenzimet e pijeve dhe ushqimit si dhe të shpenzimeve të reprezentacionit. Auditori i Përgjithshëm, ka prezantuar aktivitetet e ndërmarra për auditimin e planifikimit dhe përdorimit të fondeve publike për qëllime të reprezentacionit. Z. Osmani ka nënvizuar se shpenzimet për ushqim dhe pije kanë kaluar pragun prej 5% të grupit të shpenzimeve për mallra e shërbime dhe se ky fenomen duhet të ndalet. Kjo pjesëmarrje në strukturën e buxhetit është e lartë dhe shkon në drejtim të kundërt me parimin e ekonomicitetit.  Komunat gjatë vitit 2018, në emër të drekave zyrtare brenda dhe jashtë vendit kanë shpenzuar, rreth 3,5 milionë euro për ushqim dhe pije, ndërsa gjysmën e kësaj vlere e ka shpenzuar vetëm Komuna e Prishtinës. Gjatë prezantimit, Auditori i Përgjithshëm, ka nënvizuar se është po aq e rëndësishme që për përdorimin e këtyre  fondeve të sigurohen kode adekuate, në mënyrë që të zbardhen dhe raportohen saktësisht qëllimet e furnizimit me pije dhe ushqim. Për të diferencuar përmbushjen e kompetencave të komunave në raport me shpenzimet tjera të reprezentacionit si dhe që të sigurohet vlera për para furnizimi me këto mallra e shërbime duhet të bëhet përmes një procesi transparent dhe konkurrues. Përfaqësuesit e BIRN kanë prezantuar rezultatet e hulumtimit dhe kanë potencuar mosgatishmërinë për qasje në dokumentet zyrtare nga shumë institucione të cilat kanë arritur t’i kenë në dispozicion vetëm pas vendimeve përfundimtare të gjykatës. Hulumtimi ka rezultuar që dokumentacioni lidhur me këtë shpenzime është shumë i varfër dhe nuk shpalos informacion për qëllimet e përdorimit të këtyre fondeve. Debati ka vazhduar nga përfaqësuesit komunal dhe në fokus ka pasur rritjen e transparencës por kanë nënvizuar edhe nevojën për këto kategori të shpenzimeve pasi secila nga komunat kanë aktivitet e tyre jubilare të cilat ndikojnë në rritjen e këtyre shpenzimeve. Përfaqësues të shoqërisë civile kanë shprehur nevojën e shpalosjes së informacioneve para publikut për më shumë informata për përmbajtën e këtyre shpenzimeve dhe ndalimin e përdorimit të tyre për artikuj të luksit.

Zyra Kombëtare e Auditimit me datë 26 Prill 2019 (e premte), nga ora 9:45-12:00 do ta bëjë prezantimin e raportit të fundit të publikuar “Zhvillimi i Kapaciteteve në Procesin e Bërjes së Politikave dhe Koordinimit – Projekt i financuar nga Sida dhe zbatuar  nga Zyra e Kryeministrit”. Prezantimi i raportit të auditimit të performancës do të mbahet në sallën Orion në rrugën Rexhep Luci. Në këtë tryezë të ftuar janë përfaqësues të të gjitha Ministrive, Zyrës së Kryeministrit, projektit SIDA , shoqërisë civile, mediat, organizatat ndërkombëtare. Prezantimi ka karakter informues lidhur me  përmbajtjen, të gjeturat  dhe rekomandimet e dala nga ky auditim.  Diskutimi do të jetë i hapur për të gjithë pjesëmarrësit.  

Auditori i Përgjithshëm i Kosovës, z. Besnik Osmani, ka pritur sot në takim pune Auditorin e Përgjithshëm të Republikës së Kroacisë z. Ivan Klešic dhe bashkëpunëtorët e tij. Temë qendrore e këtij takimi ishte intensifikimi i bashkëpunimit dhe përkrahjes së ndërsjellë me qëllim të forcimit të auditimit të jashtëm në të dyja vendet. Z. Osmani ka uruar z. Klešic për rizgjedhjen e tij në mandatin e dytë nga Parlamenti i Kroacisë dhe i ka informuar mysafirët lidhur me të arriturat, sfidat si dhe objektivat strategjike të Zyrës Kombëtare të Auditimit. Auditori i Përgjithshëm i Republikës së Kroacisë z. Ivan Klešic, ka vlerësuar lartë punën e Zyrës Kombëtare të Auditimit të Kosovës dhe progresin e arritur në auditimin e jashtëm në Kosovë. Ai ka theksuar nevojën e intensifikimit të bashkëpunimit ndër-institucional, me qëllim të shkëmbimit të informatave dhe përvojave, në interes të avancimit të mëtejmë të auditimit të jashtëm dhe përmirësimit të menaxhimit të parasë publike. Krerët e të dyja institucioneve kanë nënvizuar përfitimet që mund të arrihen përmes një procesi të qëndrueshëm të bashkëpunimit bilateral. Në mbështetje të zhvillimit profesional, të dy palët janë pajtuar për një bashkëpunim të vazhdueshëm, koherent e konkret që do të realizohet përmes shkëmbimit të ekspertëve dhe shkëmbimit të përvojës audituese. Gjatë qëndrimit në Prishtinë, delegacioni kroat do të zhvillojë takime me deputetë në Kuvendin e Republikës së Kosovës si dhe me zyrtarë të lartë qeveritar.

Sot, në Pragë, është nënshkruar Marrëveshja për Bashkëpunim midis Zyrës Kombëtare të Auditimit të Republikës së Kosovës dhe Zyrës Supreme të Auditimit të Republikës së Çekisë.

Në kuadër të vizitës në selinë e Zyrës Supreme të Auditimit të Çekisë, Auditori i Përgjithshëm i Kosovës, Besnik Osmani ka diskutuar me homologun e tij çek, Milosllav Kala për forcimin e bashkëpunimit midis dy institucioneve supreme të auditimit, për zbatimin e standardeve ndërkombëtare të auditimit. Me këtë rast është nënshkruar Marrëveshja për bashkëpunim bilateral në fushën e auditimit. Marrëveshja përfshin fusha të rëndësishme të bashkëpunimit midis dy institucioneve dhe synon shkëmbimin e praktikave të mira audituese, veçmas në lidhje me metodologjinë dhe procedurat e auditimit të jashtëm të sektorit publik, aktivitetet profesionale për zhvillimin e mëtejmë të kapaciteteve institucionale e njerëzore, përmirësimin e komunikimit me palët e jashtme, etj.

Presidenti i Zyrës Supreme të Auditimit të Çekisë, Milosllav Kala, ka vlerësuar progresin e arritur në Kosovë, lidhur me aplikimin e auditimit sipas standardeve ndërkombëtare të institucioneve supreme të auditimit. Ai është zotuar që, përveç bashkëpunimit bilateral, të përkrah Zyrën Kombëtare të Auditimit të Kosovës për pjesëmarrje aktive në kuadër të projekteve dhe aktiviteteve të Organizatës Evropiane të Institucioneve Supreme të Auditimit (EUROSAI), veçmas kur Çekia të merr kryesimin e këtij institucioni të rëndësishëm në nivel evropian.

Gjatë qëndrimit në Çeki, delegacioni kosovar në përbërje të Arvita Zyferit, Ndihmëse e Auditorit të Përgjithshëm, Qëndresa Mulaj, Shefe e Kabinetit dhe Shkelqim Xhema, Drejtor i Auditimit, përveç që kanë prezantuar përvojat dhe rezultatet e Zyrës Kombëtare të Auditimit të Kosovës, në mënyrë aktive kanë marr pjesë në diskutimet e përbashkëta me homologët çek, lidhur me metodologjinë, parimet dhe mënyrat për përmirësimin e mëtejmë të raporteve të auditimit.

Në takim, vëmendje e veçantë i është kushtuar edhe zbatimit të qëllimit të parë strategjik të EUROSAI-t që ka të bëj me ngritjen e kapaciteteve dhe përdorimit të dhënave për qëllimet e auditimit.

Në kuadër të vizitës në selinë e Zyres Kombëtare të Auditimit të Suedisë, Zëvendës Auditori i Përgjithshëm i Kosovës, Ilir Salihu, është takuar me drejtuesit dhe personelin auditues të Institucionit Suprem të Auditimit të Suedisë, me të cilët ka diskutuar për modalitetet e vazhdimit dhe thellimit të bashkëpunimit bilateral, në kuadër të Marrëveshjes për Bashkëpunim ndër-institucional. Gjatë qëndrimit në Suedi, z. Salihu ka qenë i ftuar që të marrë pjesë në takimet e përbashkëta të personelit të Zyres Kombëtare të Auditimit të Suedisë me drejtuesit e Zyres Shtetërore të Auditimit të Palestinës dhe të prezantojë përvojat e Zyres Kombëtare të Auditimit të Republikës së Kosovës, në lidhje me planifikimin strategjik, menaxhimin e ndryshimit dhe ndërtimin e kapaciteteve institucionale dhe njerëzore.

Procesi i zhvillimit të politikave ka një ndikim të gjerë dhe me interes për reformat në administratën publike të vendit. Falë mbështetjes nga Agjencia Suedeze për Zhvillim dhe Bashkëpunim Ndërkombëtar (SIDA), Qeveria e Kosovës ka zhvilluar mekanizma që ta përmirësojë këtë proces në fushën e legjislacionit dhe hartimit të politikave.

Zyra Kombëtare e Auditimit (ZKA) ka publikuar raportin e auditimit të performancës për projektin “Zhvillimi i Kapaciteteve në Procesin e Bërjes së Politikave dhe Koordinimit në Kosovë", i cili është financuar nga SIDA dhe zbatuar nga Zyra e Kryeministrit (ZKM). Qëllimi i këtij auditimi ishte të vlerësohet performanca e Projektit.

Auditimi ka nxjerrë përfundimin se projekti në përgjithësi ka arritur rezultate të rëndësishme duke kontribuar në ngritjen e kapaciteteve për zhvillimin e politikave brenda Qeverisë, duke futur mekanizma për kryerjen e analizave të politikave, analizën e ndikimit dhe mekanizmat mbështetës për përfshirjen efektive të shoqërisë civile.

Pavarësisht kësaj, ekziston rreziku që pas përfundimit të Projektit, Qeveria nuk do të ketë në dispozicion kapacitete të mjaftueshme për të kryer analizat e nevojshme të ndikimit ekonomik, planifikimit strategjik dhe komponenteve të tjera të procesit për zhvillimin e politikave dhe legjislacionit.

Raporti thekson se mungesa e një procesi të rregullt të komunikimit interaktiv nga ekspertët afatgjatë të Projektit me të gjithë përfituesit e synuar - ministritë e linjës dhe departamentet e ZKM-së mund të krijoj vështirësi në identifikimin e qartë të nevojave të tyre zhvillimore dhe plotësimin e këtyre mangësive. Kjo mund të reflektojë me humbjen e mundësisë për përfitim nga ndihma e ekspertëve të SIDA-së.

Besnik Osmani, Auditor i Përgjithshëm, lidhur me këtë auditim ka deklaruar se "ka fusha ku Projekti ka kontribuar fuqishëm në zhvillimin e qëndrueshëm në procesin e hartimit të politikave duke hartuar udhëzime dhe doracakë praktikë, që janë vlerësuar pozitivisht nga përfituesit e projektit. Megjithatë, përkundër progresit të bërë nga Projekti në procesin e zhvillimit të politikave, disa mangësi të identifikuara mund të rrezikojnë qëndrueshmërinë e rezultateve të Projektit dhe në këtë drejtim efektivitetin e procesit të zhvillimit të politikave".

Bazuar në gjetjet e raportit, autoritetet përgjegjëse, respektivisht Zyra e Kryeministrit dhe Projekti Sida, të intensifikojnë përpjekjet e tyre për të përmirësuar metodologjitë e përdorura për ngritjen e kapaciteteve, rrisin komunikimin me përfituesit e synuar dhe të monitorojë në mënyrë të vazhdueshme arritjen e rezultateve. Përmes kësaj procesi do të ketë ndikim më të madh në reformat e Administratës Publike si një nga elementët e rëndësishëm që korrespondon me aspiratën e vendit drejt integrimit në BE.

Raportin e plotë mund ta lexoni në këtë vegz .